¹ Vakuetu, o ndero jo mutima uandje no ngumbiro ndji mbi kumbira o Vaisrael ku Mukuru ojo ndji, kutja ovo ve jamue. ² Orondu ami me hatoire kutja ovo ve no zonduma za Mukuru, nunguari ae heri otja ko ndjiviro. ³ Orondu ovo mo ku hina ku tjiua o usemba ua Mukuru, na tji va utire oku ri ungurira o usemba uao o veni, otji ve he riuisire kehi jo usemba ua Mukuru. ⁴ Orondu Kriste Eje o maandero uo veta ko ku jandja o usemba ku ingui auhe ngu no ngamburiro. ⁵ Orondu Mose ua tjanga nai ohunga no usemba mbu ri o uo Veta, “O mundu ngua tjiti o vina mbio ma hupu mu vio.” ⁶ Nunguari o uemba uo ngamburiro u tja nai, “Otja nai mo mutima uo je, Ouani ngu ma rondo Kejuru,” inguo oku herurira Kriste pehi; ⁷ Poo, O uani nguma pundu mo urekoto; inguo oku pitisa Kriste rukuao mo vakoke. ⁸ Nunguari oro ri tja vi? “Embo ri ri posi joje, mo tjinjo tjoje, na mo mutima uoje;” okutja, oro indi Embo ro Ngamburiro ndi tu zuvarisa; ⁹ Orondu tji ua hongonona Muhona Jesu, nu o itavere mo mutima uoje kutja Mukuru Ue Mu pendura mo vakoke, mo jamua. ¹⁰ Orondu o mundu u itaverera ko usemba no mutima, nu no tjinjo a hongononene ko ndjamo. ¹¹ Orondu o Matjangua je tja, “Auhe ngu ma iatavere mu Je ke na ku zepaisiua o honi.” ¹² Orondu kapena hani pokati ko Mujuuta no Muhirika, orondu Muhona otjingeje nguri kombanda ja avehe ngue ura o utumbe ku imba mbe kua ku Je. ¹³ Orondu ku avehe, “Auhe ngu ma isana ena ra Muhona ma jamua.” ¹⁴ Nu nambano mave ku vi ku Ingui mu ve ha itaverere? Nu mave itavere vi mu Ingui ngu ve hi na ve mu zuvirire? Nu mave zuu vi noku hina muzuvarise? ¹⁵ Novo mave zuvarisa vi, pendje na tji va hindua? Otja tji pa tjangua, “Tjiri o zombua tjinene o zombaze za imba mbe zuvarisa o mbuze o mbua jo hange, nu mbe jeta o mambo o ma njandise uo vina o viua!” ¹⁶ Nunguari ka avehe mba kara no nduviro ko mbuze o mbua, orondu Jesaja ma tja, “Muhona, o uani ngua itaverere o mbuze je tu?” ¹⁷ Okutja o ngamburiro i ja mena ro kuzuva, no kuzuva ku jetua i Embo ra Mukuru. ¹⁸ Nunguari me tja, Tjii ovo kave zuvire? Ii tjiri, eraka rao ra pitira mehi arihe, no mambo uao nga ko maadero uo uje. ¹⁹ Nunguari me tja, Israel ka tjivirue? Rutenga Mose ma tja, “Ami Me mu tisa eruru na imba mbe heri o vandu, nu E mu zepaisa o mazenge no tjiuana o tjijova. ²⁰ Nunguari Jesaja o mbande tjinene nu ma tja, “Ami mba munikua i imba mbe he Ndji pahere, Ami Mbe je ku tjiukua iimba mbe hina va purire ohunga na Ami.” ²¹ Nunguari ko Israel matja, “Ami mba uonjononena o make Uandje ko vandu o virangaranga no vendjipirukire.”