¹ Ngechi Yesu ua shangumukile kulongetha vandonge vendi na vithimo. Nguendi, "Mumala ua kele na lihya lya vinyu, ua dhengelekele ko, na kuhinda china cha ku kenchekela vinyu. Ua tungile njivo ya kulaha ya vuntombi uafuithile lihya lya vinyu kuvantu va ka kulima vinyu. Ngechi uayile vungendhi. ² Hantcimbu ya chili, ua tumine ngamba ku li muka kulima vinyu ku kashaka vushuka vua vinyu vua mu lihya. ³ Vuno vamu tambuile, vamu pupupile, naku mutuma a hiluke mavoko voko. ⁴ Lalo ua tumako ngamba mukuavo, ngechi vaka mutua mbandu mu mutue naku mu thaka vuthempulule. ⁵ Ua tumako mukuavo, ou va ka mutcihile. Vavengi vava thakele mungila ije vene, vamo ku vapupa umba vamo ku vatcihya. ⁶ Ua thaleleko muntu umo uakutuma, mona ua ku muya kumbunge. Yikeye ua kele ua kumanetha kutuma kulyavo. Ua handekele nguendi, 'Vaka muthingimika munange.' ⁷ "Vuno vaka kulima va vinyu valyuvuile nguavo, 'Ou yikeye suana.' Ijeni, tumu tciheni keho na vusuana vu ka kala vuetu.' ⁸ Vamu kuatele, na kumutcihya na kumumbila hanja ya lihya lya vinyu. ⁹ Keho, vika ua pangeleko va venya lihya? Yikeje uedhile na kuvihitha vaka kulima vynyu nakuhana lihya ku vakuavo. ¹⁰ Komua utandele mukanda ou? 'Livue lyo va vyanene vaka kutunga vana lipanga likale livue lya muvimbango. ¹¹ Evi vya tunda kuli Kalunga vikevyo vikomoketho mu mesho etu." ¹² Kunima yevi vantuama lutue vava Yunda va yonguele ngila ya ku kuata Yesu mukonda vovuile nguavo ua handekele chithimo chiye cha kulyavo. Vuno vovuile lyova na mbunga. Ngechi va muethelele hoshe vayile. ¹³ Keho ua tumako va Faliseu na vakaHelonde kuli Yakeye naku muetheka vamukuate na vinguli. ¹⁴ Muva kuhetele vamu lekele nguavo, "Mulongithi, tuna dhivuka nguavo ku ua kele na chishoti na vithinganyeka na vihandeka vya vantu kuli yove, ku ueku hangula ha vantu. Vuchili ue kulongetha ngila ya Kalunga. Chitava kufueta lithimu kuli Sezale ndi kuahi?" ¹⁵ Vuno Yesu ua dhivukile vishaki vyavo naku valeka nguendi, "Vika muna njethekela?"Nji neheleniko vimbongo nji vitale." ¹⁶ Yesu va mu neheleleko yimo mbongo. Ua vehuile nguendi, "Chihanga na lidhina lyeya lili hano?" Va limbuilile nguavo "Cha Sezale." ¹⁷ Yesu nguendi, "Haneni kuli Sezale vije vina mufuila, naku hana Kalunga vije vina mufuila" Va komokele ku medhi aa. ¹⁸ Kutunda haye va Sendusau, vaye va tava nguavo kukua kele kushituka vedhile kuli Yesu naku muihula, nguavo, ¹⁹ "Mulongithi, Mosesa ua thonekele nguendi, 'Nga mumala na tcitha nakutha mukentu uendi, uye ka kele na munike, uye mumala a hinge mukentu, naku lela mbuto ya mu nayina." ²⁰ Kua kele vantu na mu nayina vatanu nava vali; ua kulivanga uambatele mukentu ngechi ua tcile, ka thile munike. ²¹ Ua mu chivali ua tambuile uye mukentu naku muambata nendi ngechi ua tcile nendi ka thile munike. Ua mu chitatu nendi lalo. ²² Voshe va mala vatanu na vivali kuva thileho vanike. Mukumanetha mukentu ua tcile. ²³ Muku shituka, mukentu ueya aka kala? Va