¹ Islael din tie nan daantiionti nba gbie nan lɔna na, k b lɔna puuki , k b maa binbinta k jiantil k puuki ku duo ŋanmt puuki, k bia ciant ciceli k puuki. ² B tie niib nba k b pala ni k ŋa: b saa di faala kaagbennu saa biil b malunŋ binbinta na k bia wei ciceli na. ³ K b sii yien'a, t jii k mɔk kpanbal k man k baakt kaagbennu na: k kpanbal ŋan sii tie bie k tul t'i? ⁴ K biak maan nba k mɔk nyuat, k set fɔk mɔsona, k lol lol yana: l munb tubdatu sii yaab nan muabit nba tuu paa kpaat ni na. ⁵ K jmani sa suol niib nba kua Samali duo ni na nan Salama naaja biik n nba jii kaa Bethaven na paak, niib na jii sii be pal bonn ni b tingbann na paak k b maatieb saa jiekl u paak, nan u yudant nba jii kaa b sunsuk ni. ⁶ B saa ji b tingbann manŋ k saan nannɔ Asili, kpabaal jalieb buol. E flaiim, yan saa ŋmat k Islael saa di fei nan baa tuun lin nba na . ⁷ B saa ji Samali kpanbal k yat nanɔ, nan daauk nba tuu puuk nyun paak bianŋinba na. ⁸ K puucianfei nba be Bethafenn kankonn yul paak Samali k Islael tieb jiantl saa biil a; k kunkonni nan muat saa pia l malunŋ binbintl paak, k kpatl k saa yet juat a bakin t paak : k bia yet kunkona a bakin t paak. ⁹ Yennu ŋanm yet Islael tieb yaa din be Gibea nan din na i bia lek daa k nyik biit tuu muu. L paak b sii sie sanpapo k tɔbi faab. ¹⁰ N saa daat b tuba bonciann, niib bonciann saa taan lieb k kɔn nanm, k b saa laa tubdaatu b tuonbiciaŋ paak. ¹¹ Eflaim tieb tie nan najabil nba sie, k luon dii muanu na, ŋaan n saa suol u tuulu ni. K Islael tieb nan Suda tieb bi dial naakul lii yat tant. ¹² Bul man balmɔni k jaan nikpabɔnŋ, ŋant man kpaa paal! l janŋ nan yin kpaan kaagbennu waa! k wuu baal nan balmɔni k yaat i paak. ¹³ Ii kuo biit, i saajaan tubdatu, i tanoant luana i na k maan i duu i tiɔŋ panŋ paak e, nan i kunkɔna nba yaab na paak. ¹⁴ B saa faa i niib tɔb, k i doi nba paal na kul saa bill, nan baa di biil Salman Bet Albel, daal nba k b din faa tɔb k kpi puo nan u waas na. ¹⁵ K yimm Betel tieb linba saa baali e na. K maan bonbilankante nba ki tuun na paak lii yiet sanŋɔk,i k tɔb piin Islael kpanbal na saa kpo.