¹ K Sakɔb gbat Laban bonjai waas nba paakɔ k yet a Sakɔb gaal t baa faal kule, k t baa faal manŋe k u ji k tien lik daanɔ. ² K Sakɔb bia got Laban munŋ po, k la k l ki tie nan la tu tie bianŋnba na. ³ Ŋanne k kagbennu yennu yet Sakɔb a: ŋmaatl a ba nba duo nba k b maala na ni, k n si be naana. ⁴ Sakɔb tun k b Saan yiin u ŋaapuob lasial nan Lea, b din be kpaab ni u bonkobit buol. ⁵ K u yet ba: N laa, I baa ji k goliin ningot ŋanŋ nan yuonba daan gaal na, ŋaan n ba yennu na be naani. ⁶ I mɔnŋ ban nan n tun k tul i baa nan n panŋ kule. ⁷ Ŋaan k i ba kpaalin, k kpint n paauk fuunu piik, ŋaan yennu k cabɔ a wuun tienin bonbiili. ⁸ Yuonba k u din yeta: Buuŋmata na sii tie a paauko, bonkobit nba kul sii mɔk kob nmata si tie a yaale. U bia din tu yeta ! buuk nba kul mɔk kobŋmata na tie n paauko, buuni na kul din tu mal buubik ŋmata. ⁹ Yennu din gaal i ba bonkobit na k tul mina e. ¹⁰ Yuonba k pei na din tu kua naauk yuo na, n tu gikit got san paapo k la yelintu ninn, nan bujai nba do bunaani na tie kob ŋmata e. ¹¹ K yennu malaka yetin damiit ni a! Sakɔb! k n jiina a minna a! ¹² K u yeta: gotl yot sanpaapo, buujai nba kul do buunaani na tie kobŋmatae, nan bon pupoli, k maan n la linba kul k Laban tie a. ¹³ N tie Betel yennu e, sianm nba k a din caan tann k mann maalunŋ k tulin na. Mɔtaana, fiit k nyi duo na ni, k ŋmat kun duo nba k b din maala na ni. ¹⁴ Lasial nan Lea jiinɔ k yetɔ a: t bia mɔk sial k l tie t fal k be t baa naak na nii. ¹⁵ U k goliit nan t tie saan m na ka u ŋaak na ni, k maan u din kɔie te, k gaal liikli k dii? ¹⁶ Mɔkint nba kul k yennu ji t baa buol k tula na tie tinm nan t waas yaale. Mɔtaana tient linba kul k yennu yeta a fan tien. ¹⁷ Sakɔb fiil k te k u waas nan u puob jaak laaguni nba. ¹⁸ U din jii u bonkobit nan bonŋaana nba kul k u din mɔk, bonkobit nba kul din tie u yal nba k u din mɔk k daa be Padan-Alam na, k kun u baa Isaak duo nba tie kana na ni. ¹⁹ Yuonba k Laban saan a wun kuol u pei na, k Lasial kua jan u baa pata, ²⁰ K Sakɔb kpal Laban, k u k ban nan u saa Ciali. ²¹ U din cial nan linba kul tie u yaale, u din fiilee k puot mɔkl k saa Galaat jual po. ²² L daa ŋanta daale, k b din wann Laban nan Sakɔb ciala. ²³ U din yiin u waali k b wei sonm daa ŋanlole k saa baalɔ Galaat jual buol. ²⁴ Ŋaan l daal nyiɔk k yennu baal Laban buol daamit ni k yetɔ a: Suot a mɔnŋ k daa piak nan Sakɔb bonbil a mii bonŋanni! ²⁵ Lenŋe k Laban din baal Sakɔb. Sakɔb din caan u lanbonŋ jual na paake, k Laban mun caan u yal mun ŋua nan u waali Galaat jual maŋŋ paati. ²⁶ L yuo k Laban yet Sakɔb a: A tuumin be? bia paake k a kpannin k jii n bonpoi nan baa tu suol niib tɔb ni na k siet nanmi? ²⁷ Be e tien k cial k bɔl mi, k kpan nin, k ki paakin Siali? N daan bo sa caaba nan kpinkpanmuk, nan yaani, nan bonmumuate. ²⁸ A daan k te k n muat n waas nan n bonpoi tankpina! A daan tun jaat tuonna. ²⁹ N mɔk panŋ bonciann k sa fit tiena bonbiila, ŋaan a baa yennu na klon paak naanin k yet a: Suot a mɔnŋ k daa tie Sakɔb bonŋann kuo bonbiili! ³⁰ Mɔtaana nba k a siet na, a yan duukin a ba ŋaak powa, bia paake tien k a jan n