¹ Yesu uendele lalo muvi Sinangonga, ha kele lyala ua livoko lya kuthithua. ² Kuakele vantu vamo va mutalele ntoma nguavo ambe amukanguitha mu litangua lya Sapalalo kulingila vamu payeleho. ³ Yesu ua lekele lyala ua kuthithua livoko nguendi, "Katuka uimane mukati kavoshe." ⁴ Keho ua lekele vantu nguendi, "Ku mashiko kuatha kupanga vyachili ha litangua lya Sapalalo ndi ku vihitha; mu kuohiela muono ndi kutciha?" Vuno voshe va holokele. ⁵ Ua talele mukati kavo na vukalu, ua kele na vuthiua omuo lya ku kola kua dhimbunge dhavo, keho ua lekele uje lyala nguendi, "Olola livoko lyove." Keho uoluele livoko lya kangukile. ⁶ Va Faliseo vatuhukile, vuathi vuathi muku tameka kulyuvua na vaka Helonde nguavo vati vakatha kumutciha. ⁷ Yesu nava ndonge vendi vayile ku Kalunga ndonga na mbunga yayingi ya vantu vamu shuamene kutunda ku Ngalileya na ku Yundeya ⁸ na vaku tunda kuYelusalema, Indumea na musinya lya Yolondau naku membo ahata ku Tile na Sindone. Mu kuvua vyuma vya pangele, mbunga ya yingi yedhile kulyendi. ⁹ Ua lekele va ndonge vamu vuahetheleko vuato vua vundende mukonda mbunga ya yingi, ku lingila vantu kechi vamu tceke. ¹⁰ Ua kanguithile va vengi, keho voshe vaje va vavalele ku dhimbunge dhavo vakele na chi dhango cha ku mushuena muhyehi linga amuhume akanguke. ¹¹ Nkalaha mpundhi yaku vihya moya mumuene, vantu va uile kumesho endi nakulila nguavo, "Ou muna Kalunga." ¹² Yesu ua lekele vantu nguendi keti vaka vyambulule. ¹³ Ua yile kumukinya nakuthana vaye va yonguele, keho vedhile kulyendi. ¹⁴ Uahanguile likumi navavali vaye valukile va postolo linga akale navo naku vatuma vatuale midhimbu. ¹⁵ Nakukala nandhili yakusheka vimpundhi vya kuvihya. ¹⁶ Uahanguile likumi navavali: Simoni, yalukile Petulu; ¹⁷ Tyango muna Sembendeo, na Youano munayina ya Tyango, uje yalukile Mbonangesi, kutumbula, vana va chidhimo; ¹⁸ na Enduleu, Filipu, Mbatolomeu, Mateu, Tomasi,Tyango mona Alufeu, Tandeusa, Simoni muka Zelote, ¹⁹ na Yundasa Yisakaliota, uje a kamuenda vungungu. ²⁰ Keho uayile kuimbo, mbunga yedhile kumo lalo, na kumbolo kovayilile. ²¹ Mova viuvuile vavushoko vuendi, vayile vaka muvindike, vahandekele nguavo, 'nashevuka. ²² Vaka mathona vaje vatundile ku Yelusalema vahandekele nguavo, ''ou uakala na Mbelesembulu'' muene ua vimpundhi viakuhihya yikeyo yapangetha mukusheka vimpundhi via kuvihya.'' ²³ Yesu uava thanenene na kuvatela vithimo, ''Vati Satana atha kusheka Satana mukuavo? ²⁴ Ambe vumuene vuka litepa avuo vavenya, vumuene ovuo kovu kemana. ²⁵ Ambe njivo yilitepa ayo vavenya, njivo oyo koyi kemana. ²⁶ Ambe Satana aliluitha endi vavenya alitepa, katha lalo kuimana, vunoni alenga. ²⁷ Na umo uahi atha kukovela minjivo yalyala uandhili aka puanje vufuko vuendi ajeneke kuvanga kukuta lyala uje wandhili mbangelo, oshe hani apuanja njivo ije. ²⁸ Vuchili nji mileka, mulonga uoshe ua vana vavantu vaka uethela, nambe voshe vaka kumushahula naku muhandeka muaku vihya, ²⁹ vunoni nkala uoshe ashahula mpundhi yakulela kaka uana kuechela, vunoni ali namulonga ua miaka yoshe''. ³⁰ Yesu uavi tumbuile evi mukonda va handekele nguavo, ''ali na mpundhi yakuvihya.'' ³¹ Keho vayina na vakuenje vendi vedhile vemana hanja. Vamu tuminine, vaka muthane. ³² Mbunga yamu dhengelekela yamuleka nguayo, ''vanoko nava munanoko hovali hanja, vaku thetela.'' ³³ Ua vatavele, ''Yiya vanana nava munanana?'' ³⁴ Ua talele muli ava vatumamene vamuthengelekele uahandekele nguendi, ''Tala, ava vakevo vanana nava munanana! ³⁵ Uoshe apanga chidhango cha Kalunga, yikeye munanana ua lyala na munanana ua mukentu, na vanana.''