¹ Yesu ua yile mukulongetha mu chifuti cha Yundeya kumuhela ua kutuvakana ndonga ya Yolondau, na mbunga yedhile ku lyendi. ² Va Faliseo va muethekele na kumuihula nguavo, "kuatha ku kondola mukentu uove ndi?" ³ Ua valekele nguendi, " Mosesa vati uami lekele?" ⁴ Va limbuluile nguavo, "Mosesa ua tavathele kuthona mukanda uaku vyana mukentu naku mukondola a ye kuimbo lyavo. ^{5 6} Yesu ua valekele nguendi, "Mukonda lya kukola cha vimbunge vyeni vikevyo Mosesa ua milekele ngocho. Vuno kutunda ha kupanga, "Kalunga uapangele mumala na mukentu." ⁷ "Mukonda lyevi mumala akatha yishe na vayina, naku ka livandakana na mukentu uendi, voshe vaka kala muvila umo. ⁸ Mukemo kuva kala lalo vavali, vuno muvila umolika. ⁹ Mukemo, vije vyana vandakala Kalunga, uahi muntu ua kuvitepa." ¹⁰ Mova kele munjivo, vandonge vendi va muihuile lalo ku lyevi, ¹¹ Ua valekele nguendi, "Uoshe a vyana mukentu uendi a kambate ueka na lingi vupangala. ¹² Uoshe mukentu a vyana mumala uendi a kambate ueka nalingi vupangala. ¹³ Vamu nehelele vanike vavandende muku va kambeka mavoko, vunoni vandonge vava vindikile. ¹⁴ Vuno Yesu muku vimona, kuvya mu yile kumbunge naku vakuanya nguendi, "Echeleni vanike va va ndende veje kulyange, mukonda vu muene vua muilu vuna pu vuavo. Na vumuene vuamuilu vuka pua vua vaje vali kehetha ngue vanike. ¹⁵ "Vu chili njimikeka, "Uoshe ka tambula vumuene vua Kalunga ngue vanike vavandende kaka kovela mo." ¹⁶ Ua vatambuile naku vakambeka mavoko, ua va vuavuethele. ¹⁷ Muvungendhi vuendi lyala uamu shatukilile naku mu tcikamena, ua muihuile nguendi, "Mulongithi ua chili, vika nji panga linga nji ka kovele muvu muene vua muilu?" ¹⁸ Yesu ua mulekele, "Vika unji tumbuila mulongithi ua chili? Na umo uahi ua chili kuvanga Kalunga." ¹⁹ Una dhivuka mashiko; "Keti uka tcihye, keti upangale, keti uka puanje, keti uka vangeye, kati uka shueke kuvihya, thingimika yisho navanoko" ²⁰ Mukuenje nguendi, " vyoshe nji vidhivuka kutunda vunike vuange." ²¹ Yesu ua mutalele naku mu yongola,. Ua mu lekele nguendi, "Chimolika chi na lithupu ko, landetha vufuko vuove vuoshe vuli navuo, hana kuvihutu na ku nji shuama." ²² Mukuenje mukuvua majui ano ua luvalele nakuya ua yile na mbunge ya ku vihya. Mukonda ua kele na vufuko vuendi vua vuingi. ²³ Yesu ua talele vandonge vendi naku kuanya navo nguendi, "Muamukalu mpite kukovela mu vumuene vua Kalunga!" ²⁴ Ngechi vandonge va komokele kulijiu eli. vunoni Yesu ua valekele nguendi, "Vana vange cha chi kalu mukonda muku kovela mu vumuene vua Kalunga! ²⁵ Cha chathi ngamelu ku kovela mu lisho lya nguya kutuvakana mpite muku kovela mu vumuene vua Kalunga.' ²⁶ Vandonge vakomokele va venya naku lihandeketha nguavo, "yiya a kovoka?" ²⁷ Yesu ua vatalele nguendi, "Kuvantu vyakola, vuno kuli Kalunga vya vyathi." ²⁸ Petulu ua shangumukile kuhandeka nendi nguendi, "Tala etu tunathi vyoshe mukemo tuna ku shuama." ²⁹ Yesu nguendi, "Vu chili nji mileka nguange, na umo uahi nathi njivo yendi na mu nayina ua mukentu ndi ua lyala, yishe na vayina, vana