¹ Mumatangua aye, kua kele mbunga yakama, kokua kele vyakulya. Yesu ua thanene vandongethi vendi ua valekele nguendi, ² "Njili na ngodhi nambunga, mukonda vana kala hamo nange matangua atatu nevi vyo vanali vyahi. ³ Nga njiva shandola vayeku membo avo nakulya kuahi, kuatha vamo vatce vi njala mungila. Vamo vanende ntunda ya laha.'' ⁴ Vandonge vendi vamu limbuluile, "Kuiko tu uana mboloto ya kupuamo muno mumpambo yakulitha eyi mbunga yavantu?" ⁵ Ua vehuile nguendi, "minthi yingahi muli nayo? "Vahandekele nguavo, '''yitanu nayivali.'' ⁶ Ua lekele mbunga vatumame hantci. Ua tambuile minthi yamboloto, yije yitanu na yivali, keho ualombele, keho ua yi vanyuine. Uayi hanene kuli kuvandonge vendi vayihake kulutue luavo, na kuyihaka kulutue lua mbunga. ⁷ Keho lalo vakele na vinthi vya vindende, munima yaku vi lombela, ua lekele vandonge linga navyo va vyavele. ⁸ Va lile vekutile, keho va nonene vimpindi vya thaleleho, vyakuheta kuvihele vya kama vitanu na vivali. ⁹ Va kele vantu vakupua makulukadhi a uana. Keho, ua va shanduele. ¹⁰ Haye vene nendi nava ndonge vendi va kovelele muvuato, keho vayile kumutamba ua Ndalamanute. ¹¹ Keho, vaFaliseo va tuhukile keho va shangumukile kuli kuanya nendi. Va tcetelele kumona chileketho cha muilu muli yikeye, linga va muetheke. ¹² Ua tutumuithile muakama mu mpudhi yendi yakujela nakuhandeka nguendi, "Mukonda vika limo eli lithetelela chimuetho? Vuchili njimi leka nguange, chileketho chahi chiva ka hana kulimo eli." ¹³ Keho, uava thile, ua kovelele mu vuato lalo, nakuya musinya lije lyandonga. ¹⁴ Vandonge vevalele kuhitula mboloto. Vakele namuinthi umo lika uambolo muvuato kuvakele na mboloto yikuavo lalo yahi. ¹⁵ Ua va lekele, nguendi, ''Takametheni naku li vingila na hingo ya vaFaliseo na hingo ya Helonde.'' ¹⁶ Vandonge valihuile umo namukuavo nguavo, ''Muomu motuna yeneka mbolo.'' ¹⁷ Yesu ua vidhivukile evi, Keho ua vehuile nguendi, ''Vika mulihuila ngueni mbolo yahi? Nolo kanda mutave? Nolo kanda muvyuve ndi? Vimbunge vyeni vili na kutakanya ndi? ¹⁸ Muli namesho, komue kumona ndi? Muli na matui, komue kuvua ko ndi? Komue kuvuluka? ¹⁹ Monja pamuine minthi yitanu ya vimbolo hambunga yamakulukadhi atanu, vihele vingahi vyo mua shulithile vya vithanyu vya vimbolo vya thalele ho? Vahandekele nguavo, "Likumi navivali." ²⁰ Monja vanyuine vimbolo vitanu navivali hama mbunga yamakulukadhi a uana, vihele vingahi vya vitavu vya vimbolo vije vyo mua uanene? Vamulekele nguavo, "Vitanu navi vali." ²¹ Ua vehuila nguendi, "Nolo kanda lalo muvyuvue ndi?" ²² Vedhile ku Betesaida. Vantu vako vamunehelele kapuputua nakumulombo amukambeke mavoko. ²³ Yesu ua kuatele kapuputua uje kulivoko, nakumu tuamenena kutuhuka muimbo. Omo mua muyekuila hamesho nakumu kambeka mavoko, ua muihuile, "Yove umona vyuma ndi? ²⁴ Ua kankukile, nakuhandeka nguendi, "Njina mona vamala venda lui vanafu ngue viti." ²⁵ Keho Endi lalo ua mukambekele mavoko hamesho, mumala ue shukile, ua kangukile nakumona vyoshe kalanganja. ²⁶ Yesu uamu tumine kuimbo nakumuleka nguendi, "Keti uka kovele muimbo lyalindende." ²⁷ Yesu uayile navandonge vendi mumembo a Sesaliya Filipu. Mungila yavo uehuile vandonge vendi, "Yange Yiya vekenjitumbula vantu"? ²⁸ Vamulimbuilile nguavo, "Youano muka kumbuitika. Vamo nguavo "Elia", vamo nguavo, umo ua vapolofete." ²⁹ Ua vehuile lalo, "Eni cho vati mue kunji tumbula yange yiya?' Petulu ua mulekele nguendi, "Ove Kilistu." ³⁰ Yesu ua va vindikile keti mukambulule kuli nkala uoshe vya kuli Yange . ³¹ Ua tamekele kuva longetha, nguavo muna Muntu atha kuyanda ku vyuma vya vingi, vakuluntu vaka mu vyana na va sasendote na va kamathona vakatha ku kamutcihya, keho kunima yamatangua atatu aka shituka. ³² Ua tokethele muthimbu ou uoshe. Keho Petulu ua mutualele kua likalyendi na kumu vyanena. ³³ Vuno Yesu ua tengulukile na kutala vandonge naku vyana Petulu, naku handeka nguendi, "Tunda kumesho ange, Satana! Ko ua hakele ko mana ove ku vyuma vya Shuku, vunoni ku vyuma vya vuntu." ³⁴ Ngechi ua thanene mbunga kumo navandonge, ua handekele navo nguendi, "nga umo a yongola kunji shuama, a likumiye, ambate chilindakano chendi keho anji shuame. ³⁵ Uoshe a yongola kuohyela muono uendi, nou uoshe a dhimbaletha muono uendi muomu lyange na mudhimbu ua chili aka u uana. ³⁶ Vika vyatha muntu muku uana lifuti lyoshe keho adhimbalethe muono uendi? ³⁷ Vika atha kuhana muntu muku uana muono uendi? ³⁸ Uoshe ovua shuama mulyange na majui ange muntcimbu yino ya kuvihya navupangala, muna muntu aka muvuilala suama muakenja mu vumuene vua Yishe natungelo vakuyela."