¹ Otji me rijarikana kuene, vakuetu, mena ro tjari tja Mukuru, kutja mu jandje o tutu tuenu otja o mbunguhiro o namuinjo, o ndjapuke, o nanjune ku Mukuru, ngeri o merikotameneno uenu o masemba. ² Nu amu kara otja ko ngaro jo uje mbui, nunguari tanaurueje ijo mapeparisiro uo zondunge zenu, kutja mu jenene oku tjiukisa kutja o mbango ja Mukuru ndji hina kapo, indji o mbua, no njandise o tjikuae? ³ Orondu me tja nai otja ko tjari tji tja jandjeua ku ami, ko mundu auhe nguri mokati kenu, kutja ehe rivarere kombanda tjinene oku kapita pa soku rivarera; nunguari kareje no uripura o upatje, otja Mukuru tja jandja ko mundu auhe o ngamburiro ko kajenenisiro. ⁴ Orondu otja tji tuna o unepo o uingi mo rutu rumue, no unepo auhe tji u hina tjiungura tjimue, ⁵ Ete o vengi otji turi o rutu rumue mu Kriste, nu auhe aeri o vinepo vio mukuao. ⁶ Nambano otja tji tuna o vijandjeua mbia hanika otja ko tjari tji tua peua, tjeri oku profeta otja ko tjijenenisiro tjo ngamburiro; ⁷ Poo o ukarere, mo ukarere, poo ingui ngu ma hongo, mo kuhonga ⁸ Poo ingui ngu ma zeuparisa, moku zeuparisa; poo ingui ngu ma hanasana mo upukurukue; poo ingui ngu ma hongora mo ndjeverero; poo ingui ngu mato tjari mo ndjoroka; ⁹ O rusuvero ngaru kare noku hina tjavivi. Tondeje itji tji tjiri o tjivi; Kakatereje ku itji tjiri o tjiua. ¹⁰ A mamu kara no rusuvero ruo vakuatuapamue, auhe ko mukuao, a mamu suvere katjiri, mo ndjozikiro a mamu tengasana; ¹¹ Otja ko upenda, noku hina tjiruejo, rireje o vatue mo mbepo, a mamu karere Muhona; ¹² A mamu njanda mo maundjiro, no muretima mo mbamisiro, amamu pandere poku kara mo ngumbiro, ¹³ A mamu jandja ko mauhepe uo vajapuke, amue rirongerere o zondjito zo tjari. ¹⁴ Sereje o ndjaja ku imba mbe mu tatumisa; serereje o ndaja, amu sengi. ¹⁵ Njandeje puena imba mbu mave njanda, nu rireje puena imba mbu mave riri. ¹⁶ Kareje no upue auhe ko mukuao, a mu hina ku rikenda no vina vio kombanda, nunguari zuvasaneje kuena o vandu vo kehi. Amu rire o zonongo mu ene o veni. ¹⁷ A mu jarurire o mundu kaani ouvi ko uvi. Eteje o vina mo uatjiri po murungu uo vandu avehe. ¹⁸ Tji mape urika, imba pu mamu pe uru, kareje mo hange kuena o vandu avehe. ¹⁹ Vasuverua, amu risutisire o ve mukatukire o veni. Nunguari jandjerereje o mazenge o ruveze; orondu pa tjangua, “O masutisiro o Uandje, Ami me sutisa,” Muhona ma tja nai. ²⁰ O munavita na ove tja to ndjara, opu ua soku mu risa; nu tja to njota mu hira: orondu moku tjita nao mo uongere o makara uo muriro kombanda jo tjiuru tje. ²¹ Amu taarua ijo uvi, nunguari taareje o uvi no uua.