¹ Muje mua hilukile Yesu ku Kapenama munima ya matangua a mandende, vovuile nguavo yikeye ali hembo. ² Vavengi vakungulukile kukua kele lalo njenjo kuje, nambe vene ha cikolo, na kuambulula majui. ³ Keho vamala vamo vedhile kuli yikeye vaje vanehele lyala umo uakele na vulema vua kayekele; vantu va uana va muambatele. ⁴ Omo ku vathele kuheta muhyehi mukonda lya mbunga, va yambuluile helu lya njivo yakele Yesu, muva hakele katuntu, vathothele cishenge civa langekele muka kayekele. ⁵ Muamuene kutcelela kuavo, Yesu ua lekele muka kayekele nguendi, "Munange, mulonga uove vana uethela. ⁶ Na vaka kuthona mathona va tumamene kuye, va lihuile muvimbunge vyavo nguavo, ⁷ "Vati muntu ou a handeka mungila eyi? Nashaula! Ou echela mulonga Kalunga lika?" ⁸ Vuathi-vuathi Yesu ua vidhivukile mu mpundhi yendi viye viva thinganiekele avo vavenya. Ua valekele nguendi, "Mukonda lya vika muthinganiekela evi muvimbunge vyeni? ⁹ Chika cha chathi kukuanya namu ka kayekele, "Mulonga uove vana uethela" ndi ku kuanya "Katuka , ambata chiyalo chove uende"? ¹⁰ Vunoni linga mudhivuke ngueni muna muntu ali na mpoko hano hantci ya kuechela mulonga," Ua lekele muka kayekele , ¹¹ "Ange nji kuleka nguange katuka, ambata chiyalo coye, uye kunjivo yove." ¹² Muka kayekele ua katukile vuathi vuathi, ua ambatele chiyalo chendi ua tuhukile munjivo kumesho a voshe, va komokele vahanene kushangana kuli Kalunga, va kuanyene nguavo, "Nolo kanda tu mone chuma chakufua ngechi." ¹³ Endi ua tuhukile lalo ua yile ku mukulo ua lishali. Na mbunga yoshe yamushuamene, ua valongethele. ¹⁴ Endi mua hitile kumukulo uamuene Levi muna Alufeu natumama kunjivo ya kufuetethela lithimu ua mulekele nguendi, "Nji shuame, endi ua katukile, uamushuamene ¹⁵ Yesu ua lile lijumbu ku njivo ya Levi, nava vengi vaka kufuetetha lithimu, na vaka milonga va lile mumo nendi na vandonge vendi, haje ha kele va vengi va mu shuamene. ¹⁶ Mukemo vaka kuthona vaje va puile vafaliseo vamuene Yesu alya mumo na vaka milonga na vaka kufuetetha lithimu, va kuanyene na vandonge nguavo, "Mukonda lyavika yikeye ue kulila na vaka kufuetetha lithimju na vaka milonga?" ¹⁷ Omuo Jesu uovuile evi ua valekele nguendi, "Vantu vaje vali namivila ya vukangule kuvathetela chimbanda, vunoni, vaka kuvavala lika. Ange kunjedhile muku thana vaka vuchili vunoni vaka milonga." ¹⁸ Ngoco vandonge va Youano na va Faliseo, vali kelele kulya muku dhiliya. vantu vamo vamulekele nguavo, "Mukonda lya vika vandonge vaYouano na vandonge va va Faliseo veku likela kulya vunoni vandonge vove kuve kulikela kulya?" ¹⁹ Yesu ua valekele nguendi, "chitava vaka kuija ku chilika chavulo kudhiliya muntcimbu vavenya vulo a chili navo?" Muntcimbu va chili na vavenya vulo ku va dhiliya. ²⁰ Vunoni matangua akeja muva katunditha vavenya vulo kuli yavo, namu matangua oo, vaka likela kulya. ²¹ Na umo uahi a tongela chivando cha ntanga ya yiha ku chidhala cha laja. Nga ngocho, chivando chacho chi ka tavukila haje vene hali uanena cha laja, kutavuka kuacho ku ka tuvakanena. ²² Na umo uahi ahaka vinyu vya viha mu njeke ya chikanda ya laja, nga ngoco vinyu vya viha vika tavula vikanda, na vinyu na njeke vioshe vika dhimbala. Te nga vinyu vya viha ku vihaka mu njeke ya yiha. ²³ Ha litangua lya Sapalalo Yesu ua hitile kumahia a vimbuto, na vandonge vendi va shangumukile ku tambula mitue ya vimbuto valile. ²⁴ Va Faliseo va mulekele nguavo, "Tala, mukonda lyavika vapanga vije kuva tavethele ku vipanga mu litangua lia Sapalalo?" ²⁵ Yesu ua valekele nguendi, "Nolo kanda mutande nguavo, Ndaviti ua vilinge muje mua jenekele vya kulya na muje uo vuile njala. yikeye na vantu vaje vakele nendi?" ²⁶ Mukemuo va yile ku njivo ya Kalunga, muje Ambiata ua kele sasendote ua kama, ua lile vimbolo vya munjivo ya Kalunga vije kuva vitavethelele ku vilya nkala muntu, kuvanga sasendote ua kama, yikeye ua haneneko lalo kuli vaje vakele mumo nendi. ²⁷ Yesu uahandekele nguendi, "Sapalalo vayi pangelele mukonda lya muntu, Kuva pangelele muntu mukonda lya Sapalalo. ²⁸ Mukemuo muna muntu yikeye Muene nambe vene ku Sapalalo yikeye Muene."