¹ Ete mbu tu no masa tua soku tjinda o maungundi ua imba o vingundi, nu atu ha tjiti imbi mbi mavi tjatere ete o veni. ² Auhe uetu nga ungurire ko rutjato ruo muraranganda ko uua ue, oku mu tunga. ³ Orondu na Kristus uina ka ungurire mbi mavi tjatere Je o muini; nunguari otja tji pa tjangua, “O zondjambu za imba mbe ku jambururire za uira kombanda Jandje.” ⁴ Orondu o vina avihe mbia tjangerue komurungu uo ruveze via tjangererue oku rihonga kuetu, kutja ete mo muretima no mahuhuminino uo matjangua tu kare no maundjiro. ⁵ Nambano o muretima ua Mukuru no mahuhuminino Ue, nga je tjite kutja mu kare no zondunge nda sana ngui auhe ko mukuao, mo ruuano kuena Kriste Jesu; ⁶ Kutja no ndunge imue, no tjinjo tjimue mu hivirike Mukuru, ingui Ihe jo Muhona uetu Jesu Kriste. ⁷ Opu mua soku jakurasana otja Kriste uina Tje tu jakura ko ujere ua Mukuru. ⁸ Nambano me tja, Jesu Kriste uari o mukarere uo masukarero oku zuvarisa o uatjiri ua Mukuru, oku jenenisa inga o makuizikiro nga tjitirue ku imba ootate; ⁹ No kutja imba ovo viuana ve hivirikire Mukuru o tjari Tje; otja tji pa tjangua, “ mena re zeva ndi, oti Me hongonona ku ove mo viuana, nu E tanga Ena Roje.” ¹⁰ Nu rukuao Ma tja, “Jorokeje, ene Viuana, pueena o vandu Ve.” ¹¹ Nu rukuao, Tangeje Muhona viuana avihe, nu Mu tangeje tjinene vandu amuhe.” ¹² Nu rukuao Jesaja ma tja, Mape kara o muze ua Jese, nu Eje Me je ku jeruruka oku honapara kombanda jo viuana; mu Je o viuana mavi je ku kara no maundjiro. ¹³ Nambano Mukuru uo maundjiro nge mu urise no ndjoroka aihe, no hange mo ngamburiro, kutja mu urisiue mo maundjiro, mo masa uo Mbepo Ndjapuke. ¹⁴ Nu ami o muini uina mbi itavera noku hina ku ivaiva ohunga na ene, vakuetu, kutja ene uina mue ura o uua, a mue urisiua no ndjiviro aihe, a mu jenena uina oku rongasana. ¹⁵ Nunguari, vakuetu, Mbe mu tjangera no uvande, otja oku mu zemburukisa mo rupa rumue, mena ro tjari tji tja jandjeua ku ami i Mukuru, ¹⁶ Kutja mbi rire o mukarere ua Jesu Kriste ko viuana, oku zuvarisa Embo ra Mukuru, kutja oku jandja ko viuana ku rire oku na njune ku Mukuru, a kua japurua ijo Mbepo Ndjapuke. ¹⁷ Okutja otji mbi no merihiviro mu Kriste ohunga na imbimbi mavi tjama ku Mukuru. ¹⁸ Orondu hi nee rorere oku hungira ohunga na imbi Kriste mbie ha unguririre mu ami oku jeta o nduviro jo viuana membo na mo vitjitua, ¹⁹ Mo masa uo vizemburukisiro no vihimise, na mo masa uo Mbepo ja Mukuru, otja tji mba zuvarisa o Mbuze o Mbua ja Kriste o kuuura okuza ko Jerusalem, akuhe o ngoroka nga ko Ilirikum. ²⁰ Ii, okutja otji mba kondjisa oku zuvarisa o Mbuze o Mbua apehe jesu pe hija isaneua, kutja e ha tungire mo mazikiro uo mukuetu, ²¹ Nunguari otja tji pa tjangua, “ Ku imba ku ku hina tji tja hungirirue ohunga naje, mave munu. Nu imba mbe ha zuvire mave pangununa.” ²² Mu itji mba tjaerua tjinene uina oku ja ku ene. ²³ Nunguari nambano, otja tji mbi hi tjina ruveze mo makondua inga, nu tji mba kara no ndero o nene o zombura inda o zengi nda jo kuja ku ene, ²⁴ Apehe pu mba ire ko Spain, me ja ku ene. Orondu mbi a o maundjiro uokutja tji me tuvakana ngo me je ku mu muna, noku je ku hindua i jene ko murungu oku za ngo, ke koro rimue tji mbazu noku kutisiua ijo ku kara puena ene. ²⁵ Nunguari nai me i ko Jerusalem oku ka zuvarisa ko vajapuke. ²⁶ Orondu imba o va Makedonia na Akaja va vazere aeri ko kuua oku tonena o vasiona mberi ko Jerusalem o tjijandjeua. ²⁷ Tjiri ovo o veni va vazere itji aeri o tjiua; ovo uina tji veno ndjo jao. Orondu o viuana tji via tjitua kutja vi kare no rupa mo vina viao vio mbepo, opu via soku karer vo mo vina vio njama. ²⁸ Okutja tji mba mana tji, nu tjimba jandja o tjihape tji ku vo, me pitire mu ene tji mei ko Spain. ²⁹ Me tjiua o ukahu kutja tji meja ku ene, meja mo meurisiro uo ndaja jo Mbuze o Mbua ja Kriste. ³⁰ Nambano me rijarikana ku ene, vakuetu, mena ro Muhona uetu Jesu Kriste, no mena ro rusuvero ruo Mbepo, kutja mu kondje pueena ami mo zongumbiro zenu oku ndji kumbira ku Mukuru, ³¹ Kutja mbi kuturue mu imba mbe ha itavere ko Judea, no kutja o tjiungura tjandje tji mbe jere ko Jerusalem tji jakurue ijo vajapuke; ³² Kutja mbi je ku ene no ndjoroka mo mbango ja Mukuru, nu pueena ene mbi suvisiue. ³³ Nambano Mukuru uo hange nga kare pueena ene amuhe. Amen.