¹ Yani na tie yan-yina saakua yennu tuan yal e k Asaaf yin. ² N yiin k tien yennu k yikn a, n yiin k tien yennu k u caan tubt k gbiin. ³ N palbiil daal ninŋ n tuun kpaan yonmdaanɔe nyiaɔk, n tuu mei k k bakt, k n siek k saak balunŋ. ⁴ Mii tiat yennu po, k n kuli, min duki duki k tan bak. ⁵ K a te k n ningbant k tab liel, k n ŋan ŋmat k n k pak. ⁶ K tiatl sianyuo daa po, nan bina nba gaal k l wei na po. ⁷ Nyiaɔk, n tiatl n yani po k duki l po n pal ni, k duki k kpaan. ⁸ Yonmdaanɔ kpan ji kpaa tuba e nan yuo nba kaa gbennu? U ji kan ban k gbiint ii ? ⁹ U gotŋanu ji gbenne e ? Waa pak lin nba ji piine l bina nan l bina ni ii ? ¹⁰ Yennu ji tanm nibatinu po ee ? U wutuol ninŋ, u tanm u sukl po ee? ¹¹ N yet a: lin nba tie n fala tie a yennu nba be sanpaapo na ji k tie nan laa din te na. ¹² N sii tial kaagbennu tuona po, k maan n tian a yaayuo ni baktnaɔnŋ tuona po mantk. ¹³ N sii duki a tuonn kul po. N sii duki a tuongbenŋa po. ¹⁴ Yennu be ni e.Yenlann po e yab nan yennu na . ¹⁵ Fin e tie yennu nba tuun baktnaɔnŋ tuona. A te k nibuolu buolu bann a panŋ. ¹⁶ K jii a nuu k fiel a niib, saakɔb nan sosef waas. ¹⁷ K nyun la a, oo yennu k nyun la' a k daa balmɔni k buotsunsunt la'a k jekl. ¹⁸ K sanpagbana ŋaa k nyun sut. Kpeni ni saak tian sanpagbant ni wa. Namɔni, k pieni yat yuuk l kul po. ¹⁹ K a tatiani tian tajapenni, k tanyiknti yent dulnya, k tinŋ danm k jekl. A sonu din be mɔkl ni e, k a sonbit be kpengbenŋa ni, k b ji k bant a fuuna. ²⁰ K a kpaal a niib nan bonkobt na Muois nan Aalon nu ni.