¹ Mbi hungira uatjiri mu Kriste, hi kora o vizeze, no urizemburuka uandje ama u ndji hatoire mo Mbepo o Ndjapuke, ² Kutja mbina o ruhoze no muhihamuatima mbu hinandjandero, ³ Orondu mbi zera kutja ami o muini mbi sengue ku Kriste kutja o vakuetu, o vazamumue vandje mo njama: ⁴ Mberi o Vaisrael, mberi o veni vo maumbiro, no ujere, no merikutirokumue, no majandjero uo Veta, noku karera Mukuru, no makuizikiro; ⁵ Mberi o voo tate, Kriste ma za otja ko njama, Eje nguri Mukuru ua avehe, Ngua serua o ndaja ngaaruhe. Amen. ⁶ Kakutja itji matji hee kutja Embo ra Mukuru kari tonene, orondu ka Vaisrael avehe mberi o va Israel; ⁷ Nu uina ka kutja mo kutja ovo o ndui ja Abraham, avehe otji very o vanatje: nunguari, “Mu Isaka o Ndui jo je o mu mai je ku isanenua.” ⁸ O kutja, ka vanatje vo njama mberi o vanatje va Mukuru: nunguari o vanatje vo maundjiro o mbe varua otja o ndui. ⁹ Orondu Embo ro maundjiro orondi: “Mo ruveze ndui Ami me ja, nu Sara ma kara no muna.” ¹⁰ Nu ka tjo tji uriri, nunguari Rebeka tja jakanisiua i umue, i tate uetu Isaka; ¹¹ (Orondu ngunda o vanatje ave hija kuatua, uina ngunda ave hija tjita o uua poo o uvi, kutja o ndiero ja Mukuru otja ko matoororero i jenenisiue, ndji heri otja ko viungura, nunguari airi o ja Ingui ngu ma isana,) ¹² Kua heua nai ku je, “Ingui erumbi ma karere ingui o muangu.” ¹³ Otja tji pa tjangua, “Jakova Ami mba suverere, nunguari Esau Ami mba tondere.” ¹⁴ Ngatu the vi nambano? Tjii pena o uhasemba mu Mukuru? Mukuru a jandjere! ¹⁵ Orondu Eje ua tjere ku Mose, “Ami Me tjariparere ngu mba tjariparere, nu Me tire o ndjenda ingui ngu Me tire o ndjenda.” ¹⁶ Okutja otji pe heri opa ingui nguma zeri, poo opa ingui ngu ma tupuka, nunguari opa Mukuru, ngu ma raisa o tjari. ¹⁷ Orondu o matjangua ma etja ku Farao, Ezeva indi o ndi Mbe ku jerera, kutja Ami mbi raise o masa Uandje mu ove, kutja Ena Randje ri zuvarisiue mehi arihe. ¹⁸ Okutja Eje otje kara no tjari ku nguma vanga, nu ku ma vanga a kukutisa o mutima. ¹⁹ Ove otji mo tja nai ku ami, Nu onguae Eje ngunda Tje varura o ngatukiro? Orondu o uani ngua pirurire o mbango Je? ²⁰ Kako, nunguari oove une, arikana mundu, oku zira a mo patasana na Mukuru? O tjina tji tja ungurua ma tji jenene oku tja nai ku ingui ngue tji ungura, Onguae tji ue ndji ungura mo muano imbui? ²¹ Poo o mutunge uo zonjungu kena usemba kombanda uo munoko, uoku ungura otjitjuma tjimue tjo ndjozikiro, na tjimue tjo ndjambu, oku za mo munoko umue. ²² Nu peri vi tjeri kutja, Mukuru motjimbe tjoku zera oku raisa o mazenge Ue noku tjiukisa o masa Ue, Ua kara no muretima no ku hihamua orure mena ro vitjuma vio mazenge mbia puirua ijo ku njonua; ²³ Nokutja a tjiukise o utumbe uo ujere Ue mo vitjuma vio tjari, mbia tuninine o ujere ko murungu uo ruveze, ²⁴ O kutja ete, mba isana mbe heri o vo Tjijuuta poruao, nunguari oku za mo viuana uina? ²⁵ Otja tji ma hee uina mu Hosea, “Ami Me ve isana o vandu vandje, imba mbe heri o vandu vandje; nu imba mbe ha suvererue, o Vasuverua.” ²⁶ Nu mape kara nai, kutja mo ruveze mu va heerua kutja, “Ka uene o vandu vandje; imbo opu maveje ku isanenua o vanatje va mukuru o Munamuinjo.” ²⁷ Jesaja uina ma riri o hunga na Israel, “Nangarire o vanatje va Israel tji very o vengi otjo muheke uo muronga, o tjihupe matji jamua: ²⁸ Orondu Eje ma jeta o tjina ko maandero, ama kondo o usupu mo usemba, orondu Muhona ma ungura o tjiungura o tjisupi mehi.” ²⁹ Nu otja Jesaja tja tjere ko murungu, “Andaku Muhona Sebaota, Ke tue hupisirire o ndui, andaku tua kara otja o Sondoma, nu tua kara otja o Gomora.” ³⁰ Ngatu tje vi nambano? Kutja o vo viuana mbu ja ve ha kongorere o usemba va tuako o usemba, nunguari o usemba uo ngamburiro. ³¹ Nunguari Israel, ngua kongorerere o veta jo usemba ka vazere ko veta jo usemba. ³² O mena ra tjike? Orondu kave u pahere mo ngamburiro, nunguari jari mo viungura vio Veta. Orondu ovo va putara Meue inde putarise ndina; ³³ Otja tji pa tjangua, “Tareje, Ami Me tua mu “Sion Eue e putarise, no Ruuua o rupindikise, nu auhe ngu ma itavere mu Je kena ku zepaisiua o honi.”