munayina vatanu nava vali voshe va muambatele." ²⁴ Yesu nguendi, "Eyi yikeyo konda yo mua shevukila, mukonda komudhivuka mathona nambe ndhili ya Kalunga? ²⁵ Nga va shituka ku kukutca, kova kambata ndi va uane vulo, vuno vaka kala tungelu muilu. ²⁶ Vuno kutuala ku vatci vaye va vakashituka, kumua tandele mumukanda ua Mosesa, muvue vya chihumbu, muye Kalunga uahandekele nendi nguendi, 'Yange Kalunga ua Avilahama na kalunga ua Isaka na Kalunga ua Yakomba'? ²⁷ Endi keti Kalunga ua vaka kutca, vuno ua vaye va muono. Eni muna yomboka mungila." ²⁸ Umo ua vaka mathona uedhile nakuvua viye vyo vali thikuile; ua muene Yesu uava lekele mua chili. Ua vehuile nguendi, "Lijui lika lya Meshiko lya tuvakana akuavo oshe?". ²⁹ Yesu ua valimbuilile nguendi, " Lijui lya tuvakana a kuavo likelyo, 'Tolilileni vaYisaleli, Muene uetu Kalunga, Muene umo lika. ³⁰ Unathe kuyongola Muene Kalunga kove na mbunge yove yoshe, na muono uove uoshe, na mana ove oshe, nandhili yove yoshe.' ³¹ Lyamu chivali eli, 'Uka yongola mukueni ngue mo ua liyongola ove vavenya.' Lyahi lishiko likuavo lya kutuvakana aa. ³² Keho muka mathona ua taveleko nguendi, "Muachili, Mulongithi! una handeka nguove Kalunga umolika, uahi ueka vuno Yakeye lika. ³³ Kumu yongola nambunge yoshe na mana oshe na ndhili yoshe, nakuyongola mukueni ngue mo ualiyongola ove vavenya, evi vikevyo vya tuvakana vyoshe vya vikombelelo vya kutcimika." ³⁴ Yesu mua muene na handeka na mana, ua mulekele nguendi, "Ove keti hale uli na vumuene vua Kalunga, Keho uahi lalo uathele kumuihula Yesu. ³⁵ Yesu muntcimbu yiye alongethele mu mihela ya tembele, ua handekele nguendi, "Vati vaka mathona vahandeka nguavo Kilistu Yakeye muna Ndaviti? ³⁶ Ndaviti endi vavenya , mu Mpundhi ya kuYela nguendi, 'Muene ua handekele na Muene uange, "Tumama ku chilyo kamane njika linga vaka vindhindo vyove vilyatelo vya myanja yove" ³⁷ Ndaviti vavenya amuthana 'Muene"., keho vati Kilistu a kala muna Ndaviti?" Mbunga yakama yamu tolililile. ³⁸ Keho mukulongetha nguendi, "Linyungeni ku vaka mathona, vaye venda mu vidhala vya kulaha na ku lithambelela ku malandethelo, ³⁹ naku uana vipundi vyoshe vya kama muvi Sinangonga naku mihela yaku-lila. ⁴⁰ Avo vatambula vinjivo vya vaka kutcitha nakulomba vilombelo vya vilaha linga vantu va vamone. Vamala ava vaka uana kuva vyanena kuakama." ⁴¹ Keho Yesu ua tumamene kulishungama na chiketha cha vimbongo; ua talele vantu muye mova kele na kumbila vimbongo mu chiketha. Vampite va vengi vombilile vimbongo vya vingi. ⁴² Ngechi umo uava kakutcitha ua chihutu uedhile nakumbila mo tumbongo tuendi tuvali. ⁴³ Ua thanene vandonge vendi naku handeka nguendi, "Vuchili njimileka nguange, ou muka kutcitha ua chihutu nombila mo kutuvakana voshe vaye vana hana ko kuhaka mu chiketha cha vimbongo. ⁴⁴ Mu voshe vana hana kushuama vuingi vua kufuka kuavo. Vuno ou muka kutcitha mu vuhutu vuendi, uo mbilile mo tumbongo tuoshe tua kele natuo