¹ Chimenemene cha kama, Sasendote ua kama uali uanene hamo na va kuluntu na vaka mathona na chiyongelo cha vaYundeya. Va kuatele Yesu na ku mu tuala. va mu hanene kuli Pilatu. ² Pilatu ua muihuile nguendi, "Yove muene ua vaYundeya ndi?" Ua mu limbuluile nguendi, "Omo vene mu una handeka." ³ vaSasendote vakama va mu vangeyele vyuma vya vingi. ⁴ Pilatu ua muihuile lalo nguendi, "Ko u limbulula ko ndi? Una mono vyuma vya vingi evi vyo va ku vangeya!" ⁵ Vuno Yesu ka limbuluile ko lalo kuli Pilatu, na Pilatu ua komokele. ⁶ Keho hantcimbu ya chilika, Pilatu ue chelele umo uamu kamenga ou uva lombele vantu linga va mu tuhule, ⁷ kua kele lyala uva tumbuile nguavo Mbalambasa mu kamenga na vamo vaka kutcihya vantu muku liluitha. ⁸ Mbunga yedhile kuli Pilatu nakumu lomba linga ava lingile ngue muane kulinga ku laya. ⁹ Pilatu ua va kumbuluile nguendi, "Mutonda nje thele muene ua vaYunda?" ¹⁰ Ua vidhivukile nguendi muomu lya chipululu chavo chamuene uava sasendote ua vahanene Yesu. ¹¹ Vunoni muene ua vaSasendote ua yonguethele mbunga linga va tambakane nguavo Mbalanambasa va muethele aye. ¹² Pilatu ua va limbuluile keho ua va leka nguendi, "Vika nji panga nou muene ua vaYundeya?" ¹³ Vantu va tambakanene lalo nguavo, "Mu kulikeni!" ¹⁴ Pilatu ua vehuile nguendi, "Vyaku vihya vika na panga?" Vuno vakevo vatambakanene muakamakama nguavo, "Mukulikeni!" ¹⁵ Pilatu ua yonguele kupuithamo viya yonguele mbunga, keho uechelele Mbalambasa. Ua kutile Yesu na kumu hana linga va kamu kulike. ¹⁶ Masualale va mu tualele mu kati ka chifuti (munjivo ya ndhango ya kupanguila), Va thanene mbunga yoshe ya masualale. ¹⁷ Va mu dhikile chidhala cha kuvenguluka na kumu tuika nkata ya manja. ¹⁸ Va shangumukile ku mushangala na ku handeka nguavo, "Ovoke, Muene uava Yundeya!" ¹⁹ Vamu pupile na lihongo kumutue na kumu yekuila mate. Va tcikile ku mavuli avo na ku kulumana kumesho endi. ²⁰ Va mu thembuluile, vamu shuluile chithala chakuvenguluka vamu dhika chendi vavenya, keho vamu tuala linga vaka mu kulike. ²¹ Lyala umo, ua kuthana Simoni ua kuSilene, uedhile kutunda mu chifuti (yikeye yishe ya Elesandela na Lufu), vamu kakateya kuambata chiti cha kulindakana. ²² Masualale va nehele Yesu ku muhela uva thanene nguavo Ngolongota (una kulangunuka "Muhela ua vikola"). ²³ Va mu hanene vinyu vya ku haka madhi a Mile vuno kanuine ko. ²⁴ Va mu kulikile naku tavodhola vidhala vyendi na kulyavadhela vyo ha kati ka masualale. ²⁵ Yapuile uola yamu chitatu hova mu kulikile. ²⁶ Vathonene mu kumuetha vyana vihitha nguavo, "Muene ua vaYundeya." ²⁷ Vamu kulikile kumo na vidhi vivali, umo ku chilyo chendi na mukuavo ku chimoshue. Mathona a laja ku a kele na Mako 15:28, ²⁸ Mathona a puilemo nguao, 'Va mutandele kumo nava ka kuvihya,' ²⁹ Vaye voshe va hitile kungila va mu yolele, va puka kumitue na kuhandeka nguavo, " Ehe! Yove ua kuvihitha tembele na ku yitunga mu matangua atatu, ³⁰ lyamene ove vavenya ushuluke ku chiti!" ³¹ Ngue muye vene mova mu thembuluile vakuluntu va vasasendote mu mbunga yavo, kumo na vaka mathona nguavo, "Uamenene vakuavo, vuno na hono kulyamena endi vavenya. ³² Kilistu, Muene ua Isaleli, ngechi vene a shuluke kuchiti, linga tuvi mone naku vi tava." Vaye vova mu kulikilile kumo navo vamu yolele. ³³ Ha ntcimbu ya muchitanu na yimo, mithithi uedhile mu chifuti choshe noho ku ntcimbu ya muchitanu na yiuana. ³⁴ Ha ntcimbu ya mu chitanu na yimo Yesu ua lilile na lijui lya kama, "Eloyi, Eloyi , lama sabachthani?" ku langunuka nguayo, "Kalunga kange, Kalunga kange, vika una nji thila. ³⁵ Vamo vakele ho va muvuile mua handekele keho va mu yolele nguavo, "Taleni, youa thana Elia." ³⁶ Umo ua shatukile, ua hakele vinyu vya ku uauata ku chishambo, na ku vi haka kulihongo, keho ua muhanene linga a nue. Keho lyala umo ua handekele nguendi, "Lelo tu tala nga Elia enja linga a ku mu shuluithe ko. ³⁷ Yesu ua lilile na lijui lya kama keho mukemo mua tcile. ³⁸ Ntanga ya mutembele ya tavukile hakati kutunda kuilu nahantci. ³⁹ Keho mukuluntu ua masualale uye uemanene kutala kuli Yesu ua muene mua tcile mungila ya chifua chiye, ua handekele nguendi, "Kuma chili lyala ou Muna Kalunga." ⁴⁰ Kua kele lalo vakentu vamu muenenene hale. Hakati kavo hakele Maliya Mandalena, Maliya (vayina ya Tiango shongo ya Yose), na Salome. ⁴¹ Muye mua kele muNgalileya vamu shuamene na kumu pangela. Na vakentu vavengi vedhile nendi kuYelusalema. ⁴² Mo cha hetele chinguedhi, mukonda lya kele litangua lya kuli vuahethela, likelyo, litangua lyakele kulutue lua Sapalalo. ⁴³ Yosefe uaku Alimateya uedhile. Ua kele umo uava kuluntu vakathingimiko va ndhango uye uatumamenene vumuene vua Kalunga. Ua yile kuli Pilatu linga aka lombe muvila ua Yesu. ⁴⁴ Pilatu ua komokele mukuvua nguavo Yesu na tci, ua thanene mukuluntu ua masualale na ku muihula nga Yesu natci. ⁴⁵ Pilatu muo vuile mukuluntu ua masualale amu leka nguendi Yesu natci, ua hanene muvila ua Yesu kuli Yosefe. ⁴⁶ Yosefe ua landele ntanga ya chili. Uamu tambuile ku chiti chaku lindakana uamu dhengelele hantanga na kumulangeka mu mbumbo yova hinda mu livue. ⁴⁷ Malia Mandalena na Malia vayina ya Yose va muene muhela ou uova shitikile Yesu.