¹ सुबेरे भव खिनक मुखिया पुजारी, धर्म-गुरु, शास्त्री और जम्मए महासभाके आपसमे सल्लाह करके येशूके बाँधके लैगए, और पिलातस ठिन सौंप दैं । ² पिलातस बासे पुँछी, “का तुम यहूदीक राजा हौ ?” बा उनके जबाफ दै, “तुम्हीय अईसे कहत हौं ।" ³ मुखिया पुजारी बाके उपर बहुत बातकी दोष लगाई । ⁴ पिलातस बासे फिरके पुँछी, “का तुमर ठिन कुछ बात ना हए ? देख, तुमर बिरुद्दमे बे कित्तो बातकी दोष लगात हएँ ।" ⁵ तव येशू फिर कुछु जबाफ न दै, हियाँ तक कि पिलातस फिर अचम्मो मानी गओ। ⁶ निस्तार-तेवहरके बेरा आदमीनको मागो एक जनी कैदीके उनके ताहीं पिलातस छोडत् रहए। ⁷ बिद्रोहीके समयमे हत्या करन बारे बिद्रोही जेलमे रहएँ। हुवाँ मैसे बारब्बा नाउँको एक जनी हुवाँ रहए । ⁸ भीड़ आएगई और पिलातससे उनको चलन अनुसार बिनके ताहीं बिन्ती करन लागे। ⁹ पिलातस अईसे करके उन्से पुँछी, “का मए तुमर ताहीं यहूदीनको राजाके छोड देमओ करके तुम चाहत हौ ?" ¹⁰ काहेकी दिक्क के मारे से मुखिया पुजारीनके ठिन येशूके सौंपी रहएँ, करके बाके पता रहए । ¹¹ पर बलुक बारब्बाके उनके ताहीं छोडदेबै करके मुखिया पुजारी उनके सिखाई ¹² पिलातस फिर उन्से पुँछी, “तव जौनके तुम यहुदीनके राजा कहत हौ, बाके मए का करओं ?" ¹³ बे फिर चिल्लाइँ, “बाके क्रुसमे टाँगौं।” ¹⁴ पिलातस उन्से कहि, “काहे? बा का अपराध करी हए?” तव और जोड्से चिल्लाएके बासे कहिं, “ बाके क्रुसमे टाँगौ ।" ¹⁵ पर पिलातस भीड़के सन्तुष्ट करन इच्छा से उनके ताहीं बारब्बाके छोड्दै, और बा येशूके कोर्रा लगाएके क्रुसमे टाँगनके ताहीं सौंपदै। ¹⁶ सिपईया बाके प्रेटोरियन औ महल भितर लैगए, और जम्मा पल्टनके इकट्ठा कराईं । ¹⁷ और बे बाके बैगनी ( सुरमाहों ) रङ्गको लत्ता पैंधाएदैं, और काँटोको मुकुट बे बाके मुड़मे लगाए दैं । ¹⁸ "और "यहूदीनको राजाको जय" कहत् बे खिल्ली उडान लागे। ¹⁹ और बे बाके मुड़मे निगाली मारीं और थुँकी, और घुप्टा हुइके बाके दण्डवत् करीं । ²⁰ और येशूके गिल्ला करके पिच्छु बे बैगनी ( सुरमाहों ) लत्ता खोलदैं, और बाको अपनो लत्ता लागएदैं। तव पिच्छु बे बाके क्रुसमे टाँगन बाहिर लैगए । ²¹ और अलेक्जेन्डर और रुफसक दौवा, कुरेनी बासिन्दा सिमोनके गाउँसे आत बाके भेटीं, और येशूके क्रुस ऊठाएके लैजान बाके कर लगाइँ। ²² तव पिच्छु बे येशूके गलगथा कहन बारो ठाउँमे ल्याइँ । गलगथा नाउँको अर्थ खोपडीको ठाउँ हए । ²³ और बे बाके मुर्र मिलो दाखमध दैं। तव बा ग्रहण न करी । ²⁴ बे बाके क्रुसमे टाँगी। और कौन्छो हिस्सा लेमओ करके चिट्टा डारके बाके लत्ता आपसमे बाँटी। ²⁵ बे बाके