¹ Kua kele matangua avali a kuheta Pasovala na chilika cha mbolo ya kujeneka kuhaka hingo. Vasasendote vakama na vaka kuthona mathona vali yongele nguavo vati vatha ku kuata Yesu linga va mu ntcihye. ² Mukonda va handekele nguavo, "Keti mulitangua lya chilika, kuteuetha muyoyo ukatuka mukati ka vantu." ³ Mua kele Yesu mu Mbetaniya ku njivo ya Simoni muka vingondue, muku tumama ku chilyalya chakulila, mukentu uedhile kuli yikeye na ntadhi . Uambatele ntadhi ya vuma ya madhi a ndando yakama, madhi a sende yachili yiva thana nandi. ⁴ Vuno kua kele vamo va kele na vukalu. Va li handekethele nguavo, "Mukonda vika a vihithila madhi aa? ⁵ Madhi aa ana vuahela ku alandetha kundando yakama kutuvakana vihita vitatu naku vihana ku vihutu.'' Keho Va mu payele. ⁶ Vuno Yesu ua valekele nguendi, "Muetheleni. Vika mumu hanena vishoti? Nanji pangela vyuma vya kuvuaha. ⁷ Ntcimbu yoshe mua kala na vihutu, keho hoshe homu yonguela mu ka va pengela vyo lika, vuno ku muka kala nange ntcimbu yoshe. ⁸ Napanga evi vya natha kupanga. Na vuavuetha muvila uange muku u shitika. ⁹ Chili njimi leka nguange, kuje kuoshe kuva kambulula meji a chili mu lifuti lyoshe, evi vyana panga ou mukentu vaka vi handeka, nakumu vuluka." ¹⁰ Keho Yundasa Yishakalyoto umo ua vandonge likumi na vavali, ua yile ku vakuluntu va vasasendote linga a ka mukundike kuli vakevo. ¹¹ Vakuluntu va vasasendote muva vyuvuile , va kele na lyango naku mu tceleletha ku mu hana vimbongo. Ua shangumukile kuthetela ngila yaku muhana kuli vakevo. ¹² Mulitangua lya kulivanga lya mbolo ya kuyeneka hingo, mova kombelele muna injui ua Pasovala, vandonge vendi va mu lekele nguavo, "Kuiko utuyonguela kuya linga tu ka vuahethe, linga uathe kulya mbolo ya Pasavala?" ¹³ Ua tumine va ndonge vendi va vali keho ua handeka navo nguendi, "Yeni mbongi, muje mua ka mi uana lyala na mbata njava yamema. keho kamushuameni. ¹⁴ Muye mua ka kovela kunjivo, kamu shuameni na kuhandeka na vavenya njivo ngueni, 'Mulongithi nguendi, "Kuiko kuli njivo ya vangendhi kuye kunji ka lila Pasovala na vandonge vange?" ¹⁵ Aka mi leketha konda yakama ya kuilu yiye yo vana vua hetha. Lingeni mukatu vua yethele yo. ¹⁶ Vandonge va tundileho nakuya ku mbongi. Vaka uanene vyoshe ngue muava lekele, keho vaka vuahethele mbolo ya Pasovala. ¹⁷ Mo cha hetele chinguedhi, uedhile na vaye likumi na vavali. ¹⁸ Muye mova tumamene ku chilyalya na kulya, Yesu uava lekele nguendi, "Vuchili njimileka nguange, umo ueni ali nakulya hamo nange yikeye a ka njenda vungungu." ¹⁹ Voshe va kele va vavalele kudhimbunge dhyavo, nkala uoshe ua muihuile nguendi, "yange ndi?" ²⁰ Yesu ua valimbuluile naku handeka navo nguendi, "Umo ua mulikumi na vavali, uye yi nji kalya nendi lilonga limo. ²¹ Mukonda Muna Muntu aka ya ngue muvana thoneka hali yendi kumukanda. Ngongo ya uye a kenda muna muntu vungungu. Chili kulutue nga kathemukile." ²² Omo vakele nakulya, Yesu ua tambuile mbolo ua yi vedhikithile na ku yivanyuna na kuva hanayo, ua handekele