¹ David möä'ca huä̧mȩ yabonänö i̧rȩbȩhui̧'omenä, Mefiboset umöhuä̧ya̧ Sibamä̧ mörötö̧ ta̧ju̧ huä̧cuä̧huo̧tö̧cu̧ rä'o'ö topäcuähuinö; jahuätönämä i'cächinö pan o̧ppä̧mä̧ 200nö̧ jo̧mȩnä̧, joecuä uva ochamä 100nö̧ jo̧mȩnä̧, higos ochamä 100nö̧ jo̧mȩnä̧ ja̧'hua̧ta̧'a̧nö̧ vino isoya acuäbamä jibatetä. ² Ru̧hua̧mä̧ Sibarö pä'inö: ¿Tta̧'a̧nö̧ pä'ö pi̧yȩmä̧ cui'cächättö̧? Sibamä ädätinö: Mö̧rö̧tö̧mä̧ ru̧hua̧ ahuaruhuä ttu̧huä̧mäda̧tö̧ pä'ö, pan'i̧nä̧ ja̧'hua̧ta̧'a̧nö̧ higos ocha'i̧nä̧ cumöhuäyotö ttucua pä'ö, ja̧'hua̧nö̧ jö̧ta'anö vino isoyamä jitö de'a juiyä̧jä̧nä̧ 'chä̧nö̧ jiyöpächätö ttahua pä'ö." ³ Ru̧hua̧mä̧ pä'inö: ¿Ja̧'hua̧nö̧ ja̧'a̧mä̧ cu̧ru̧hua̧ ö̧do̧mä̧ to ö̧jä̧ttö̧? Sibamä ru̧hua̧rö̧ ädätinö: Topittö, ja̧u̧mä̧ Jerusalén ötahuiyänätä̧ ki̧'i̧pä̧ji̧ pa̧'a̧nö̧ pä'attö̧: Jitä mo̧ro̧ Israel ttö̧ja̧rö̧ ruhuo chä'o hueinömä ppa̧huä̧cha̧'a̧, ttö hueda pä'ö. ⁴ Ja̧'hua̧nö̧ ja̧'a̧ ru̧hua̧mä̧ Sibarö pä'inö: Topittö, o'cajuiyönä Mefiboset öäre ji̧nö̧nä̧ jitämä ucutä cuiäre ja̧'a̧." Sibamä ädätinö: Ucuo tedäcuähuoca'a cuä'ca jo̧mȩ ja̧rȩyu̧ pädi'äcujä̧, chu̧ru̧hua̧ ru̧hua̧. Ttöcu eseu cu̧ja̧ pä'ösä." ⁵ Ru̧hua̧ David Bahurimnä̧ ichiomenä̧, juorö ya̧tȩ rä'opinö̧e Saúl ahuaruhuä isotö i̧sa̧, ja̧u̧ i̧mi̧mä̧ micuinö̧ Simei, Gera i̧tti̧ ji̧na̧'a̧. Ja̧u̧mä̧ rä'opö surojönä̧ huo̧pä̧ya̧ 'chui̧nö̧. ⁶ David'rö'inä̧ ido'quinä̧ icuinö̧, o'catoi'önä̧ ru̧hua̧ u̧mu̧huäyotö suro̧do̧u̧ tturuhuotö, su̧ro̧do̧u̧'inä̧ ja̧hua̧ta̧'a̧nö̧ churutä tta̧'a̧rä̧tö̧ ru̧hua̧ u̧huo̧jua̧'a̧nä̧ ieruhua'anä̧ ttö̧jo̧cua̧'a̧nä̧'inä̧. ⁷ Simeimä̧ pä̧icu̧nä̧ surojönä̧ huopinö̧, "!tö'ipächi, porömä̧ tö'ipächi, ttö̧ja̧rö̧ cuähuä i̧sa̧, ucu ttö̧ja̧ recuätörö cuä'ähujijä! ⁸ TU̧RU̧HUA̧TÄ̧ ja̧'a̧ ucuturu ro̧'epi̧nö̧mä̧ Saúl töcönä̧ ahuaruhuä tottepinö̧'inä̧, ja̧hua̧nö̧ jȩpö̧tä̧ ucumä̧ ruhuo hue'öjä. TU̧RUHUA̧ iyinä̧cujä̧ ruhuo'inä̧ Absalón u̧mu̧nä̧tä̧, cui̧tti̧'inä̧. Jitä ucu'inä̧, u̧su̧rä̧i̧sa̧ juo'öjä, jua'amä̧ ttö̧ja̧rö̧ cuähuä i̧sa̧ cua'attö̧." ⁹ Ja̧u̧nu̧ o'ca'a Abisai, Seruvia i̧tti̧mä̧, ru̧hua̧rö̧ pä'inö̧: "¿Tta̧'a̧nö̧ pä'ö pide ähuiri 'corujuoächö jä̧i̧nö̧'a̧nö̧ hua̧mä̧ chu̧ru̧hua̧ ru̧hua̧rö̧mä̧ suronä̧ pä'cha'ajä̧ttö̧? Ye, ja̧hua̧nö̧ jö̧ttö̧mä̧ ttötä ú 'cuiopö icu chi̧'chä̧cu̧." ¹⁰ Ja̧hua̧nö̧ ja̧'a̧nä̧ ru̧hja̧mä̧ pä'inö̧: "¿Servia chi̧tti̧mu dä̧bu̧ ucuturu tochö'anö̧ ja̧'a̧jä̧ttö̧? ttötö suronä̧ huopätöjä 'cua̧ra̧'a̧ TU̧RU̧HUA̧ pa̧jä̧u̧: 'David'rö surojönä̧ pä'ätucui'. Ja̧hua̧nö̧ jö̧ttö̧mä̧ dijä̧ttö̧ JA̧U̧RU̧ päö'anö̧ hua̧mä̧, ¿Dä̧bö̧ ru̧hua̧rö̧ suronä̧ päcua'ajä̧ttö̧?" ¹¹ Ja̧hua̧nö̧ ja̧'a̧ttö̧, David pä'inö̧ Abisai'rö, ja̧hua̧ta̧'a̧nö̧ o'catoi'önä̧ u̧mu̧huäyotörö'inä̧, "topi, chi̧tti̧rö̧, ttu chidepättö uhuäpächäji cha̧'cua̧rö̧'inä̧ ȩmu̧'a̧nö̧ hua̧. ¿Ja̧hua̧nö̧ ja̧'a̧ttö̧ Benjamin ttö̧ja̧sa̧mä̧ suronä̧ usu̧rä'i̧sa̧ juodiyarötä pä'ö? Ja̧'a̧tä̧ topirö, surojönä̧ huopö ö̧ja̧'a̧nä̧, TU̧RU̧HUA̧TÄ̧ ja̧hua̧nö̧ jȩtta̧ pä'ö huȩi̧nä̧u̧. ¹² TU̧RU̧HUA̧TÄ̧ 'cua̧ra̧'a̧, ttö chusurähua'a to̧ä̧cua̧mä̧, ja̧u̧tä̧ ja̧'a̧ ttörö surojönä̧ 'cuäopäjí adiunä̧tä̧ jȩä̧cua̧mä̧." ¹⁷ Absalón pä'inö Usairö: ¿Ucu jö̧ta'anö hua̧ tä̧ji̧ cua̧hua̧ru̧hua̧'i̧nä̧? ?Tta̧'a̧nö̧ pä'ö 'cui̧'cho̧ca̧'a̧jä̧ttö̧ ja̧u̧cu̧mä̧?" ¹⁸ Usai pä'inö Absalónrö̧ ¡'Cho̧cö̧ päjisä! Tu̧ru̧hua̧ päinäcu̧ ötahuiyä ttö̧ja̧ ja̧'hua̧ta̧'a̧nö̧ o'catoi'önä umätö̧ Israelttö ttȩmi̧nä̧u̧rö̧; ja̧u̧tä̧ jä̧cua̧'a̧ pätecuächäcua'amä, ja̧'hua̧ta̧'a̧nö̧ ttömä ja̧u̧tä̧ ö̧jo̧mȩ chö̧ji̧pä̧cua̧sä̧. ¹⁹ Ja̧'hua̧nö̧ 'cuäopa'anä ¿Tiderö ppädädärä̧cua'attö̧? ¿Ppädädö juiyö'anö ja̧'a̧ cui̧tti̧ ä'cattömä? Ucu cuä'o ö̧jo̧mȩttö̧ ppädädinö'anö, ucu cu̧jo̧mȩttö̧'i̧nä̧ pä̧dä̧dä̧rä̧cua̧jä̧. ²⁰ Ja̧u̧nu̧ o'ca'a Absalónmä, Ahitofelrö pä'inö: "Jȩtä̧cuȩ tö'cö ji'ähuitö. ²¹ Ahitofelmä Absalónrö̧ ädätinö: "Cuä'o umöhuäyotö irecua̧mö̧cu̧ ä'äji, ruhuode tta̧ttä̧ra̧ pä'ö ö̧jö̧ni̧'i̧nä̧u̧cu̧, Israel ttö̧ja̧ o'catoi'önä ttä̧ju̧cuä̧cuo̧tö̧ cuä'o ucuru öjö'cö juiyönä juocuächäjimä. Ja̧u̧nu̧ o'ca'a, o'catoi'önä ucucu ka̧cuä̧tö̧mä̧ yabonötä̧ ttujuruhuächäcuotä." ²² Ja̧'hua̧nö̧ ja̧'a̧ttö̧ ruhuode huä̧me isode o̧ta̧ttö̧ Absalón ojusode aditinätö̧, ja̧'hua̧nö̧ ttaditäja'a Absalónmä Israel ttö̧ja̧ to̧ttä̧ra̧'a̧nä̧ jä'o umöhuäyotö irecua̧mö̧cu̧ ä'ä'chinö. ²³ Ja̧'hua̧nö̧ ja̧'a̧, Ahitofel ro̧'ȩpö̧nö̧ jiähuäjimä, ja̧u̧nu̧ mo̧ro̧tä̧ i̧jȩcuä̧chi̧na̧'a̧, ja̧u̧ ttö̧ja̧sa̧nä̧ TÖ̧Ä̧NÄ̧HUA̧ ucuocua'a 'cua̧rö̧nä̧tä̧ ä̧ju̧cuä̧ja̧'a̧mä̧. Ja̧'hua̧nö̧tä̧ topinätö̧ ta̧ju̧cu̧äyotö David'i̧nä̧ ja̧'hua̧ta̧'a̧nö̧ Absalón'i̧nä̧, o'cajuiyönä Ahitofel ro̧'ȩpö̧ jiäumä.