vendi na chifuti chendi muli yange na lijui lya chili lya Kalunga. ³⁰ U je ka tambula vinthimbu chihita hano hantci; vinjivo nava mu nayina vava mala nava va vakentu, nava yina na vanike na livu, tuyando ku chifuti e chi chi kenja ko ku muono ua myaka yoshe ka yekulenga. ³¹ Vuno vaje va livanga vaka kotokela, na vaje va kotokela va ka livanga." ³² Va kele mungila ya kuya ku Yelusalema, na Yesu ua va tuamenene. vandonge vakomokele, na vaye vamu shuamene mu nima vakele na lyova. Ngechi Yesu ua tambuile vandonge likumi nava vali kua likalyavo lalo, ua valekele vyoshe vi ka yo mboloka hali yakeye kulutue. ³³ "Taleni etu tuya ku Yelusalema, na muna muntu va ka muhana ku vakuluntu vava sasendote navaka mathona. Vaka mu vangeya muku tcihya na kumu hana ku vaka vifuti. ³⁴ Va kamu shaula, na ku mu yekuila, naku mupupa noho vaka muhaka ku kutca. Vuno kunima ya matangua atatu a ka shituka." ³⁵ Tiango na Youano, vana vaSembendeu vedhile kulyendi nguavo, Mulongithi, tuyongola utu pangele vyoshe vyo tuku lomba. ³⁶ Ua vehuile, "Vika muyongola nji mipangele vyo?" ³⁷ Va handekele nguavo, "Tu tavethele tuka tumame nove mu vumuene vuove, umo ku livoko lyove lya chilyo mukuavo ku chimoshue ." ³⁸ Vuno Yesu ua valimbuilile nguendi, "Komuadhivukile vika muna lombo. Eni ngueni munua nganja eyi yonje ku nua yange na ku kakala mu kumbuitika echi cho vaku nji mbuitika?" ³⁹ Va mu lekele nguavo, "Tuvyatha." Yesu ua handeka navo nguendi, "Nganja yonje kunua, neni mua kuyi nua, na kumbuitika change neni chova kumi mbuitikitha. ⁴⁰ Vuno kulyou aka tumama kulivoko lyange lya chilyo na livoko lyange lya chimoshue keti kulyange ua kuvihana, vuno vya vaye vava vua yethela laya." ⁴¹ Muva vyuvuile vaye vandonge likumi va kele na vukalu na Tiango na Youano. ⁴² Yesu ua va thanene kulyendi na kuvaleka nguendi, "Mudhivuka vaye vava tumbula vantuama lutue vaka vifuti vava tuvakana, na vantuama lutue vavo vatha kuhaka mashiko hali vantu vavo. ⁴³ Vuno keti vi ka kale ngocho halyeni. ⁴⁴ Ou uoshe a kala ua kama hakati keni, a kale ndungo ua voshe. ⁴⁵ Kuli Muna Muntu kedhile mu kumu lemetha, vuno mu kuhana muono kuvantu voshe." ⁴⁶ Uedhile ku Yeliko. Muva tuvakanene Yeliko na vandonge vendi na mbunga yakama va uanene muna Timoteu, Mbatimeusa, kapuputua uakele kulomba ua tumamene kungila. ⁴⁷ Muku vua nguavo Yesu uaku Nazaleta ali na kuija, ua shangumukile ku tambakana nguendi, "Yesu muna Ndaviti njuvuileko ngodhi! ⁴⁸ Vavengi va muvyanethele kapuputua naku muleka nguavo a holoke. Vuno yikeye ua lilile naku tambakanene muakama, "Muna Ndaviti, njuvuile ko ngodhi!" ⁴⁹ Yesu uava vindikile naku valeka linga vamu thane.Vamu thanene uye lyala ua kapuputua nguavo, "Kanyama! Katuka! Yesu a kuthana.' ⁵⁰ Ua thile kadhaku kendi, na ku jomboka a ye kuli Yesu. ⁵¹ Yesu ua muihuile nguendi, "Vika u yongola njiku pangele vyo?" Kapuputua ua kuanyene nguendi, "Lambi, nji yongola kumona." ⁵² Yesu ua mulekele nguendi, "Yauye. Kutcelela kuove kuna ku kangula." Haye vene ua shangumukile kumona na kushuama Yesu mungila.