¹ Ua tundile kuje nakuya kumbongi yakuimbo lyendi keho vandonge vendi va mushuamene. ² Omo Sapalalo yahetele, Ua longethele muSinangonga. Vantu va vengi va muvuile kumo naku mu komoka. Va handekele nguavo "kuiko kua na uana evi vyalongetha? "Mana muka a aa ova muhana?" " Vikomoketho vika evi vya kupanga na mavoko endi?" " ³ Ou keti yikeye ;nkulungu mukakushonga, muna Malia na mukuenje uendi ua lyala Tyango na Josefa na Yunda hamolika naSimoni? Va kuenje vendi va vakentu vahiho hano? Yesu uava vavalethele vimbunge vyavo. ⁴ Yesu ua valekele nguendi, "Kapolofeto uahi vathingimika mumbongi yendi vavenya, muvushoko vuendi nava muimbo lyendi, kuvanga kuchifuti cheka aka uana kathingimiko ." ⁵ Kathele kupanga vyakama, kutundithako kuva kambeka mavoko endi vantu va vandende vaku vavala naku vakanguitha. ⁶ Ua komokele ku kujeneka lutcilielo luavo. Keho ua yile mukuendangana mu membo na kulongetha. ⁷ Ua thanene likumi na vavali hamolika naku valeka ku va tuma vavali na vavali, na kuvahana ndhili kumpundhi yakuvihya, ⁸ na kuvaleka keti vambate chimo mukuenda kuavo, kutundithako vyuma, keti kuambata mbolo, nkombe ndi vimbongo mu miva yavo. ⁹ Vunoni vanapande kudhala vinkuaku vya vyula, keti vinkuaku vya kufuikiya. ¹⁰ Ua valekele, "Nkala hoshe homukovela munjivo, tumameni mo noho homu katuhukila. ¹¹ Ambecho Nkala limbo lina mivyana kumitambula ndi kumi tolilila, omo mo mutundamo mumuhela, likukumuneni likungu ku myanja yeni mukupua vukaleho kulyavo." ¹² Vatuhukile na kuvaleketha vantu vana pande kutenguluka nakutha vya kuvihya. ¹³ Vatundithile vimpundhi vya kuvihya vya vingi naku vuavuetha vantu vavengi namadhi naku vakanguitha. ¹⁴ Muene Helonde omo mua vyuvuile evi, lidhina lya Yesu lya tchimanene, vamo va handekele nguavo, "Youano muka kukusha nashituka kukutca, ngocho ali nandhili ya kupanga vikomoketho mulyendi." ¹⁵ Vamo vahandekele, "Yikeye Eliya". Vakuavo va handekele nguavo , "Yikeye kapolofeto ngue umo ua vapolofeto vakeleko ku laja." ¹⁶ Keho muene Helonde mua vyuvuile uahandekele nguendi, "Youano ou yonja tetele mutue, nashituka." ¹⁷ Kuli Helonde ua tumine linga Youano vaka mukuate naku muhaka mukamenga mulidhina lya Helondiya (mukentu ua munayina Filipu) mukonda uamuambatele. ¹⁸ Youano ua lekele Helonde, "Kocha kelemo mulishiko, ua mbate mukentu ua mukuenje uove. ¹⁹ Keho Helondiya ua kele na vukalu vuakama na kuyongola kumutcihya, vuno ka uanene ngila, ²⁰ mukonda Helonde ua kele na lyova kuli Youano; ua vidhivukile nguendi muntu uakele muvuchili lyala ua mungulu uakusungama uakulela, ngechi ua munyungile. Mukumu tolilila vya muhanene vukalu nakunyengua muakama vuno ua muvuile vuino. ²¹ Keho litangua lya chili molya hetele Helonde ua kele nalitangua lyendi lyakumuthema na kuvuahetha vyakulya vya chili vya chinguedhi vya mashinja vanguvulu na vakuluntu vamasualale vaku Ngalileya. ²² Muna Helondiya nendi uedhile mo na kuvakinina mua senga, ua yanguilithile Helonde navoshe vathanene vashangalele. Muene ua handekele namuna mukentu, "tumbula vyoshe vyo uyonola nange lalo njiku hane vyo." ²³ Ua lithingile kulyendi nguendi, "Nkala vyoshe vyo unji lomba ange nji kaku hana vyo nambe mbaluvuila yavumuene vuange." ²⁴ Muna mukentu ua tuhukile naku kehula vayina nguendi, "Vika nji ka mulomba?" Ua handekele, "Mutue ua Youano muka kumbuitika." ²⁵ Uahilukile vuathi vuathi kuli muene, na kumuihula nguendi, "Nji yongola unji hane ngechi vene mutue ua Yoano ha lilonga lya chiti." ²⁶ Nambe mucha nehelele muene Helonde vuthiua, kathene ku vyana