¹ पिच्छु फिर बा सभाघर में गव, हुवाँ सुखो हात भव एक आदमी रहय। ² बा बाके शबाथ-दिनमें अच्छो करेहए करके बाके दोष लगान आदमी बाको चूहा लेतरहएँ। ³ तव बा सुखो हात भव आदमी से कहि, “यिताए आ।" ⁴ बा उनसे कहि, बिश्रामदिनमे अच्छो करन् कि खराबी करन्, ज्यान बचान् कि नाश करन् कउन् ठीक हए?” तओ बे चुप् लागे रहे । ⁵ बिनको हृदय को कठोरता में दु:खी हुईके क्रोधित भव और बा उनके सबके देखी और बहे आदमी से कहि, “तेरो हात बढा।” बा हात बढाई और बाको हात अच्छो हुइगओ। ⁶ तओ निकरके गए बाके कईसे नाश करएँ करके फरिसी तुरन्त हेरोदसँग बाके बिरोधमे सल्लाह करीं। ⁷ तओ पिच्छु येशू अपन् चेलन संग समुन्द्र घेन गओ, और गलिलसे आदमिन् की बहुत भारी भीड बाके पिच्छु लागी। ⁸ यहूदिया, यरुशलेम, इदुमिआ, यर्दनपार और टुरोस और सिदोनक आसपासके आदमीन् को बहुत भारी भीड बाको अचम्मो काम के बारेमे सुनन् बाके ठिन आए। ⁹ भीड बाके चिब्दाबय नाए करके बा अपन चेलन् से अपने ताहीं एक नैयाँ तयार करन लगाई। ¹⁰ बा बहुतन्के अच्छो करी बहेमारे रोग लगे भए सब बाके छूइहएँ करके धकेला धकेल करत रहएँ। ¹¹ जब अशुध्द आत्मा बाके देखत रहएँ, घुप्टा पड्के अईसे चिल्लात रहएँ, “तए परमेश्‍वरको लउँडा हय।" ¹² तव बाके कोइन के पता न चलय करके बिनके बा कडो हुकम दै। ¹³ तओ पिच्छु येशू डँगामें चढो, और बा अपने चाहन बारे जीत्तोनके बुलाई, और बे बाके ठिन अाए। ¹⁴ अपन् सँग रहन् और प्रचार करन पठानके बा बाहृओं जनीके नियुक्त करी, ¹⁵ और उनके भुत निकारन के अधिकर फिर दै। ¹⁶ और बाहृओं प्रेरित जेहि हएँ : सिमोन, जौंनको नाउँ बा पत्रुस धरिरहए, ¹⁷ 17 जब्दियाक लउँडा याकूब और याकुबको भईया युहन्ना। बा उनके बोअनर्गेश, औ गर्जनको लउँडा करके नाउँ दै। ¹⁸ अन्द्रीयास, फिलिप, बारथोलोमाई , मत्ती, थोमा, अल्फयसको लउँडा याकूब, और थेदियस, सिमोन कनानी, ¹⁹ और यहूदा इस्करियोत जौन बाके धोका दै। ²⁰ तओ येशू फिर घर घेन फिर गओ। भीड़ जम्मा हुईगव, हियाँतक की बा खानु खान तक न पाईं। ²¹ जब येशूके परिवारके जा सुनी, तव बाके लैजानके बे निकरे और बाको मन ठिगानामे न हय करके बे कहत रहयँ। ²² यरुशलेमसे आए भए व्यवस्थाके शास्त्री कहीं, “ बामे बालजिबुलको भुत हए, और भुतक मालिकसे बा भुत निकारत हए।” ²³ तओ बा उनके अपने ठिन बुलाए के कहानी कही, “ शैतान शैतानके कैसे निकारैगो ? ²⁴ कुई राजको आपसमे फुट हुईहए तव बा राज टिक न पए ²⁵ हए। 25 कुई घरको आपसमें फुट भव तव बा घर टिक न पएहए। ²⁶ और शैतान शैतानके विरुद्दमें खड़ो हुइके फुट लीअए हए, तव बा न टीकैगो , तव बाको अन्त आएजय हए। ²⁷ कोई फिर बली आदमी के घरमे घुसके धनमाल लूट न पएहयँ, जबतक बा बली आदमी के न बाँधहए तओ बा बाको घर लुट न पएहए। ²⁸ नेहत्य, मै तुमसे कहत हौं, आदमीन को सब पाप और ईश्‍वर-निन्दा क्षमा करे जयहयँ, ²⁹ पर पबित्र आत्माके बिरुद्दमें निन्दा करन बारेनके कबहु क्षमा न हुइहए, तओ बा अनन्त पापकर्मको दोषी ठहारैगो।" ³⁰ येशू जा वचन कहि, काहेकी ""बा अशुद आत्मा हए करके बे कहत रहएँ। " ³¹ बाकी अइया और बक भैइया बाके हुवाँ आए, और बाहिरय ठाड्के बाके बुलान पठाईं। ³² भीड़ बाके आसपास बैठीरहए और बे बासे कहीं, “देख तुमर अईया और तुमर भैइया तुमके बाहिर ढुणत हएँ।” ³³ बा उनके जबाफ दैके कही, मिर अईया और भैइया कौन हए ? ³⁴ और अपने आसपास चारौंघेन देखके बा कही, “देखओ जेहि हएँ मिर अईया और भैइया। ³⁵ काहेकी जौन परमेश्‍वरको इच्छा पालन करत् हएँ बेहि मिर भैइया और मिर बहिनिया और मिर अईया हएँ।”