¹ और बा समुन्द्रके बोपार गेरासेनस के मुलुक मे आओ। ² येशू नैयाँसे बाहिर उतरके तुरन्तै मरघटसे अशुध्द आत्मा लगो भव एक आदमी बाके भेटी। ³ और बा मरघटमे बैठत रहए। कोई फिर साँकरसे बाके बाँध् न पात रहयँ। ⁴ काहेकी बाके बहुत चोटी किला और साँकरसे बाँधे रहैं, और बा साँकरके खण्डी-खण्डा करदेत रहै। कोई आदमी बाके बसमें कर न पात रहैं। ⁵ बा रात और दिन सदामान मरघट और डाँगामें चिल्लात अपनए के पथरा से काटतै नेगत रहय। ⁶ और जब बा येशू के दूरसे देखलै तव दौडके अओ, और बाके ढोक लागी। ⁷ और गजब जोड़से चील्लाएके बा कही, “हे सर्बोच्च परमेश्‍वरको पुत्र येशू मोसे तुमके का पडी हए ? मए परमेश्‍वरको कसम खाए के तुमसे बिन्ती करत् हौं, कि मोके दुःख मतदेबय।" ⁸ काहेकी बा बासे कही, “ए अशुध्द आत्मा, बा आदमी मैसे निकरके अईजा।” ⁹ और बा बासे पूँछी, “तेरो नाउँ का हए ?” तव बा कहि, “मेरो नाउँ फौज हए, काहेकी हम बहुत हयँ।" ¹⁰ तव भुतात्माके बा ईलाका से बाहिर न निकारय करके बे बासे नहोरा पणन लागे। ¹¹ हुवाँ जाउँडेको डाँगामे सोराको एक बहुत भारी बगाल चुगत् रहय। ¹² तव भूतात्मा अइसे कहिके बासे बिन्ती करीं, हमए सोरन के ठिन् जानदे, और हम बा भितर कुचङ्गे।" ¹³ बा उनके अनुमति दै, और अशुध्द आत्मा बाहिर निकरके सोरनके भीतर घुसिगए, और लगभग दुई हजार सोरनको बा बगाल ढाहों मैसे समुन्द्र घेन हुरे, और समुन्द्रमे डूबके मरीगए। ¹⁴ तव सोरा चुगानबारे भाजे, और सहर और गाउँ- गाउँमे खबर दैं । और का भव हए, सो देखन आदमी हुँवा आय। ¹⁵ तव बे येशू ठिन आए, और देखिं की भुत लागो आदमी अच्छो मनसे कपड़ा लगाए बैठो रहै। बाके देखके बे डराईगए। ¹⁶ और जौन जे देखि रहैं, बे भुत लगो आदमी और सोरनके का भव रहै, बा बतायदैं। ¹⁷ और उनको इलाकासे चलो जा कहिके आदमी येशूसे बिन्ती करन लागे। ¹⁸ बा नैयाँमे घुसन् लागो तव भुत लागो आदमी बाके संग रहन ताहिं बिन्ती करी। ¹⁹ तव बा बाके अनुमति न दै, तव बासे कहि, “तए अपने घरमे जाएके तेरे संगीनके प्रभू तेरे ताहीं करो भव महान् काम और तोके दिखाव भव बडो दया के बारेमें बिनके बतायदे।" ²⁰ और बा आदमी नेगिदै, और येशू बाके ताहीं कितनो बड़ो काम करीरहै बा डेकापुलिस भर प्रचार करन लागो, और सब आदमी अचम्मो मानी। ²¹ जब येशू फिर नैयाँमे समुन्द्र के बोपार गओ, तव एक गजब भारी भीड़ बाके आसपास जम्मा हुईगै। बा त समुन्द्र के किनारे ेहय। ²² सभाघरके शासक के बीचसे याइरस नाउँको एक जनी बाके ठिन आओ, और बाके