¹ Nu nambano otja tji tua sembamisiua no ngamburiro tuna o hange kuena Mukuru mo Muhona uetu Jesu Kriste: ² Muje uina tuna o uhara oku hi hita mo tjari tji mu tua kurama, nu tu njanda mo maundjiro uo ujere ua Mukuru. ³ Nu katjotji uriri, nunguari tu rihiva uina mo zombamisiro, ama tu tjua kutja o zombamisiro ze tunga o muretima, ⁴ No muretima u tunga o tjikaro no tjikaro tji tunga o maundjiro. ⁵ No maundjiro ka je tu zepaisa o honi; orondu o rusuvero rua Mukuru rua tirahirua pendje mo mitima vietu mo Mbepo o Ndjapuke ndja jandjua ku ete. ⁶ Orondu ete ngunda atu hina masa, Kriste ua tira imba mbe hina Mukuru mo ruveze ndua jenenisiua ⁷ Orondu o mundu ma jene oku tira o mundu o musemba po uzeu, poo rumue mapeja umue a rorere oku tira o mundu o muua. ⁸ Nunguari Mukuru ua raisa o rusuvero Rue ku ete mo kutja, ete ngunda a tu ri o vanauvi, Kriste Ue tu tira. ⁹ Nu munao oku kapita tji, otja tji tua sembamisiua no Mbindu Je, ma tu jamua ko mazenge ja Mukuru. ¹⁰ Orondu tjeri kutja, ete ngunda tuari o vanavita tua hanganisiua kuena Mukuru mo ndiro jo Muna Ue, oku kapita mba, otja tji tua hanganisiua, ma tu jamua ijo muinjo Ue. ¹¹ Nu ka nao uriri, nunguari tu joroka rukuao mu Mukuru mo Muhona ue tu Jesu Kriste, mu Je nambano mu tua jakura o mahanganisiro. ¹² O kutja, otja o uvi tji ua hitira mo mundu umue mo uje, nondiro ai hitire mo uvi; nu o ndiro otji ja tuurungira kovandu avehe, orondu avehe va katuka: ¹³ Orondu o uvi ua ri mo uje nga ko Veta: nunguari o uvi kau varua pup e hina veta. ¹⁴ Nunguari o ndiro ja honapara oku za ku Adam nga ku Mose, no kombanda ja imba mbe ha katukire mo saneno jo ngatukiro ja Adam, nguri o tjisanekero tja Ingui ngua sere oku ja. ¹⁵ Nunguari o tjijandjeua tja uriri katji sanene kuena o ngatukiro. Orondu tjeri kutja mo ngatukiro ja umue o vengi va koka, o tjari tja Mukuru tja kapita tji, no tjijandjeua tjo tjari; itji mo Murumendu umue Jesu Kriste, tji tja takavarera ko vengi. ¹⁶ Nu o tjijandjeua tja uriri kanaa tji kara tjimuna itji tji tjeja na umue ngua katukire; (orondu tjiri o mbanguriro jari o ja umue ko njoneno, nunguari o tjijandjeua tja uriri otjo zongatukiro o zengi ko masembamisiro. ¹⁷ Orondu tjeri kutja oku za mo ngatukiro jo mundu umue o ndiro ja honoparera mu umue; imba mbu mave jakura o tjari tji tja takavara no tjijandjeua tjo usemba, mave honopara oku kapita mo hupo mu Umue, Jesu Kriste.) ¹⁸ Okutja otja mo ngatukiro imue o mbanguriro ttji je ja ko vandu avehe ko njoneno, mo muano o tjingeuo mo usemba ua Umue o tjijandjeua tja uriri tje ja ko vandu avehe ko masembamisiro uo hupo. ¹⁹ Orondu otja mo kuhinanduviro kua umue o vengi tji va ungurua o vanauvi, mo muano o tjingeuo mo nduviro ja umue, o vengi mave ungurua o vasemba. ²⁰ Nunguari o Veta ja hitira kutja o ngatukiro i ningipare. Nunguari imba o uvi pu ua ningipara o tjari tja ningipara oku kapita; ²¹ Kutja otja o uvi tji ua ningiparera oku tuara ko ndiro, mo muano o tjingeuo o tjari tji honaparere mo usemba oku tuara ko muinjo uaaruhe mu Jesu Kriste o Muhona uetu.