paata? ³¹ K Sakɔb jiin k yet Laban a: N daan ŋmaan k bia duukin nan l paasial a saa fat a bonpoi e. ³² Ŋaan lii tie k a laa a paata manŋ sua buol wun kpo! T ninjanm na tuann, fan ji. Sakɔb din k ban nan Lasial jan u paata manŋa. ³³ K Laban kua Sakɔb lanbonŋ ni, nan Lea yaal ni, nan u tuontunna lanbont ni, k ki la siali. U din nyi Lea lanbonŋ ni k kua Lasial lanbonŋ ni. ³⁴ Lasial din jii u baa paata na k tien laaguni kaanu paak tinŋ po k wei kal l paak. Laban din got lanbonŋ na ni kul ŋaan k la Siali. ³⁵ K u yet u ba a! N yonmdaanɔ daa dont wuutuol n paak, k man fiit set a numpo, k maan n be nan puote. U din lon k k ki la paata na. ³⁶ Sakɔb kluutuol duo, k u kɔn nan Laban. k u ŋanm paakɔ, k yetɔ a: n tuun bonbilanne, k n biit tie bee, k a waan nan paal biili? ³⁷ Faa got n bona ninŋ yuonba, lannepoe k a la n ŋaak ni? Jiin l bont k bil n numm ni k n ninjanm nan nin janm n la k wann wunba mɔk mɔni ti banle ni. ³⁸ Gotl, bina piinle e na k n bial a ŋaak ni; a pei nan a buuni k ban boti; kn k ban ŋman a Pejaki. ³⁹ Bonsusuok k ban suol bonkobuku, l din tie n panne. ⁴⁰ Yensuuk ni naauk din tu mɔkin me, k waat dia nyiɔk, k guan din k mɔki mi. ⁴¹ Bina piinlee na k bial a ŋaak ni, k bina piik nan ŋanna k n jii tun tula a bonpoi banle na paak, k bina ŋanluob k n jii k kpaal a bonkobit, k a kpint n paauk fuunu piik. ⁴² Li din bo tie k n ba yennu na k be naanin, Ablaham yennu, Isaak yennu nba k n ŋmaamɔ na be naanin, a bo sa te k n siet a buol yanne. Yennu la n faala nan tuona nba k n tun tula nan nii na, k wonn k u won bu n buut. ⁴³ K Laban jiin Sakɔb k yetɔ a: Puob na tie n klasse, k b waas na tie n yaab, k bonkobit na tie n bonkobit e, k linba kul k a goli na tie n yal. K n saa fiit tien be-e dinna k b malib tingbonŋ na ni? ⁴⁴ Baat, k min nan finnin lol mɔlol kli tie siala min nan fin sinsuuk ni! ⁴⁵ K sakɔb jii tann k caan, k l tie sial b. ⁴⁶ Sakɔb yet u ninjanma a! jiin taana na man. K b jii taana k puon, k b dii kjiet tan puotl na buol. ⁴⁷ K Laban pul lenŋ Segal Saaoluta, k Sakob mun pul lenŋ Galet. ⁴⁸ K Laban yet a: taanpuotl na e tie siala dinna min nan fin sinsuuk! L paake tien k b din pul lenŋ Galet. ⁴⁹ B bia din yii lenŋe biak mis pa, k maan Laban din yeta: Kaagbennu i gooli min nan fin yuonba k t k laat . ⁵⁰ Lii tie k a tie n bonpoi na toonu, k bia jiin puo lieb k pukin b po, l k tie nilɔ ka si be ti sinsuuk ni, suot a mɔnŋ, k maan kaagbennu yennu e tie nin nan fin siala daanɔ. ⁵¹ Laban yet Sakɔb a: gotl taan puotl na, l taanpuotle tie siala k n senn min nam fin sinsuuk. ⁵² Taanpuot l na nan tann tialu tann nba k t caan na e tie t siala nan n kan ban yaakl l puol k piikina ni, k a mun bia kan ban yaakl i puol k tienin toonu. ⁵³ K Ablaham nan Nakol yennu nan b jie janm yennu, tie t balbuulɔ k Sakɔb pol nan u ba Isaak yennu nba k u din ŋmaamɔ na. ⁵⁴ K Sakɔb mann maalunŋ jual manŋ paak, k yiin u ninjuanm na k b dii. Baa dii gbenn yuonba, k b dual jual manŋ paak l daal nyiɔk. ⁵⁵ Laa yent saan nyiɔk ni yuonba, k Laban fiil k muat u waas nan u yaabuona taankpiina, k tien piisin b paak. Ŋaan siet ŋmat wa tu be sianminba.