¹ Kaagbennu pak nan Muois, Sinnaii jual paak k yet a: ² Pakin tul Islael waas, k yet' b a: yuo nba ki i kua duo nba yaa ni k n tieni na ni, tinŋ na saa foi, k li tie fuon k tul kaagbennu baakl. ³ Bina ŋanlob sinsuuk ni a tuu saa bul a kpaab, k tuu saa ŋanm a tilɔntii nba k b yi Finŋ na, k tuu saa puol l luana. ⁴ ŋaan bina ŋanlole ninŋ sii tie fuonme, k tie yuo nba k tinŋ na saa fuoi k li baakit kaagbennu: a ji kan buul sial a kpaab ni, kuo k ŋanm a tiluontii nba k yi fiiŋ na. ⁵ A daa jaan jiet nba l bin baa k sua k buul na, k bia daa puaa fiiŋ luona nba k b k ŋanm na; k li tie fuon binne k tul tinŋ na. ⁶ Yaa lek k uo tinŋ na li binn na ni, ŋaan tinŋ na saa nan jiet k tuli bina nba gal na ni, k l saa janŋ fin nan a tuontunjua nan a tuontunpuo, nan a daabl nan saamɔ nba kul be a ŋaak ni, ⁷ Nan a bonkobit nan duo nani bonkobt, k sii tie jiet k tieni k i si di. ⁸ A saa kan bina ŋanlole l taal munlole, k bina na kul sii tie bina piinnan nan bina ŋannyia. ⁹ K ŋmaalii ŋanlole daa piik daal, sii tie biit ŋaanml daale naatuuna sii pieb i tuu saa peb naatuuna i duo na kul po. ¹⁰ Binn nba wa bina piinymuu na sii tie nyikcabu binne i saa yaat k mɔnt niib kul nba duo na ni nan woluku ji be ; l sii tie bin ŋanne k tuli; sua kul saa ŋmat gaal u yent , k sua kul bia saa ŋmat kun u ŋaak ni u danm buol. ¹¹ Bina piinŋmuu si tie nyikcaabu k tuli, i jii kan bul kpaanti, kuo ii jii kan jaan jiet nba k i k bul, k l piaa i tiɔnn k bia kan puol fiiŋ luona nba k i k ŋanmi. ¹² L tie nyikcabuu binne k n tuli k sua kul sii goli binn manŋ k u tie kasie. Ii sii di jiet nba k i jaan i kpaant nie. ¹³ Nyikcabu binn na ni, sua kul yent saa ŋat u buol ni. ¹⁴ Wunba kɔi u lua tinŋ kuo wunba daa u lua tinŋ u lua buolu ni, u ŋmat jiin'ɔ k jii daa ŋmaab u ninja manŋ. ¹⁵ A yaa daa, fan got k laan tinŋ manŋ saa nan jiet bina ŋanŋaae k saa tuu nyikcabu binliel nba baat na, k yin fit k di daauk. ¹⁶ Lii tie k bina na yaabi, a saa pukindaauk, k maan li sii tie jiet nannuu nie k b saa kuat tinŋ na. ¹⁷ Sua daa kpann u lua ŋmaab'ɔ. sua kul i mɔk yentinnu binbenŋ u ni, k maan min kaagbennu, i ynnu e piake piak na. ¹⁸ Wein n sennii k bia sak n wannu, k i sii be i yaanma nie tinŋ nba k b saa kua nan ni. ¹⁹ Tinŋ na sii naan jiet, k i i laat di linba kul k i luon, k sii be i yaanmani. ²⁰ Lii tie k i boi: t saa di bee bina ŋanlole manŋ ni, k maan t kan bul, t bia jaan jietii? ²¹ N saa tien yetŋanm bina ŋanlob na ni, k jiet saa naan bina ŋanta yal. ²² Bina ŋanniin ia i jisa bul jiet, ŋaan i sii di jekpelte, k saa tuu bina ŋannyia ni , nan yuo nba ki tan saa jaan jepaant. ²³ I daa kuat tinni k caabni, k maan tinŋ tie n yale, k i tie nan sanme n buol, k n tuli k i kua lenŋ. ²⁴ Duo nba yaa ni kul k i saa yent k li tie i yal, i mɔk yaak k tan saa ŋmat daa tinŋ nba k i buo kuat. ²⁵ Lii tie k a ninja tie lalas dannɔ k kuat u yiaal k tul sua. wunba mɔk yikuo, k tie u ninjannyial saa bal k ŋmat daa yial nba k u ninja kuat na manŋ. ²⁶ Lii tie k nilɔ k mɔk ninkpiimɔ nba saa nmat daa k jen naan ni, u tanŋii mɔkt yuo nba, u saa fit ŋmat daa tinŋ manŋ u tiaɔn. ²⁷ U saa kan bina nba k u kuat k saa tuu nyik cabu binne, k ji fit la nba k wunba daa na saa la, k paau l likili ŋaan ji fit yent tinŋ na. ²⁸ U k mɔk sial k saa ŋmaat daa u tinŋ nba k u kuat na, l sii be daalɔ na nii ni e nan yuo nba k nyikcabu binn na tan baal; tinŋ na ji saa nyi daalɔ na buol k ji ŋmat k tie wunba daan kuat na yal. ²⁹ Lii tie k jasua kuat u ŋaak, k l be duo nba k b ma juonn k liint. u mɔk yaak wun ŋmat daa la nyi daal