¹ Muye mua tuhukile Yesu mutembele, ndonge uendi umo uahandekele nendi nguendi, "Mulongithi, tala ku mavue a kukomoketha na makuma a kukomouetha." ² Yikeye nguendi, "Una mono aa makuma a kama?" Nalimo livue lyahi lika thala helu lya likuavo, liye kuli ka uila hantci. ³ Muye mua tumamene ku mukinya ua Oliveta ua hata ku tembele, Petulu, na Tiango, na Youano na Anduleu, va muihuile muvushueke nguavo, ⁴ "Tuleke, ntcimbu yika vika yomboloka vyuma evi? Chimuetho chika tuka mona nguetu vyuma vyoshe evi vika yomboloka?" ⁵ Yesu ua shangumukile kuvaleka nguendi, "Dhangameni keti umo ami shevuithe. ⁶ Vavengi vakeja mu lidhina lyange nguavo, 'Yange vene,' naku dhimbaletha vavengi. ⁷ Mo mukovua vindhita na manguavo keti muka kale navishoti; vyuma evi vina pande kukayomboloka, vuno kulenga cha chifuti nolo. ⁸ Chifuti chika katukila chifuti chikuavo na kuliluitha, na vumuene kuliluitha na vumuene vu kuavo. Kukala ku jaja cha livu ku mihela yayingi, na njala. Ovu vukapua vushangumukilo vua tuyando. ⁹ "Vingileni. Va kamituala kuvi ndhango, eni lalo vaka mipupa mu vithinangonga. Mukemana kulutue lua vanguvulu na vimyene omu yange, ngue vukaleho kuli vakevo. ¹⁰ Vuno mudhimbu una pande ku uambulula ku vantu voshe. ¹¹ Omuo muva ka mikuata naku mi hana, keti muka lishoshomue ngueni vika muka handeka. Ku ntcimbu oyo vene, ovyo vimu ka handeka vaka mi hana vyo; Keti yeni muka handeka, vuno Mpundhi Yakujela. ¹² Muntu na munayina vaka lituala ku kuli tcihya, yishe na mona.Vanike vaka katula vidhindo na vakuluntu vavo lalo vika valingitha vakali tcihye. ¹³ Eni vaka mi dhinda mukonda lya lidhina lyange. Vuno uoshe uye a kanyama naku kumanethela a kovoka. ¹⁴ ''Mu muka mona vidhila na vidhilika vi nemana haye kuvya vuahelele kuimana," (muka kutanda ovueko) ''Echeleni vaje vali mu Yundeya vateuele ku mikinya, ¹⁵ Keti muka tavethele uje ali helu lya njivo linga aka shuluke kuya munjivo nambe aka tambule chimo cha munjivo, ¹⁶ Uye aka kala mulihya keti aka hiluke mukua kushaka vidhala vyendi. ¹⁷ Vuno ngongo ya vaye vana vavo kanda vachili mu memo, na vaje vali na kunyamueka kumavele kumatangua oo. ¹⁸ Lombeni kuteua keti viyomboloke muchithika. ¹⁹ Mukonda aka kala matangua a vitanga vyakama, aje ka keleko lumo kutameka kuku shangumuka, kuje Kalunga ua pangele chifuti, noho lelo, vyahi, kuvika kala ko lalo. ²⁰ Kuvanga Muene mpano uehihitha matangua, na umo uahi a kovoka. Vuno mukonda lya kuhangula, kuli vaye va hangula, nehihitha matangua. ²¹ Vuno nga umo a mileka nguendi, 'Taleni, Kilistu yauno!' ndi nguendi 'Taleni, yauje haye!' keti muka tave. ²² Mukonda Va Kilistu va vishaki na vapolofeto va vishaki vaka jomboloka va ka hana vimuetho na vikomoketho linga va shevuithe, nga vi tava, nambe vaye va vanahangula. ²³ Vingileni! Njina mileke vyo vyoshe kulutue lua ntcimbu. ²⁴ "Vuno kunima ya tuyando ku matangua aje, 'litangua lika dhivala, ngonde kuyikahana myedhi yayo. ²⁵ vintangantanga vikaua kuilu, nandhili ya muilu yika linenenga. ²⁶ Keho vaka mona Muna Muntu a ka shuluka hamashelua nandhili yakama na vumpahu. ²⁷ Mukemo honi aka tuma tungelu tuendi keho aka kungiya hamo vaye vendi vahanguile kutundilila kumitambela yiuana, kushangumukila kuvinshongo vya livu na kuvinshongo vya lilu. ²⁸ Lilongetheni mana ku chiti cha mukuyu. mintango muyi tontola na kutuikilila vimaho, muna dhivuka ngueni ntondue yili hamuhyehi. ²⁹ Mukemo lalo, nga muka mona vyuma evi vijomboloka, dhivukeni ngueni yikeye ali hamuhyehi, shokeni ku vikolo. ³⁰ Chili nji mileka nguange, limo eli kuli ka hiti kuvanga vyuma evi vyoshe vinapu mo. ³¹ Lilu na lifuti vi ka lenga, vuno liji lyange kuli ka lenge. ³² Vuno haku kutuala ku litangua olyo ndi ntcimbu oyo, na umo uahi a vi dhivuka, nambe tungelu va muilu, nambe Mona, kuvanga Yishe lika. ³³ "Dhangameni! Vingileni, mukonda kumu dhivuka ntcimbu ya cho. ³⁴ Vina lifu ngue lyala a ya vungendhi_a tha njivo yendi na kuhaka mo vangamba vendi muku takametha njivo, nkala uoshe na vipanga vyendi, nakuishika muka kutakametha keti a kothe. ³⁵ Ngocho honi dhangameni mukonda kumu dhivuka ntcimbu ya kenja vavenya njivo kuimbo; kuatha vikale ku chinguedhi, mukati ka vuntciki, ku vindemba, ndi ku chimene. ³⁶ Nga a keja thithumuku, keti a kumi uane muna ndanda. ³⁷ Evi vinji handeka neni nji vi handekela voshe: Dhangameni!''