¹ Nambano otji metja, Tjii Mukuru Ua nakera o vandu ve kuarue? Mukuru a jandjere! Orondu ami uina o uami o Muisraela, uo ndui ja Abraham, uo muhoko ua Benjamin. ² Mukuru ka nakererere o vandu ve mba tjivirue ko murungu uo ruveze kuarue. Poo ka muna ku tjiua kutja o Matjangua ja tja vi mu Erija, kutja eje ua unauna vi ku Mukuru o hunga na Israel ama tja, ³ “Muhona ovo va zepa o vaprofete vo Je, nu ave sesura o mazuko uo Je uo maningiririsiro; nu ami mba seua erike, nu mave jeve o muinjo uandje. ⁴ Nunguari e zrirra ra Mukuru ma ri tja vi ku je? Ami mbe ri puikira o varumendu o majovi hambombari mbe hina va uorere o ngoro jao ku Baal. ⁵ Mo muano o tjingeuo na mo ruveze ndui uina pena o kambumba o kahupe otja ko matoororero uo tjari. ⁶ Nunguari tjeri mo tjari, kai tjiri mena ro viungura; pendje na nao o tjari tjandje kai tjiri o tjari. Nunguari tjeri mena ro viungura, imbo kai tji tjiri o tjari; pendje na nao o viungura kai tji tjiri o viungura. ⁷ Nambano tjike? Israel ka muine itji eje tji ja paha, nunguari o vatoororua ve tji muna, nu imba avehe ave kukutisiua o mitima, ⁸ Otja tji pa tjangua, “Mukuru Ue vepa o mbepo joku kotura, o meho nge ha munu, no matui nge ha zuu,” nga ke juva ndi. ⁹ Nu David ua tjere, “O tjitihe tjao nga tji rire o nguehe, no mbate, no tjiputarise, notjisuta tjo uvi kuvo; ¹⁰ O meho uao nga je zorerisiue kutja ave ha munu, ne etambo rao ngari uorue ngaaruhe. ¹¹ Nambano otji me tja, Kave putarere kutja ve ue? Mukuru a jandjere! Nunguari mo ku heza kuao o ndjamo jeja ko viuana, oku ve tisa eruru. ¹² Nunguari o mauiro uao tji jeri o mautumbe ko uje, no mandjarero jao tji iri o mautumbe ko viuana, mape kara o ujere o unene oku kapita vi mo meurisiro uao? ¹³ Orondu me hungire ku na ene, o viuana; otja tji mbi ri o muapostele uo viuana, me kurisa o tjiungura tjandje; ¹⁴ Nani rumue me njinganjingisa imba o vo njama jandje oku ta eruru, nu e jama tjiva vavo. ¹⁵ Orondu tjeri oku nakerua kuao kuarue, o mahanganisiro uo uje, o majakuriro uao maje rire tjike tje heri o hupo okuza mo vakoke. ¹⁶ Orondu o vihape o vitenga tji viri o vijapuke, okutja indji o mbomba mu viazu o ndjapuke. Nu o muze tji uri o mujapuke, uina no vitavi o vijapuke. ¹⁷ Nunguari tjeri kutja o vitavi tjiva via tejeua, nu ene, a muri o muninga uo kuti, amu zikua mokati kao, amu kara no rupa mo muze na mo usose uo muninga; ¹⁸ Amu rihivire o vitavi. Nunguari tji mamu rihivi, ene ka uene mbu mua tjinda o muze, nunguari o muze o mbue mu tjinda. ¹⁹ Otji mamu je kutja, O vitavi via tejerua kutja ete tu zikue po. ²⁰ O uatjiri, o tuo tua tejerua oku hina ku itavera, nu ene mua kurama mena ro ngamburiro. Amu ritongamisa, nunguari tireje; ²¹ Orondu Mukuru Tje ha tjariparerere o vitavi via hapo, takamiseje tjaa Nge he mu tjariparere uina. ²² Tareje ene nambano, o unjanutima no mbeze ja Mukuru; ku imba mba ua, o mbeze; nunguari ku ene o unjanutima, tji mamu pandere po unjatima Ue: ape heri nao ene uina mamu kondua. ²³ Nu ovo uina tji ve ha panderere poku hina ku itavera mave zikua mo muninga. Orondu Mukuru ma jenene oku ve zika mo muninga rukuao. ²⁴ Orondu tjeri kutja ene mua porua ko muti mo hapo jao mbu ri hapera mo kuti, nu ku ku heri ko ngaro ja hapo amu zikua mo muninga o muua; imba mave zikua vi oku kapita nai mo muninga uao o veni? ²⁵ Ami hina ku vanga mu kare noku hina ndjiviro jo tjiheiue tji, kutja amu ha rire o zonongo mu ene o veni; kutja o upotu ue ja ko rumbembera rua Israel, nga ko meurisiro uo viuana tji ja hiti; ²⁶ Nu o Israel aihe mai jamua, otja indi tji pa tjangua, “O Mukure meje kuza mo Sion, nu ma tanaurire kuarue oku hina Mukuru kua Jakova: ²⁷ Orondu indji ojo o ngutasaneno jandje kuena vo, tji Mba zu noku isapo o mauvi uao.” ²⁸ Tjiri, otja ko Mbuze o Mbua, ovo o vanavita mena renu: Nu otja ko matoororero ovo o vasuverua mena roo ihe. ²⁹ Orondu o vijandjeua no matoororero ua Mukuru ka vi rundururua. ³⁰ Orondu tjimuna ene mo ruveze ndua kapita kamu itaverere mu Mukuru; nunguari nambano mua jakura o tjari mena roku hina ku itavera kuao; ³¹ Mo muano o tjingeuo imba nai kave itavere, kutja mo tjari tjenu ovo uina ve jakure o tjari. ³² Oorndu Mukuru ua patera o vandu avehe moku hina ku itavera, kutja A raise o tjari ku avehe. ³³ Tjiri o urekoto uo unongo no ndjiviro ja Mukuru! O zombanguriro Ze ka maaze mangururua , nu o miano vie vai kapita o ndjiviro. ³⁴ Orondu o uani ngua tjivirue o zondunge za Muhona? Poo o uani ngua ririre o muzemburukise Ue? ³⁵ Poo o uani ngue Mu pere o tjina rutenga, nu ngu tja soku sutus ku je? ³⁶ Orondu ovina avihe vi ri ko mena Re, mu Je, na ku Je: Ku Je nga rire o ujere ngaaruhe.