mukonda ua lithingile kulutue lya vangendhi vendi. ²⁷ Ngeci muene ua tumine lisualale uendi naku mushika a kamu nehele mutue ua Youano. Ngechi lisualale ua yile naku vatula mutue ua Youano mukamenga. ²⁸ Ua nehele mutue ua Youano halilonga naku uhana kumuna mukentu, endi ua utmabula ngechi ua uhanene kuli vayina. ²⁹ Va ndonge muku vyuvua, vedhile na kutambula muvila uendi ngocho va uhakele mu mbumbo. ³⁰ Va postolu vali uanene naYesu na ku muleka vipanga viva pangele. ³¹ Keho uava lekele nguendi , "Yijeni muye mumpambo muka huimithe kama ndende." Vavengi vedhile na vavengi va hilukile, ku vakele nanthimbu ya kulya. ³² Vayile mu vuato ku shungama mumpambo yavo vavenya. ³³ Keho vantu vamuene muva kaya na va vengi va vanonguenene, navo va shatukilileko hanthi kutunda kuvimbongi vya kulitha-tha nakuka vanga kuheta kulutue luavo. ³⁴ Muva hetele ku mukulo ua ndonga va muene vantu vavengi, keho va vovuilile ngodhi mukonda vakele ngue dhinjui dhaku yeneka kutakametha. Ngechi ua tamekele kuva longetha vya vingi. ³⁵ Kunima yanthsimbu vandonge vedhile kuli lyendi naku muihula nguavo, "Muno mumpambo tuli na litangua lina toko la ja. ³⁶ Vatume vaye kumembo akala ha muhyehi navifuti vya hamuhyehi vaka lande ko vimo vya kulya." ³⁷ Keho uataveleko naku valeka nguendi, "Va haneni vya kulya." Va muihuile nguavo, "Kuatha tuye tu ka lande minthi ya vimbolo ya kuheta ku vihita vivali tuaku va hane valye?" ³⁸ Ua vehuile nguendi, "Minthi ya vimbolo yingahi muli nayo? Yeni mukatale." Muva manene kutala vamu lekele nguavo, "Minthi yitanu na dhinthi dhivali tuli navyo." ³⁹ Ua lekele vantu voshe va tumame mu vimbunga-mbunga ha muila ua kutontola. ⁴⁰ Va tumamene mu vimbunga-mbunga vya kuheta kuchihita na makumi atanu. ⁴¹ Keho ua tambuile minthi yitanu na dhinthi vivali, ua tala muilu naku kundika minthi ya vimbolo naku vi tavola ua vihanene ku vandonge vavi hane kuvantu valye. Uavelele lalo dhinthi vivali muvantu voshe. ⁴² Voshe valile vekutile. ⁴³ Va tambuile vitavu vya mbolo, vya hetele ku vihele likumi navivali vya kushula, na vitavu vya vinthi navyo. ⁴⁴ Hakele vamala va kuheta ku makulukadhi atanu va kevo va lile minthi ya mbolo. ⁴⁵ Mukumana ua lekele vandonge valonde mu vuato va tuame kulutue, kuya ku Mbetesaida, hanthimbu oyo endi ua tumine mbunga yihiluke. ⁴⁶ Mova hilukile, ua yile ku mukinya aka lombele. ⁴⁷ Omo chinguedhi chahetele, vuato vuakele ha kati kamema aKalunga, endi ua kele likaliendi ha ntunda. ⁴⁸ Ua vamuene va chakana na chikathi, muomu kua kele mpundhi ya vatanganethele. Muhyehi nakuheta ku vutciki uedhile kulyavo, enda ha Kalungandonga, ua yonguele kuva tuvakana. ⁴⁹ Vunoni omo mo va mu muene enda helu lya mema vathinganyekele nguavo mpano ndumba yamuntu na kuvua lyova. ⁵⁰ Mukonda mo va mumuene va kele navishoti. Vuathi vuathi handekele navo nguendi, "Kaleni nandhili! Yange Yesu! Keti muvue lyova". ⁵¹ Ua kovelele muvuato navo, na mpundhi ya likelele, vakomokele muakama. ⁵² Omo ku vovuithile nguavo vika yina lomboloka minthi yavimbolo. Tenga vajanguluke, vimbunge vyavo kovya kele naliyango ⁵³ Muva javukile musinya lya ndonga, vedhile ku Ngenesaleta naku tutika vuato. ⁵⁴ Mo vashulukile muvuato, haje vene vantu vamu dhivukile, ⁵⁵ keho membo oshe vashatukile namihela yoshe vatamekele nakuneha vavedhi kuje kuoshe ko vovuilile Yesu. ⁵⁶ Nkala membo, vimbongi ndi mu chifuti kua kovelele, va hakele vavedhi kumihela yaku landethela. Nakumu kandelela linga ava tavethele vakuate ku chidhala chendi, nava vavengi voshe va kuateleko va kangukile.