¹ I da maa fak yennu, i bia da caant ciceli, i da maa pata k bia jit tana k tie yennu, i bia da caant siala tanne ki jiant'ɔ k maan n die yonmdaanɔ i yennu e. ² I tien nan Saaba tie fuon daal, i dia ma ne be sian nba nan cɔlint n tie yonmdaanɔ e. ³ I dia n senni , ki bia ŋanm ki cɔlin n senni. ⁴ N saa te k saak n ba yaa luon yuo nba k lin te k bonkukuot nba be tinŋ ni n nan k tiini n lon. ⁵ I saa buol i dii k saan tuu kuatu yuo ki bona kuatu saa saan tuu bulu, i si mɔk jiet boncian, ya kua duo nba ni sial kan tie ni. ⁶ N saa te i binbenŋ i ŋan i dual sial kan baal k mab ni n saa buon bonkob biit b kan baal nan toab i paak. ⁷ N saa bel i datai bin cial, ki bia saa kpib. ⁸ I niib banŋmu saa wei b niib kobik bin cial, i kobik saa bel b niib tusa piik, k tan kpib. ⁹ N saa kɔn i paak n saa tuli waas bonciann n si dia n mɔpoti na ni yuo kul. ¹⁰ Ya sii jaan linba sii yab bonciann, k yin fit ki be nann lin wei ki taant bokpela , i tuu saa nyin bokpela ŋaa kuan bonpaana. ¹¹ N saa tien n binbe buol i sunsukni n bia ji kan tunn i puol po. ¹² Min nan yim si som n sii tie i yennu ki mun tie n niib . ¹³ N tie yonmdaanɔ i yennu e, wunba yin ni Ejipt duo ni ki ji k tie daba , maa din biil panŋ nba k Ejipt tieb din mɔk i paak na, i sii sonm nan yugontl. ¹⁴ L i tie kik cɔlin n k dia n yiikot faanu. ¹⁵ Li tie ki nyik n mopoti na k bia lu n senni k nyik n yiikot nba nyii n buol, ¹⁶ I saa la ma saa dat i tuba bianŋnba ma saa tunn i paak nan ŋmatu, kuun nan gbanantont, bona saa di ninbina k mua gbanant, i bul ŋaan i kan jii sial : I datai saa di l kul. ¹⁷ N saa tunn i paak, i datai saa kɔn k paaki, bin nba nanmi na bi saa paak i waas k i sii tiin k sua k bieli. ¹⁸ Nan i kul na li tie k i k gbat n maan n saa dat i tuba k i cie nan taal munlole na i biit paak. ¹⁹ N saa biil i yudant panŋ, n saa te k sanpaak n wakl nan kut na. K i tinŋ mun saa wakl nan lik tann na. ²⁰ I saan gbenn i panŋ ŋaan i kan la sial, tinŋ kan nan sial, k tiini mun kan lon sial a luona. ²¹ Li tie ki yet k k duu n paak, k k luon yin sokl n maan n saa dati tuba k l cie nan taal mun lole na i biit paak. ²² N sa baal nan bonkob biit k bin k bin kpi i waas. K suol i i bonkobt k tennib waam na, i sɔni si tie tanbini e. ²³ Nan lin nba kul i ki nyik k lebt i binbeŋ k bia nyik n, ²⁴ N mun kan nyiki n saa dat i tuba k l cie nan taal munlole na i biiit paak. ²⁵ N saa baal nan tab i paak, k biil n mopoti na, i taan lieb i duo ni yuo nba n saa te k niikuk n baal i paak k n saa jii tie ni i datai nunm ni. ²⁶ N saa waan i jiet tulu, i puob piik tuu saa lakin ki pul panu diiu k yenkua ni k i tuu saa biit jiet wan wan k tul lieb k i saa libin dii l kul, ŋaan k kon bia mɔk i. ²⁷ K li leki tie linba tul yun ŋaan k i k sak gaal n sennu. ²⁸ N sii be nan wutuol ,ki ŋmant i paak, k te k i tubtatu n pukin taal fuunu munlole k gal sinsin yal na. ²⁹ K kon tan saa paak i k lin te yin ŋman i bonpoi nan i bonjai. ³⁰ N saa biil i tingbana nba be kunkona ni, k bit i bonnunubit binbinta, k lu i gbanan-kpiena na i pata nba baa na paak. ³¹ N saa te k i doi n kpant langbent, ki biil i jiant bua, ki yiet i malunŋ. ³² N saa biil i duo, ki lin yal lut i datai nba saa kua lenŋ na. ³³ N saa te k tɔbii n faai, k yati k yin kua digbangana ni, k i ti nii n bial yann k i doi n kpant langbent. ³⁴ Ki tinŋ na saa la fuon bina nba ki bo k tulua fuon na k lin dual yann k foi, ŋaan k i be daabisin i datai tinŋ ni. ³⁵ Yuo nba kul ku saa biil u saa la fuon k gaal waa tuu be. ³⁶ N saa te ki jaŋanni n kua yinm nba be datai tinŋ ni na, ki li leki tie k wounŋ daa tutuut paak ŋaan k yin cial i saa cial nan b waa bieli tɔb ninŋ na ki saa baa tinŋ ni, ŋaan ki dataak k waai. ³⁷ I sii liat lieb, ŋaan k sua k waai k i ji tan kan fit kɔn nan i datai. ³⁸ I tan saa kpo datai tinŋ ni e, ki datai tinŋ saa buonti. ³⁹ Yim nba saa tenn ki mɔk manfuol i datai tinŋ ni na tan saa di fala k man i yanbɔnn paak nan i yaŋanm yanbonm paak. ⁴⁰ L tie k bin mɔ kuɔŋann k ban b biit nan b baanba biit nba k b tun k tulin k biilin. ⁴¹ B biit paak b saa bann nan n donn wutuol b paak k saannanm b datai tinŋ ni bin sikin b paal nba waaki na a bin pa b biit paak. ⁴² N saa tial n mɔlol nba k n lol nan Jakɔb nan Isak nan Ablaham na k ŋanm tial n mɔsonn nba k n senn nan n saa tul tinŋ na. ⁴³ B saa nyik tinŋ na lin dual yann k foi k dual salwɔk k b k kpia leŋ k bin mun pa paati na baa yet k gaal n wannu nan n senni na. ⁴⁴ Ŋaan baa lek daa be bi datai tinŋ ni na n kan nyikib yann, n bia kuotib, k l kan te min nan ŋanm mɔlol n pot. K maan min i tie kagbennu bi yennu . ⁴⁵ N aa ŋanm tiat n molol nba k n din lol nan yajanm na ŋan na k din nyinib Ejipt tinŋ ni a digbana laa nan n tie kagbennu b yennu. ⁴⁶ Lin nba kul te k wannu nan senni nba ki kagbennu din tul Mois Sinai jual paak, a wun wann Islael tieb na.