¹ Job gaal maan k jeta: ² N ban gbat kpaanii buolu wa, i tie kpaatieb nba baat nan wutuole. ³ I kpan yaa yii piake yuo kulii ? I sii luon mobonjuontkla yuo kulii ? ⁴ Lii bonii tie k i b n binbenŋ na buoluni k n mun be i binbenŋ na ni, n bo saa fit yet yaa piak linba na kulawa. ⁵ N bo sii gumii n yule nan subinii, k pak na ni mobona bonciann. Mob ninŋ cekinii kin bo saa cekinii k danm n mogbana l manŋ i pala. ⁶ Ŋaan ni-i pak sial, l k sonmtin, k lii tie k n ŋmini, l k maakit n gbanantont. ⁷ Yennu, a te k n baka, k bia te k b kpii n ŋaatieb. ⁸ A suolima k tie n dataak. N tie gbounŋ nan kpaba kuukuae, k niib jii k l tie n tuonbiit nyinn. ⁹ K jii wutuol k pat patin, k goliin nan nanŋ. ¹⁰ K niib salkitin, k sie lintilin, k pebitin tanpakii. ¹¹ Yennu e jii k kubinin nibiit nuu ni. ¹² N din be palmaatil ni, ŋaan yennu suol n tulu ni, k but butin k nannin. Li mine k caan k n tie jabenn. ¹³ K yekitin pienii k nyii n lokil kul po, k tie pienii nba kua saatin k tiennin danŋ. Linba na lek, ŋaan u k mɔk ninbatinu nanin. ¹⁴ U tienin danŋ yuo nan yuo, k lekinin nan kunkɔnkɔnnua na. ¹⁵ K n mɔ fabin k lia liant nba tie bɔtuok liant, k kɔnŋ din dann, k kal tanbiinii ni, ¹⁶ K mɔ, k n ninbina tan mɔnn, k faant. ¹⁷ Ŋaan k n k tun jat-tuonsial, k n yenmialu tie balmɔnii. ¹⁸ Tingbounŋ, a daa bɔlii fala nba baalin, a daa te k yiinii nba n nyi k l tie balmɔnii po na kpakint yannii. ¹⁹ Sua be yendɔnŋ ni k saa set n paak, k pak tulin. ²⁰ N yuatinba laame, k n nunii, nyi ninnyuut, a yennu n la . ²¹ N luon sua n set n paak k balin yennu, nan nilua tuu balin u yuak paak bianŋinba na. ²² N bina na saa e k ji sɔnu nba saa ŋaan k jent na.