¹ Nambano otji pe he tjina mberero jo njoneno ku imba mberi mu Kriste Jesu, mbe ha kaenda otja ko njama, nunguari mbe kaenda otja ko Mbepo. ² Orondu o Veta jo Mbepo jo muinjo mu Kriste Jesu je ndji kutura ko veta jo uvi no ndiro. ³ Orondu itji o Veta tji ja I ha jenene oku tjita, ojo tjinga ja ngundiparisirue mo tjimbe tjo njama, Mukuru tja hindire o Muna Ue o muini mo sananeno jo njama jo uvi, na ko uvi, Ua pangurire o uvi mo njama: ⁴ Kutja o usemba uo Veta u jeneninsiue mu ete, mbu tu ha kaenda otja ko njama, nunguari mbu tu kaenda otja ko Mbepo. ⁵ Orondu imba mbe hupa otja ko njama ve rikenda no vina vio njama, nunguari imba mbe hupa otja ko Mbepo ve rikenda no vina vio Mbepo. ⁶ Orondu o zondunge zo njama o ndiro, nunguari o zondunge zo Mbepo o muinjo no hange: ⁷ Mo tjimbe tjo kutja o ndunge jo njama, o vita kuena Mukuru, orondu ojo ka iri kehi jo Veta ja Mukuru, nu tjiri kanaa i jenene ko uina. ⁸ Nu imba mbe ri mo njama opu ve hina maa ve jorokisa Mukuru. ⁹ Nunguari ene ka muri mo njama, nunguari mu ri mo Mbepo, o Mbepo ja Mukuru tji ja tura mu ene. Nunguari o mundu auhe ngu hina Mbepo ja Kriste, eje ka umue ua imba o Ve. ¹⁰ Nu Kriste tje ri mu ove, o rutu rua koka mo tjimbe tjo uvi, nunguari o Mbepo o muinjo motjimbe tjo usemba. ¹¹ Nunguari o Mbepo ja Ingui ngua pendura jesu mo vakoke tji ja tura mu ove, Ingui ngua pendura Jesu mo vakoke uina ma pendura o tutu tuenu no Mbepo je ndja tura mu ene. ¹² Nu vakuetu, otji tu ha turire ondjo ko uvi, oku hupa otja ko uvi, ¹³ Orondu tji mamu hupu otja ko njama, mamu koka. Nunguari ene tji mua koza o vitjitua vio rutu mo masa uo Mbepo, mamu hupu. ¹⁴ Orondu avehe imba mbe nanua ijo Mbepo ja Mukuru, ovo o vanatje va Mukuru. ¹⁵ Orondu ene ka mu jakurire o mbepo jo uhuura rukuao ko mburuma, nunguari mua jakura o mbepo joku kuatua ndji tu ravaera najo Abba, Tate. ¹⁶ O Mbepo I jandja o uhatoi ko mbepo jetu kutja o uete o vanatje va Mukuru: ¹⁷ Nu tji turi o vanatje, otji turi o varumate veta; o varumate veta ra Mukuru, nu o varumate veta puena Kriste; kutja ete tji tua hihamisiua puena Je, uina tu jerisiue pueena Je. ¹⁸ Orondu ami mbi muna kutja o zombamisiro zo majuva nga ua nambano ka zena ndengu joku jenena oku sanekua kueena o ujere mbu mau je ku vandururua mu ete. ¹⁹ Orondu o viutua avihe vi undja no ndero o nene inga o matjiukisiro uo vanatje va Mukuru. ²⁰ Orondu o viutua kavi tuiirue kehi jo ngaro jo mungandjo mo mbango ja vio, nunguari mo ja Ingui ngue vi tua kehi, mo maundjiro, ²¹ Kutja imbi o viutua uina vi kuturirue mo ngutukiro jo ujere uo vanatje va Mukuru, oku za mo mapando uo mazundakero. ²² Orondu matu tjiua kutja o viutua tjema pamue mo zongama zo mihihamo ngaku nai. ²³ Nunguari ka vio poruao, nunguari na ete uina, mbu tuna o vihape o vitenga vio Mbepo, ete uina tu tjema mo ukoto uetu o veni, ama tu undju o nguatero, okutja, o maranduriro uo rutu. ²⁴ Orondu tua jamua ijo maundjiro: nunguari o maundjiro nge munika ka maundjiro: orondu itji o mundu tjima munu, eje ngunda tjandje una o maundjiro ua tjike? ²⁵ Nunguari tji tuna o maundjiro mu itji tji tu hija muna, tu tji undja no muretima. ²⁶ Mo muano o tjingeuo o Mbepo I tu vatera mo maungundi uetu: orondu katu tjiua kutja tua soku kumbira tjike mo muano une: Nunguari o Mbepo o Muini u tu hekenena no minono mbi ha jenene oku hungirua. ²⁷ Nu ingui ngu pianga o mitima, U tjiua tji tjiri mo zondunge zo Mbepo, orondu U hekenenena o vajapuke otja ko mbango ja Mukuru. ²⁸ Orondu ete tu tjiua kutja o vina avihe vi ungurira pamue ko upue ku imba mba suvera Mukuru, ku imba mba isaneua otja ko ndiero Je. ²⁹ Orondu imba mba tjiua ko murungu uo ruveze, Eje Ue ve tiera ko murungu uo ruveze kutja ve tanaurirue mo mbunikiro jo Muna Ue, kutja Eje a rire o tjiveri mokati ko vanatje o vengi. ³⁰ Kombanda ja imba, imba mba tia o ngaro jao komurungu uo ruveze, imba Eje Ue ve isana uina; nu imba mba isana Eje Ua sembamisa uina; nu imba Eje mba sembamisa Eje u eve pere o ujere uina. ³¹ Ngatu the vi nambano ko vina mbi? Mukuru tjeri kekoro retu, o uani ngu me tu pirukire? ³² Ingui ngu ha ruruparere o Muna Ue o muini, nunguari Ngue Mu jandjera ete atuhe, Eje Ken a k utu pa vi o vina avihe uriri pueena Je? ³³ Ouani ngu ma jenene oku tuako o vatoororua va Mukuru ondjo? Mukuru o ngu sembamisa. ³⁴ O uani ngu ma verere o ndjo? Jesu o ngua ta, nu uina nguari ngua pendurua, rukuao ngua haama ko kunene kua Mukuru, nu uina ngu tjitira ete o mahekeneno. ³⁵ O uani ngu me tu hana ko rusuvero rua Kriste? Ma rire o zombamisiro, poo o mihihamo mo muinjo, poo o ndatumisire, poo o ndjara o ndeu, poo o muzu, poo o umba, poo engaruvio? ³⁶ Otja tji pa tjangua, Ete tu zepiua motjimbe tjo je o ure ue juva arihe, tua sana ko zondu nda tuninua o ku ta. ³⁷ Nunguari mo vina mbi avihe tua kapita o va tone mu Ingui ngue tu suvera. ³⁸ Orondu ami me itavevere katjiri kutja nangarire o ndiro poo o muinjo, poo o vaengeri, poo o mauvara, poo o masa, poo o vina mbi ri ko, poo o vina mbi mavi ja, ³⁹ Poo o maukombanda, poo o urekoto, poo o tjina tjarue tji tja memua, ka maa tji jenene ok utu hana kueena o rusuvero rua Mukuru, nduri mu Kriste Jesu, o Muhona uetu.