¹ Nu me jandja ku ene Febe, o mutenakuetu, nguri o mukarere uo kereka ndjiri ko Kenkrea, ² Kutja mu mu jakure mu Muhona, otja tji pa puira o vajapuke, no kutja mu mu vatere mo tjiungura atjihe tji ma hepa o mbatero jenu. Orondu eje ua vatera o vengi, na ami uina. ³ Minikee Priskila na Akuila, o vaungure va pueena ami mo tjiungura tja Kriste: ⁴ Mba jandjera ami o zosengo zao oku kondua; ka uami uriri ngu me jandja o ndangi kuvo, nunguari uina o zokereka zo viuana. ⁵ Mo muano o tjingeuo minikeje o kereka ndjiri mo ndjiuo jao. Minikeje o musuverua uandje, Epenetus, nguri o tjihape o tjitenga tja Kriste ko Akaja. ⁶ Minikee Maria, ngue tu ungurira tjinene no masa. ⁷ Minikee Andronikus na Junia, o vazamumue vandje, no vapandekua o vakuetu, mbe tjiukua no ko Vaapostele, nu uina mba kara mu Kriste ko murungu uandje. ⁸ Minikee Amplias, o musuverua uandje mu Muhona. ⁹ Minikee Urbanus, o muvatere uetu mu Kriste, no musuverua uandje Stakis. ¹⁰ Minikee Apeles, ngua jakurua i Kriste. Minikee imba ovo nganda ja Aristobulus. ¹¹ Minikee Herodion, o muzamumue uandje. Minikee imba ovo nganda ja Narkisus, mberi mu Muhona. ¹² Minikee Traefena na Traefosa, mbe ungura mu Muhona. Minikee Persis, ngua kondja mo viungura o vingi mu Muhona. ¹³ Minikee Rufus, o mutoororua mu Muhona, na ina je na ami uina. ¹⁴ Minikee Asinkritus, Flegon, Hermas, Patrobas, Hermes, no vakambure mberi pueena vo. ¹⁵ Minikee Filologus, na Julia, Nereus, no mutenakue, na Olimpas, no vajapuke avehe mbe ri pueena vo. ¹⁶ Minikasanee no ruhupito o rujapuke. O zokerka za Kriste ze mu minike. ¹⁷ Nambano me rijarikana ke ene, vakuetu, tjevereje imba mbe jeta o hani no viputarise, nu mbe pirukira o mahongero ngu mue rihonga, nu humburukeje navo. ¹⁸ Orondu imba mberi nao kave karere Muhona uetu Jesu Kriste, nunguari ve karera o mazumo uao o veni; ovo ve pukisa vo mitima o mihinatjipo no vitjutua o viua no mambo o maua. ¹⁹ Orondu o nduviro jenu ja vaza ku avehe. Opu me zu oku jorokera ene; nunguari o ndero jandje kutja mu rire o zonongo mu imbio viua, no vehinandjo ko uvi. ²⁰ Nu Mukuru uo hange ma tukutura Satan mo ruveze o rusupi kehi jo zombaze zenu. Otjari tjo Muhona uetu Jesu Kriste nga tji kare pueena ene. Amen. ²¹ Timoteus, o muungure ua pueena ami, na Lusius, na Jason, na Sosipata, o vazamukue vandje, ve mu minike. ²² Ami, Tertius, ngu mba tjanga o mbirive ndji, me mu minike mu Muhona. ²³ Gajus ngue ndjipa o mara, na itji o tjimbumba atjihe , ue mu minike. Erastus, o mutjevere uo mbuiko jo tjihuro, na Kuartus o mukambure, ve mu minike. ²⁴ O tjari tja Muhona uetu Jesu Kriste nga tji kare pueena ene amuhe. Amen ²⁵ Nambano ku Ingui ngu ma jenene oku mu zeuparisa otja ko mbuze o mbua jandje, no mazuvarisiro ua Muhona Jesu Kriste otja ko mavandururiro uo tjiundikua tji tja karere atja horekua o uje nganda a ua utirue, ²⁶ Nunguari nambano tji tja vandururua, na mo matjangua uo tjiprofete, otja ke tuako ra Mukuru uaaruhe, nda tjiukisiua ko viuana avihe ko nduviro jo ngamburiro. ²⁷ Ku Mukuru o munaunongo erike, mu Jesu Kriste, ku Je nga rire o ujere ngaaruhe. Amen.