¹ Jakureje ingui nguri o tjingundi mo ngamburiro, nunguari amu mu tua mo zombanguriro zo uripura uenu. ² Orondu tjiri umue eje u itavera kutja eje ma jenene oku ria o vina avihe; nunguari umue nguri o tjingundi u ria o zomboua uriri. ³ Ingui ngu mari a njengura ingui ngu hinaku ria; nu ingui ngu hina ku ria a pangura ingui ngu ma ri, orondu Mukuru Ue mu jakura. ⁴ Oove une ngu mo pangura o mukarere uo mukuenu? Eje ma kurama poo mau otja ko muhona ue uriri. ⁵ Umue tjiri eje ua tenga ejuva rimue oku kapita o makuao, umue ua tenga o majuva ajehe pupeta pamue. Auhe nga kare no uzikame mbue ura mo mutima ue. ⁶ Ingu ngu ma takamisa ejuva me ri takamisire ku Muhona; nu ingui nguhina ku takamisa ejuva kena ku ri takamisira ku Muhona. Ingui ngu ma ri ma rire ku Muhona, eje tjinga ama jandja o ndangi ku Muhona; nu ingui ngu hina ku ria, kena ku rira ku Muhona, nu u jandja o ndangi ku Muhona. ⁷ Orondu kapena umue mokati ketu ngu rihupira ku je omuini, nu kapena mundu ngu rikokera ku je o muini. ⁸ Orondu kutja ma tu hupu, tu hupira ku Muhona; nu kutja ma tu koka tu tira ku Muhona. Okutja apejevari, tji matu hupu na tji mata tu, o uete o va Muhona. ⁹ Orondu itji Jesu otja tira, na penduka, na hupu rukuao, kutja a rire o Muhona uo vanamuinjo no vakoke. ¹⁰ Nunguari onguae tji mo pangura o mukuenu? Poo uina onguae tji mo njengura o mukuenu? Orondu avehe maveje ku kurama po murungu uo tjihavero tjo mbanguriro tja Kriste. ¹¹ Orondu pa tjangua, “Otja tji Mbi no muinjo, maku hungire Muhona, o ngoro aihe mai uorerua Ami, nu eraka arihe ma ri hongonona ku Ami.” ¹² Okutja auhe uetu ma jandja o merizirira po murungu ua Mukuru. ¹³ Okutja atu tji pangurasana rukuao, nunguari ngatu pangure tji, oku hina ku tuapera o mukuenu o tjiputarise, poo o tjina tji matji mu tjiti kutja a jaruke o mbunda. ¹⁴ Me tjiua nu mbi itavera noku hina ku ivaiva mu Mhunoa Jesu, kutja kapena tjina o tji hakohoke mutjo o tjini; nunguari ku ingui ngu ma vara o tjina tjimue kutja otji hakohoke, ku je katji kohoke. ¹⁵ Nunguari o mukuenu tji ma hihamisiua ijo vikuria vioje, ove kona ku tji kaenda mo rusuvero. O zepa o mundu ngua tirua i Kriste no vikuria vioje. ¹⁶ Opu u ha sere oku jandjera o uua uoje oku hungirua otjo uvi. ¹⁷ Orondu o Uhona ua Mukuru ka ku ria noku nua, nunguari o usemba, no hange, no ndjoroka mo Mbepo o Ndjapuke. ¹⁸ Orondu ingui ngu karera Kriste mo vina mbi, u tjata ku Mukuru, na rire o munanjune ko vandu. ¹⁹ Ete opu tua soku kongorera o vina imbi jeta o hange, na imbi mbi jeta oku tungasana. ²⁰ O hahaura o tjiungura tja Mukuru mo tjimbe tjo vikuria. Tjiri, o vina avihe o vikohoke, nunguari o vivi ku ingui ngu ma rire mo maputarero. ²¹ Ka ko kuua oku ria o njama, poo oku nua o mavinu, poo o tjina atjihe tji matji putarisa o mukuenu, poo oku mu uisa, poo oku mu ngundiparisa. ²² Tjii uno ngamburiro? Kara najo kove o muini po murungu ua Mukuru. O muningandu ingui ngu heri pangura o muini mu imbi mbi ma vara kutja o visemba. ²³ Nunguari, ingui ngu ma ivaiva tji mari, eje ua pangurua hapo, orondu itji ka tjina ku za mo ngamburiro; orondu atjihe tji tji heri o tjo ngamburiro o uvi.