nguendi, "Tambuleni. Ou ukeuo muvila uange." ²³ Ua tambuile nganja, naku yi ve dhikitha nakuva hana yo, voshe va nuine mu nganja yije. ²⁴ Ua valekele nguendi, "Aa akeo maninga ange a mbalumukila va vengi. ²⁵ Vuchili nji mileka nguange, kunji kanu lalo ku vushuka ovu vua vinyu kuvanga litangua linji kanua vinyu vya vihya mu vumuene vua Kalunga." ²⁶ Mo vamanene kuimba lidhina,vatuhukile nakuya ku mukinya ua Oliveta. ²⁷ Yesu ua handekele nguendi, "Muva voshe muka mukaua, vavi thoneka, "Njika pupa kanyungi na vampanga vaka lishandoka." ²⁸ Vuno kunima omo njina shituka nji kaya kulutue lueni ku Ngalileya. ²⁹ Petulu nguendi, "Nambe nga vakuetu vaka ua, ange njika kushuama." ³⁰ Yesu ua mulekele nguendi, "Vuchili njiku leka, lelo- vene vutciki vuno- kulutue ndemba a ka tambeke uka njivyana lutatu." ³¹ Vuno Petulu nguendi, "Nga a nge njina fuila kutca nove, kunji ka kuvyana." Voshe valyuvua thanene nguli yimo. ³² Vedhile kumuhela ua kuluka Ngetesemane Yesu ua handekele na vandonge vendi nguendi, "Tumameni hano ange njiya mu kulombela." ³³ Ua hituile Petulu, na Tiango, na Youano hamo nendi na kushangumuka kuvua vishoti navithinganyeka vya vingi. ³⁴ Ua valekele nguendi, "Muono uange una shulu na vuthiua , nambe mukeheta ha kutca. Thaleni hano naku vingila." ³⁵ Mukuya kulutue, Yesu ua uile hantci naku lombela nguendi nga chi tava ntcimbu yihite hali yikeye. ³⁶ Ua handekele nguendi, "Abba, Tata vyuma vyoshe vya vyathi hali yove. Tambula nganja eyi kulyange. Keti chiyongola change vuno ngue munayongola yove." ³⁷ Ua hilukile uava uanene vana ndanda, Ua handekele na Petulu nguendi, "Simoni, una ndanda?" Ko uathele kuvingila nambe ntcimbu yimo ndi? ³⁸ Vingileni na kulombela, kuteuetha keti muka kovele mu vyetheko. mpundhi ya ku jela yiyongola vuno muvila uange ndhili yahimo. ³⁹ Keho ua hilukile lalo mu kulombela, naku lomba medhi aku lifua ngue aa livangele kuhandeka. ⁴⁰ Mua hilukile lalo, ua ku vauanene vana ndanda, namesho avo alemene. Kuvadhivukile vika vamu leka. ⁴¹ Uedhile luamu chitatu na kuvaleka nguendi, "Kanda muna ndanda na ku huimitha? Vinapu mo! ntcimbu yina hete. Taleni! Muna Muntu va na muende vungungu kumu hana mu mavoko a vaka ku mutcihya. ⁴² Hindukeni, Katukeni tuyeni. Taleni, uye anjenda vungungu hamu hamuhyehi ali nahete. ⁴³ Mo vayile muku handeka Yundasa umo ndonge ua mu likumi nava vali ua hetele na mbunga yendele nayo na myele yavo na vivulo, kutundilila kuva sasendote vakama, vaka mathona, na vakuluntu. ⁴⁴ Keho muka kumuenda vungungu ua va hanene chileketho, naku handeka nguendi, "Uye yi nji katcemba yikeye lyalala ouo vene. Kamukuateni na kumu hanaku masualale va mu takamethe. ⁴⁵ Yundasa mua hetele , haye vene uali uanene na Yesu naku handeka nguendi, "Lambi," kumo nakumu tcemba. ⁴⁶ Keho va mu kambekele mavoko nakumukuata. ⁴⁷ Keho umo ua vandonge ue manene ua shomuene muele uendi mu ndalo yauo naku vatulako litui lya ngamba ua vakuluntu uavo, ⁴⁸ Yesu uavalekele nguendi, "Vati muija kulyange ngue mu ku kuata