1 O muinjo auhe ngau kare kehi jo mauvara uo kombanda. Orondu kapena uvara mbu heri o ua Mukuru; o mauvara nge ri ko ja zikua i Mukuru. 2 Okutja auhe ngu ma pirukire o uvara ma pirikire o mazikamisiro ua Mukuru: Nu imba mbu mave piruka, mave ri muine o mbanguriro. 3 Orondu o vanane ka vatirise ko viungura o uiua, nunguari ku imbio vivi. Nu mamu zeri kutja amu ha tira o mauvar? Ungureje o uua nu ouo mau mupe o ndangero. 4 Orondu eje tjeri o mukarere ua Mukuru ko uua uoje. Nunguari tji mamu tjiti imbi o vivi, tireje, orondu ouo kau tjindire engaruvio o mungandjo; orondu ouo o ukarere ua Mukuru, o u sutise uo mazenge kombanda ja ingui ngu tjita o uvi. 5 Opu mua sokutja amu ha karere kehi o mazenge poruao, nunguari mena ro urizemburuka uina. 6 Mena ra itji opu mua soku sutira o tjisuta tjo uhona uina: orondu ovo o vakarere va Mukuru, mbe ungura o tjiungura tji aruhe. 7 Opu mua soku jandja ku avehe mbie ve puira: otjisuta tjo uhona ku ingui ngu tja puira; o tjisuta tjo mituaro tji mavi hiti mehi ku ingui ngu tja puira; o ndira ku ingui ngu ja puira; o ndjozikiro ku ingui ngu ja puira. 8 O kara no ndjo ko mundu nangarire jo tjina tjimue, pendje noku suverasana; orondu ingui gua suvera o mukuao ua jenenisa o Veta. 9 Orondu imbi: “Kona ku katuka ko o rukupo; kona ku zepa ko o mundu; kona ku vaka ko; kona ku jandja o uhatoi uo vizeze; kona ku toora o zonduma;” na tji pena etuako ekuao, ri manenua me mbo indi, “Ove mo suvere o mukuenu, otja tji ue risuvera o muini.” 10 O rusuvero ka ru tjiti o uvi ko muraranganda, okutja o rusuvero otji ru jenenisa o Veta. 11 Itji uina, keena oku tjiua o ruveze, kutja indui o ruveze ruo ku penduka mo zombotu; orondu nai o ndjamo jetu iri popezu oku kapita indi tji tua itaverere. 12 O utuku ue ja ko rundondo, ejuva ra tumbuka; opu tua soku ripukumuna o viungura vio ndorera, nu ngatu ripangane no viruise vio ndjerera. 13 Ngatu kaende mo muano mbua puira, otja me juva; ku ku heri mehambaneno na mo manuino; ku ku heri mo maotekasaneno na mo vitjitua vio zonduma; ku ku heri mo vopisa no maruru. 14 Nunguari zareje o Muhona Jesu Kriste, nu amu ripura ko murungu uo ruveze no uripura uo zonduma zo njama.