क्रुसमे टाँगत् सुबेरेको नौ बजो रहए । ²⁶ "बाको दोष-पत्रमे "यहुदीको राजा" कहिके लिखो रहए।" ²⁷ बे बाके सँग दुई जनी डाँकु क्रुसमे टाँगीं-एक दहिना घेन और दुसरो बाके दिबरा घेन । ²⁸ धर्मशास्त्रको वचन आइसिय पुरो भव, “बा अपराधीन सँग गिनो।” ²⁹ हुँवासे जान बारे आदमी अपन मुँड़ हलात अइसी करके बासे कहिके गिल्ला करिं, “बा त मन्दिर उजाडके तीन दिनमे बनान बारो, ³⁰ क्रुससे उतरके आएजा, और अपनैक बचा।” ³¹ उइसी करके मुखिया पुजारी फिर शास्त्रीसे अईसो कहतय आपसमे बाको ठट्टा करीं, “जा औरनके बचाई, पर अपनएके न बचाए पातहए । ³² जा इस्राएलको राजा ख्रीष्ट, अब क्रुससे उतरके आबए, और हम देखेहएँ और विश्‍बास करङ्गे।” बाकेसंग क्रुसमे टँगे भए फिर बाको निन्दा करीं। ³³ बाहृ बजेसे लैके तीन बजे तक पुरो देशमे अन्धयारो छै गओ। ³⁴ तीन बजे घेन येशू जोडसे चिल्लाई, “इलोई, इलोई लामा सबखथनी ?” जाको अर्थ हए, “हे मेरो परमेश्‍वर, हे मेरो परमेश्‍वर तुम मोके काहे छोड्दए ?" ³⁵ आसपास ठाड़न बारे मैसे कोई कोई जा सुनके कहीं, “सुनओ, बा एलिया के बुलात हए।” ³⁶ और एक जनी दौडके गव एक सोकता के सिर्का ( रसा ) मे पुरा डुबाएके एक निगालीमे अइसे कहिके बाके पिन दैं, “देखौ, कहुँ एलिया बाके उतारन आतहए कि ।" ³⁷ तव येशू गजब जोडसे चिल्लाए के प्राण छोड दै । ³⁸ और मन्दिरको पर्दा ऊपर से लैके तरे तक दुई खण्डा हुइके फटिगओ। ³⁹ येशू अइसो प्राण छोडी देखके बाके ठिन ठाड़ो भव कप्तान कही, “नेहत्य जा आदमी परमेश्‍वरको पुत्र रहए ।" ⁴⁰ हुँवा दुरसे देखनबारी बैयर फिर रहएँ। बे मैसे मरियम मग्दलिनी और छोटो याकुब और योसेफकी अईया मरियम और सलोमी रहएँ । ⁴¹ बा गालिलमे रहए तव बे बाके पिच्छु चलत रहएँ, और बक सेवा सत्कार करत रहएँ। येशूक सँग यरुशलेममे आई भई बहुत बैयर फिर हुँवा रहएँ। ⁴² तयारीको दिन, औ शबाथ-दिनके अग्गु को दिन, सँझा होत रहए । ⁴³ महासभाके माने भए सदस्य अरिमाथियाक योसेफ, जौन परमेश्‍वरको राजको डगर देखत रहए, बा हिम्मत से पिलातस ठिन जाएके येशूकी लहास मागीं । ⁴⁴ येशू अग्गु से मरिगव हए करके सुन्तय पिलातस अचम्मो मानी । और कप्तान के अपन ठिन बुलाएके बा मरो हए कि ना कहिके सोधपुछ करी। ⁴⁵ बा मरीगओ हय कहिके कप्तानसे पता पाएके पिच्छु पिलातस येशुको लास योसेफके लैजानके अनुमति दै । ⁴⁶ और योसेफ मलमलको कपडा किनी, और लास तरे उतारके कपडामे लपेंटी, और पत्थरमे भारबनो एक गड्डामे धरीं। तव पिच्छु गड्डाके मोखो ( मोहट् ) मे बे एक पत्थर धरदैं । ⁴⁷ मरियम मग्दलिनी और योसेफकी अईया मरियम बाके धरो भव ठाउँ देखन डटी रहएँ।