¹ Entón Xacob chamou os seus fillos, e dixo: "xúntádevos, e contareivos o que vos vai a acontecer nos días vindeiros. ² Achegádevos e escoitade fillos de Xacob. Escoitade ao voso pai Israel:" ³ Rubén, ti es o meu primoxénito, a miña fortaleza, e o principio do meu vigor, excelente en dignidade, e excelente en poder, ⁴ impetuoso coma as augas, non serás o principal, pois subiches ao leito do teu pai. Degradácheste, subindo ao meu tálamo. ⁵ Simeón e Leví son irmáns, instrumentos de violencia son as súas armas. ⁶ Non entre a miña alma no seu consello, nin o meu espírito se xunte á súa asemblea, pois no seu furor asasinaron homes, e por gusto mutilaron os bois. ⁷ Sexa maldita a súa ira, tan violenta, e a súa furia, tan cruel. Espallareinos entre Xacob, e farei que se dispersen en Israel. ⁸ Xudá, os teus irmáns alabarante. A túa man estará no pescozo dos teus inimigos. Inclinaranse ante ti os fillos do teu pai. ⁹ Xudá é un cachorro de león. Ergueraste sobre a túa presa, meu fillo. El agáchase e bótase coma león e coma leoa. Quen fará que se levante? ¹⁰ Non se apartará o cetro de Xudá , nin a vara de mando de entre os seus pés, até que chegue Silo e os pobos lle obedezan.. ¹¹ Amarrando o seu burro á vide, e a cría da súa asna á cepa. Lava no viño o seu vestido, e a súa roupa en sangue de uvas. ¹² Os seus ollos son vermellos coma o viño, e os seus dentes brancos coma o leite. ¹³ Zabulón vivirá á beira do mar. Será porto de navíos, e a súa fronteira até Sidón. ¹⁴ Isacar, asno forte, que repousa entre dous curros. ¹⁵ Viu que o descanso era bo, e a terra agradable. Abaixou o seu ombreiro á carga e servirá en tributo. ¹⁶ Dan xulgará o seu pobo como unha das tribos de Israel. ¹⁷ Será Dan serpe xunto ao camiño, víbora xunto ao sendeiro, que morde os talóns do cabalo e bota o xinete cara atrás. ¹⁸ Iahveh, a túa salvación agardo! ¹⁹ Gad, atracadores o atacarán, mais el atacará ao final. ²⁰ O pan de Aser é apetitoso, e daralle delicias ao rei. ²¹ Neftalí é unha cerva solta, que está dando fermosísimas crías. ²² Xosé é un brote frutífero, unha rama frutífera xunto á fonte, e as súas pólas soben polo muro. ²³ Os arqueiros amargárono, disparáronlle e acosárono. ²⁴ Pero o seu arco mantívose firme, e as súas mans fortalecéronse debido ás mans do Poderoso de Xacob, por causa do Pastor, a Rocha de Israel. ²⁵ O Deus de teu pai axudarate, o Deus Todopoderoso bendicirate con bendicións do ceo de arriba, con bendicións das profundidades de abaixo, e bendicións dos peitos e do ventre. ²⁶ As bendicións do teu pai son maiores que as bendicións dos meus proxenitores, ata o límite dos montes eternos. Sexan elas para a cabeza de Xosé, e para a fronte do consagrado entre os seus irmáns. ²⁷ Benxamín, lobo depredador. Pola mañá devorará a presa, e pola tarde repartirá despoxos. ²⁸ Todas estas son as doce tribos de Israel, e isto foi o que lles predixo o seu pai, bendicíndoos a cada quen segundo a bendición que lle correspondía. ²⁹ Despois deulles instrucións e díxolles: "eu vou a reunirme co meu pobo, sepultádeme cos meus pais na cova que está no campo de Efrón o heteo, ³⁰ na cova que está no campo de Macpela, fronte a Mamre, na terra de Canaán, a que mercou Abraham co campo de Efrón heteo como propiedade para sepultura. ³¹ Alí enterraron a Abraham e á súa muller Sara. Alí sepultaron a Isaac e á súa muller Rebeca, e alí enterrei eu a Lea. ³² O campo e a cova que hai nel foron mercados aos fillos de Het." ³³ Cando Xacob rematou de darlle instrucións os seus fillos encolleu os seus pés na cama, e expirou, e foi reunido ao seu pobo.