¹ K Islael tieb na jii Josef k saan nanɔ Ejipt, k saa kɔiɔ k tul potifal k u tie kpanbal falaon tuontunm saakab yenɔ, k din tie kpanbal ŋaguula saakuaa. ² K yennu be nan Josef, k u laat nyannuu k kɔa u canbaa Ejipt nilɔ na ŋaak. ³ K u canba na la nan yennu be nanɔ, k l'nba kul tun k l pukiɔ nyɔat. ⁴ Potifal din mɔk palpienn nanɔ k jii u tienɔ u mɔnŋ ŋaak guutua, k tin t k u golii u ŋaak nan l'nba kul k u mɔk. ⁵ Laa nyii k saa k yennu tien piisn Ejipt nilɔ potifal paak, nan lnba kul be u ŋaak ni nan u kpaab ni k maan Josef paak. ⁶ K potifal jii l'nba k u mɔk kpet Josef, k u baka kaa sial kul ni sie jiet nba k u di na. Josef din nɔl k bia ŋan. ⁷ K l jii yuo waan k potifal ŋaapuo piin k luon Josef, k betɔ a wun ŋaan k bin dua nan lieb. ⁸ K Josef yet ŋaan betɔ a fotil n canbaa baka kaa l'nbakul be ŋaak na ni pa k maan nbe nna. u jii l'nba k mɔk k guun mine. ⁹ N mɔk panŋ nan yiiko ŋaak na ni nan waa mɔk nae. K u k wuunin siali, sie fin kua. K nlee k n saa tun boncicon tuonn na k biil yennu? ¹⁰ ŋaan k u kpan boi Josef daal ku, ŋaan k u tuo yet. ¹¹ Dasial k Josef bial ŋaak ni u kuukɔa a wun tun u tuana. K tuontunna nba be ŋaak ni na sua k ba. ¹² K puo na suol Josef cincenn ŋaan yet a baat k dua nanin. K u fat cial k nyii nanyel, ŋaan nyik u cincenn manŋ puo na nuu ni. ¹³ Puo na nba la nan Josef nyik u cincenn ŋaan cial nyii na. ¹⁴ K u yiin u ŋaatuontunna, k yet a gotil na man. Heblu nilɔ na, wunba k sɔlua baal nanɔ ŋaak na ninŋ na sukiite . U kua n diiuk ni a wun jan k dua nanme, k n tant k yikn sanpaapo. ¹⁵ Waa gbat k yikn, k u cial k nyii nanyel ŋaan nyik u cincenn n buol. ¹⁶ Puo na din bol cincenn nae nan u canbaa nba tan kpen. ¹⁷ K u bia wannɔ l bannu, k yet a Heblu daabil nba k a daan baal manɔ n na na kua n diiuk ni k sukiln. ¹⁸ Maa yikn yuo nba, k u cial nyii nanyel, ŋaan nyik u cincenn n buol. ¹⁹ K Josef canbaa wutuol duo. ²⁰ K u te k b suol Josef k kɔanɔ dansalik. K u be sianba kpanbal dansalii be na. ²¹ ŋaan k yennu be nan Josef k tien piisn u paak k te k dansalguulɔ na pal mei u paak. ²² K u te k Josef tie dansalkɔala nan kul saakɔa, k bia te k mɔk yiiko k golii l'nba kul tuun dansalik na ni. ²³ Dansalguulɔ na baka din kaa l'nba kul k pet Josef na po.; k maan yennu din be nan Josef, k be k u laat nyannu l'nba kul k u tuun ni.