nba k u kuat na k saa tuu binn yen kua. ³⁰ ŋaan li tie l ŋaak be duo nba ni k b maa juonn k liint, ŋaan k u kan kit ŋmat daa k saa tuu ba kua dal nba k saa gbenn binn. l saa kpankin yuo kul wunba daa nan u yabuonna buole. u kan fiit nyi nyikcabu ni. ³¹ ŋaan ŋei nba be doi nba ninŋ k l ma yuonna na, i jiil k li tie nan salwaat na. bin nba yien na sa fit ŋmat daa b ŋei, ŋaan lii tie k b k fit ŋmat daa i tuu jim nyikcabu binn ni. ³² ŋaan Leefit nba buolu ŋaalin tuu saa fit ŋmat daa b ŋei yuo nba kul, k maan linba be b doi ni tie b yalaa e. ³³ Wunba daa Leefit nba ŋaak, b saa ŋmat jiinɔ nyicabu binn ni ŋaak nan duo nba k b yien na, li tie k b k fit ŋmat daa. k maan Leefit nba doi na ni, b ŋei tie b yale Islael waas sinsuuk ni. ³⁴ ŋaan kpaant nba kpia k kook kiint Leefit nba doi k an fit kuat, k maan li tie b faal mɔk.mɔk nan mɔkmɔk ³⁵ Lii tie a ninja talas balɔ, k u nii banŋ k u kua kpia nan na, fii sonmtua, a bia si tuun n ae k tien buolŋaanɔ nba be i duo ni, ŋanne saa fit t k i linbin ki be. ³⁶ A daa ŋaan nyuat linba k a tulɔ kul paaki, ki tiin a yennu jaŋmaani, ŋanne saa fit t k fin nan a ninja si be nan lieb. ³⁷ A daa te k u pa nyuat likilii nba k i kpentɔ na k bia daa puuki nyuat jiet nba ki kpeetɔ na paaki. ³⁸ Mine tie kaagbennu , a yennu, k din nyi naan ni Ejipt duo ni, a man tulii kaanaa duo, k mii tie a yennu nan balmɔni. ³⁹ Lii tie k a ninja kua k kpia nana k k talas baalɔ, k u koii u monŋ k tula, a wuntien daabl, a daa t k u tuun daabtuona nan dabl na. ⁴⁰ U kua nan na nan jua nba k a paou na, k u tuuma, k saa tuu nyikcabu binn. ⁴¹ L sakl manŋ ni, a saa t k u nyi a ŋaak ni, ŋua nan u waas, k b saa ŋmat u danm buol nan yijanm faal buol. ⁴² K maan ŋanm tie n tuontunnae, k n din nyinnib Ejipt tinŋ ni, ŋanm, sua ji kan ban kuatib k bi be daabisin ni. ⁴³ A daa diab diabik, ki mɔk yikuo b paak, ŋaan k tiin a yennu jaŋmaani. ⁴⁴ Niib nba kook lintii na, a saa fit daa daabjua kuo daabpuok b buol. b kunkua buole k a tuu saa daa daabjua nan daabpuok. ⁴⁵ I bia saa fit daa buolgaani nba kua nan ni na waas, k niib nba k b maal'b i duo ni na saa kpant i faal. Ii saa fit jiib k tul i waas k bii tie i waas faal. i sii diab nan daaba na mɔkmɔk nan mɔkmɔk. ⁴⁶ ŋaan i ninjanm, Islael waas buol ŋannin, sua kan fit mɔk yikuo u lua pak k dinm kenkenmi. ⁴⁷ Lii tie k buolgaanu kua na ni k tan mɔk, k a ninjaa taalas baalɔ k u kpia buolgaanu, k ji kuat u mɔnŋ k tul buolgaanu nba kua nan na kuo buolgaanu na ŋaanisua, ⁴⁸ Ii mɔk yikuo nan i ŋmat ŋanm daau, lii tie k u kuat u mɔnŋ u ninjaa sua saa fit ŋmat ŋanm daau k jen nannɔnaak ni. ⁴⁹ U baa naa bik, kuo u baa naa bik bija, kuo u ninjanm jenɔ saa fit ŋmat daau k jen nannɔ, kuo u mɔnŋi tuun k tan mɔkt mɔkint saa fit daau u mɔnŋ. ⁵⁰ U saa yet wunba daau na, k bin kan bina nba k u kɔi u mɔnŋ na k saa tuu nyikcabu binn; likilii nba k u saa pa naan bin ŋaan na sa kan bina nba k b daau e. li sie tie nan ba tuu jii nilɔ tuonn k paau biaŋba nae. ⁵¹ L ii tie k bina tenn k yab, u saa pa k janŋ bina nba k b buo daau e. ⁵² Lii tie k bina tenn k wal k saa tuu nyicabu binn u saa kan pann manŋ k pa jan bina nba k b buo daau na. ⁵³ U sii tie nan tuontunnɔ nba k b tuu ji'u k paau binn ninŋ biaŋnba nae k saa tuu l bina. k wunba k u be u ŋaak ni na daa maabɔ nan nimɔnn i ninbina ni. ⁵⁴ Lii tie k sua kua k fit daau nan ba wann na buolu, b saa ŋaa ŋua nan u waas nyikcabu binn nba bat na ni. ⁵⁵ K maan min yaa buole k Islael waas tie daaba, k tie n daaba nba k dan nyinib Ejipt tinŋ ni na. mine tie kaagbennu, i jennu.