chindhi, na myele, navi vulo nakunji kuata?" ⁴⁹ Matangua o nja kele neni nakulongetha mu tembele, kumua nji kuatele. Vuno vino vi puithemo mathona. ⁵⁰ Na voshe va kele na Yesu va teuele nakumutha. ⁵¹ Mukuenje ua dhalele vidhala viye vyali vuvile ua shuamene Yesu. Ngechi vamala vaje vamu kuatele. ⁵² Ua thile vidhala vyendi ua shatukile mishenga shenga. ⁵³ Vatualele Yesu kuka sasendote uakama. Vakungulukile nendi navoshe vakuluntu vavasasendote, na vantuama lutue, na vaka kuthona. ⁵⁴ Keho Petulu uamu shuamene uamu kelelele hale, na njivo ya kupanguila milonga ya kaSasendote uakama. Ua tumamene mukati kavaka ku takametha, vaye votele tuhya. ⁵⁵ Vuno vakuluntu vava sasenndote na nava kuluntu voshe vava Yunda vathetelele vumbangi vua Yesu kulingila vamu tcihe. vuno kovavu uanene. ⁵⁶ Vavengi vanehele vu mbangi vua vishaki ku lyedndi, vuno vu mbangi vuavo kovua li tombuele. ⁵⁷ Vamo va katukile naku hana vumbangi vua vishaki ku lyendi, va handekele nguavo, ⁵⁸ "Tua muvuile a handeka nguendi, 'Njika lundumuna yino tembele yova tunga na mavoko, Njika tunga yikuavo mu matangua atatu vuno keti yakutunga nama voko.'" ⁵⁹ Chili vene nambe vumbangi vuavo kovua litombuele. ⁶⁰ Kasasendote uakama vakatukile mukati kavo na kuihula Yesu nguendi, "Ka uethi na lijui lyaku kumbululako? " Vumbangi muka vuva hana vamala ava kumesho ove? " ⁶¹ Vuno ua holokele kulu ka taveleko. Ka Sasendote uakama ua muihuile lalo nguendi, "Yove Kilistu, Muna uje ua kuvedhuka? " ⁶² Yesu nguendi, "Yange vene; mu kamona Muna Muntu muaka tumama ku livoko lya chilyo lya ndhili na kuija na mashela a muilu." ⁶³ Mukuluntu uava sasendote va tavuile vidhala vyendi na kuhandeka nguendi, "Kanda tuthetela lalo dhimbangi ? ⁶⁴ Munovu kushaula kuendi. Vika muna tokolaho? " Voshe vamu uanenene mulonga nguavo na fuila ku mutcihya. ⁶⁵ Vamo vashangumukile kumu yekuila mate naku mufuika ku chihanga chendi naku mupupa vamu leka nguao, Polofeta! Muka ku takametha uamu tambuile naku mupupa. ⁶⁶ Tee Petulu ali kuintci lya njivo yaku panguila milonga, umo ua vangamba ua vakuluntu vava sasendote ua mukentu uedhile ku lyendi. ⁶⁷ Ua muene Petulu ota tuhya , muna mukentu uamu talele ntoma naku handeka nguendi, "Nove umo ua kele na Yesu uaku Nazaleta." ⁶⁸ Vuno Petulu uali vyanene ua handekele nguendi, "Ange kunjidhivuka naku vuithitha nguange vika uhandeka." Keho ua tuhukile hanja lya chikolo cha limbo. ⁶⁹ Vuno ngamba ua mukentu muamu muene ua shangumukile lalo kuhandeka nguendi kulyava voshe va nemana oho, Ou lyala nendi umo uavo! '' ⁷⁰ Vuno Petulu uali vyanene lalo. kantcimbu lika vaje vemanene kuje va handekele kuli Petulu nguavo, ''Chili nove umo uavo, nove umo uava Ngalileya.'' ⁷¹ Vuno ua shangumukile kuli thinga naku livyana ua handekele nguendi, "Ange konji mudhivuka ou lyala yomu tumbula." ⁷² Ndemba haye vene ua tambekele ntcimbu yamu chivali. Keho Petulu ua vulukile majui aa mulekele Yesu nguendi, "Kututue ndemba a tambeke luvali, uka nji vyana lutatu." Ua uililile hantci naku lila.