1 शबाथ-दिन खतम हुइके पिच्छु मरियम मग्दलिनी और याकुबकी अईया मरियम और सलोमी महकन बारो मलम येशूके शरीरमे लगान ताहीं मोल लईं । 2 हप्ताको पहिलो दिनमे सुबेरे घामु निकरत् बे येशूके शर् मे पुगिंगईं | 3 और बे आपसमे कहीं, “हमर ताहीं कब्रको मोखो ( मोहट् ) को पत्थर कौन हटाए देबाए ?" 4 और उपर देखिं तव कब्र को गड्डा से बा पत्थर हटो देखीं । और बा पत्थर बहुत भारी रहए। 5 और गड्डा भितर बे सेतो कुर्त्ता लगाओ भव एक आदमीके दहिना घेन बैठो देखिं, और बे अचम्मो हुइगई । 6 पर बा उन्से कही, “अचम्मो मत मानओ । तुम नासरतको येशूके ढुणत हौ जो क्रुसमे टँगो रहए। बा जिन्दा हुइके उठिगओ हय बा हियाँ न हय। बाके धरो भव ठाउँ देखओ । 7 जाओ और बाके चेलनके और पत्रुस से कहीदेओ कि बा तुमरे अग्गु अग्गु गालीलमे जाए रहो हए। बा तुमसे कहो अनुसार तुम बाके हुवाँ दिख हौ। 8 बे निकरके शर् ठिनसे दौडीं काहेकि डर औ अचम्मोसे बे थरथरान डटिरहएँ और बे कोईसे कछु न कहिं काहेकि बे डरानी रहएँ । 9 हप्ताको शुरु दिनके सुबेरे बा जिन्दा हुइके पिच्छु बा पहिले मरियम मग्दलिनी ठिन दिखानो बक् मैसे येशू सात भुत निकारी रहए । 10 मरियम जाएके चेलनके जा खबर दै। बे बिल्काए बिल्काए रोत रहएँ । 11 पर जब येशू जिन्दा हुइगओ और मरियमके ठिन दिखानो कहिके जा बात बे सुनी, तव बे न पतियाने। 12 तव पिच्छु दुई चेला गाउँ घेन जात पेती उनके ठिन बा दुसरो रुपमे दिखाई पडो । 13 तव बे लौटके जाईके औरन के बताईं। पर बे उनके उपर फिर बिश्बास न करीं। 14 पिच्छु बा एघार चेलन ठिन बे खानुखान बेरा बैठो देखानो। और उनको अविश्बास और हृदयको कठोरताके कारन बा उनके डाँटी। काहेकि बा मरके जिन्दा हुइके उठीगओ करके बाके देखन बारेन कि बातमे बे विश्बास न करि रहएँ । 15 और बा उनसे कही, “सारा संसारमे जाएके सारा सृष्टिके सुसमाचार प्रचार करौ । 16 विश्बास करन बारो और बप्तिस्मा लेन बारो उध्दार पयहए, पर विश्बास न करन बारो दोषी ठहरैगो। 17 विश्बास करन बारेन सँग जे चिन्ह हुईहएँ।-मिर नाउँमे बे भुत भजामङ्गे, बे नयाँ भाषामे बोलङ्गे । 18 बे साँप पकड़ङ्गे और कुई बिषालु चिज पिहएँ तहुँ कुई उनके नोकसानी न करेहए बे रोगिनके उपर अपन हात धरङ्गे और बे अच्छे हुईजय हयँ। 19 तव अईसी उनसे मसक्के पिच्छु प्रभु येशू स्वर्गमे चलोगऔ, और परमेश्वरको दहिना हातघेन बईठगओ । 20 और बे चेला जाएके सब ठाउँमे प्रचार करीं। प्रभु उनके सँगमे काम करत रहो, और चिन्हन से वचनके मज्बुत करत गओ। आमेन।