¹ Uatamekele kulongetha mbunga yakama ya mudhengelekele ku mukulo ua ndonga ya Kalunga. Ua londele mu vuato vuje vuakele mumema ndonga ya Kalunga, ua tumamene mo. Mbunga yoshe ya kele kumukulo ua ndonga-Kalunga. ² Ua va longethele vya vingi mu vithimo, mu vi longetha vyendi, evi vikevio vya valekele. ³ "Tolilileni! Ndimi ua yile na ku kuna mbuto yendi. ⁴ Omuo mua kunine, yimo ya uililile mu ngila, keho tu dhila va yilile. ⁵ Yimo ya uililile ha mavue, kuya kele na livu lya lingi helu lya mavue, keho koya shokele mukonda livu kulyayile hale. ⁶ Vuno omuo litangua lya kile, mbuto yomine mukonda koyakele na midhi, yomine. ⁷ Mbuto yimo ya uililile mu manja. Manja akulile ayishokele, keho koyemine. ⁸ Yimo ya uililile mu livu lya kutuima, ya kulile na kuima muachili. ⁹ Keho ua handekele nguendi, "Ou ali na matui, akuvua, ovue!" ¹⁰ Omo Yesu mua kele likalyendi, na vaye va kele muhyehi nendi na vandonge likumi na va vali va muihuile vya vi thimo. ¹¹ Ua valekele nguendi, "Kulyeni vana hana kulangununa vya vumuene vua Shuku Kalunga. Vunoni ava voshe vali hanja, vyoshe vili muvithimo, ¹² ngocho va tala, vuno kumona kuahi, vovovua, vuno vuvuitho kuahi, nga va tenguluka, Kalunga aka vethela. ¹³ Ua valekele nguendi, "Ko mua kovuile ngano kathimo aka ndi? Vati muka tuvua tuthimo tuoshe? ¹⁴ Muka kukuna akuna lijui. ¹⁵ Eli limo likelyo lya kele kungila kuye kova kunine lijui. Omo mu vovua, Satana keho vuathi vuathi ueja na kutambula lijui lyo vakunine mulyavo. ¹⁶ Eyi yikeyo mbuto yova kunine ha mavue; vaje, mu kuvua lijiu vuathi vuathi va tambula naku jolela. ¹⁷ Vuno kuva kele na midhi mulyavo, vuno va likanyamekele kamandende lika. Kunima yantcimbu mu vija vyetheko, vuathi vuathi vaua. ¹⁸ Mbuto yimo vayi kunine ha manja. Hali vamo ve kuvua majiu, ¹⁹ Vuno kuyongola vyuma vya hantci naku kokueya vufuko na mashungu avyuma vyavyo, na kutanganetha majui,vikevyo kovye kuima. ²⁰ Yije yo vakunine ha livu lya chili va kevo vantu ve kuvua majui, ku atambula na kuima vushuka vuavuingi, vihita na vihita. ²¹ Yesu ua valekele nguendi, "uekuneha lambi munjivo na kuyihaka muinthi lya chi hele ndi muntalathi lya muhela? Ndi kuyi koveletha naku yihaka helu ku chiti? ²² Chahi cha kuvanda vuno chi kayomboloka, chahiko cha kushueka kuvanga chika yomboloka halitanya. ²³ Uoshe ali na matui, ovue!" ²⁴ Ua valekele nguendi, "Tolilila vuino kulyevi vyouvua, kuvyetheka vyo upangetha nove vaka kuetheketha vyo yove vavenya, vaka ku vandakanenako vya vingi. ²⁵ Mukonda ou ali navyo, vaka muhana vya vingi, nou nayeneka, nevi vyali navyo vaka munyeka vyo. ²⁶ Ua handekele lalo nguendi, "Vumuene vua Kalunga vunafu ngue lyala ua kunine mbuto yendi mulivu. ²⁷ Ua kotha vutciki mua hindukile mutanya, na mbuto yendi mulivu yinashoko, nendi kadhivukile vati ya yinashoko. ²⁸ Livu kushoketha mbuto yalyo vavenya:, hakulivanga muele, umba litui, kumanetha mbuto yaku kola mulitui. ²⁹ Mukuhya kua mbuto, vuathi atuma va ka kuhela muomu nthimbu ya kuhela yina hete. ³⁰ Ua handekele lalo, "Na vika tuetheketha vumuene vua Kalunga, ndi chithimo chika tu languinitha? ³¹ Ngue mbuto yakufutunuka, mu kuyikuna ya yindende mulivu. ³² Vunoni mu kuyikuna, yishoka naku hitakana vimbuto vyoshe mulihia nakutavula mintango yakama, natudhila va muilu va tunge mashua avo muchivule." ³³ Navithimo vyange vyakufua ngechi ua handekele navo nga vavyuvue muchili, kahandekele navo nga keti navithimo. ³⁴ Vuno omo ua kele likalyendi na vandonge ua va languinine vyoshe. ³⁵ Halitangua lije, omo chinguedhi cha hetele , ua valekele nguendi, "Tuyeni musinya lya ndonga." ³⁶ Vathile mbunga, nakuya naYesu kumo ngue mua kele-kele navo, mu vuato. Mato akuavo amushuamene. ³⁷ Kamandende lika mpundhi yakama yakatukile na mankimba akupukile muvuato, vuato muhyehi nakuvombela. ³⁸ Vuno Yesu vavenya uakele kulituthi lya vuato,na kotha endi nathakatela hantanga ali mutulo. Vandonge va munyanguimuine nakuhandeka nguavo, "Mulongithi ove chishoti chahi netu ngove tu tca"? ³⁹ Uahindukile na kuholuetha mpundhi naku handekela mema aKalungandonga, "Chivovo! chikaleho ! Litule!" Mpundhi yaholokele kulu. ⁴⁰ Ua valekele nguendi, "Vika mu kela na lyova? Nolo kanda mutcelele ndi?" ⁴¹ Vakele na lyova lyakama, valihuile vavenya, "Yiya ou nambe mpundhi na mema aKalunga vina mutava?"