देखके बाके पावमे घुप्टा पडिगओ, ²³ और अइसे करके बिन्ती करी, “मेरी छोटी लौणिया मरन् लगी हए, आएके बाके ऊपर तुम हात धरदेबऔ, तव अच्छी हुईजाए हए और बचीजए हए।" ²⁴ तव येशू उनके संग गव। एक बडी भीड बाके पिच्छु लागी और आदमी बाके आसपास ढकेला ढकेली करनलागे। ²⁵ और बाहृ वर्ष से रगत बहन बारो रोग बारी एक बैईयर बहुँआ रहय। ²⁶ बा बहुत बैदनके हातसे बहुत कष्ट पाएके, अपन सँग भव सारा धनसम्पति खर्च करके अच्छि न भई बलुक और खराब हालतमे पुग्गई। ²⁷ पर बा येशूके बारेमे सुनी रहए, और भीड़के पीच्छूसे आएके बाको कुरता बा छुई। ²⁸ काहेकी बा मनए मनमें कहि मए बाको कुरता छुइलेहौं तव मए अच्छो हुईजाए हौं। ²⁹ और तुरन्त बाको रगत बहन बन्द हुईगओ और अपनो शरीरको रोग अच्छो भव करके पता पाएगई। ³⁰ अपने मैसे शक्ति बाहिर निकरो झट्टए येशू पता पाएके भीड़में पिच्छु घूमके पूछीं, “कौन मेरो लत्ता छुइहए ?" ³¹ चेला बासे कहिं, “भीड़ ढकेला ढकेली करत तुम देख्तै हौ। और तहूँ फिर तुम कहत् हौ, “कौन मोके छूओ ?" ³² बाके छुन बारो कौन हए, करके बा चारऔघेन देखन लागो। ³³ तव अपनक जो भव रहए, बा पता पाएके बा बैइयर डराएके थर थरत आएके येशूके अग्गू घोप्टा पडिगै, और बा सबै सच्ची बात बताई दै। ³⁴ "तव बा बासे कही "ए लौणिया, तिर बिश्‍वास तोके अच्छो करी हए। शान्तीसे जा। तेरो रोग अच्छो हुईगव हए।” ³⁵ तव बा बोलतपेती, शासकके घरसे आदमी आएके कहिं, तुमरी लौणिया त मरिगै। गुरुजीके अब कष्ट काहे देत हौ ?” ³⁶ तव बे करि भई बातमे ध्यान न दैइके येशू सभाघरके अगुवासे कही, “मत डराबै, बिश्‍वास इकल्लो कर।" ³⁷ और बा पत्रुस, याकूब और याकूबको भाईया युहन्नासे बाहेक और कोईके अपने सँग आनके अनुमति न दई। ³⁸ बे सभाघरके शासकके घरमे आए, और बा खैला बैला करनबारे, और रोनबारे और बहुत जोड्से बिलकात देखी । ³⁹ भीतर कुच्के बा उनसे कही, “तुम काहे खैला बैला करत् हौ और रोतहौ ? लौणिया मरी न हय, बा सोए रहि हय।" ⁴⁰ तव बे बाकी बात सुन्के हसीं। तव बा उनके सबके बाहिर निकारी, और लौणियाक दौवा और अईया और बाके सँग होन बारेनके सँगमे लैके लौणियाके ठाउँमे भीतर गव। ⁴¹ और लौणियाक हात पकडके बा बासे कही, “तलिता कूमी, “जौनको अर्थ हए, “ए बालिका, मए तुस काहत् हौं उठ्।" ⁴² और लौणिया तुरन्त उठीगै और नेगन् लागी। बो बह्रा बर्षकी रहए। और बहे समय बे अचम्मो मानी। ⁴³ बा उनसे कहि जा कोई पता न पामएँ कहिके कडो आज्ञा दै। और बालिकाके कुछ खान देओ करके बिनसे कही।