¹ Isaak din yiin Jakob k tan fuontɔ palmaat'l fuontii ŋaan yetɔ a, daa kuant kaana tinŋ na ni biki. ² ŋaan saant Mesopotami tinŋ ni a yiaja Betuel duo ni k saa jii lenŋ bik, a yia Laban bipuo, k tant kuan. ³ Yabint yennu n tien piisn a puokuant manŋ paak, k tula waat bonciann k a yaabuona tan sii tie buolu bonciann. ⁴ Yennu n tien piisn fin nan a waat nan a yaabuona paak nan wa din tien piisn Abraham paak na, k a tan yent tinŋ nba k a kal tinŋ na; tinŋ nba k u din jii k tul a yieja Abraham na. ⁵ K Isaak te k Jakob saan Laban buol Mesopotami tinŋ ni. Laban baa din tie Betuel e. Betul mun din tie Alam buolu ni nibe. Laban e bia tin tie Rebeka yualɔ na. Rebeka mun din Tie Esau nan ŋua Jakob naa. ⁶ K Esau nba din la nan Isaak tien piisn Jakob paak k te k u saan Mesopotami a wun saa lon bi buolu ni bik k tan kuan na, u bia din gbat nan u baa tien piisn Jakob paak, k kpaanɔ nan u daa kuant kaana buolu ni biki. ⁷ K u ji bann nan Jakob sak u baa nan u naa mɔba, k saan Mesoptami. ⁸ K l yent u numpo nan u baa Isaak numm k gbuo kaana bonpoi na. ⁹ K u saan saa kuan Abraham bija nba k b yiu Ismael na bipuo, k u sann tie Mahalaf k u tie Nebayof niipuo. ¹⁰ Jakob din nyii beelseba, k gaal Halan poe. ¹¹ Yennu din saa siike, k u baal sial buol k bial lenŋ. U din dual k kpakn u yul tann paak, k guant. ¹² K damii k la cilu k l ti tinŋ ni k saa tuut sanpaak. K maalaka nba ŋmaan l paak k do yendonŋ ni, k bia ŋmaat siik tinŋ na ni. ¹³ L yuo na k u la k yennu sie k kpiau. K yennu yet a, mine tie yennu, wunba tie Abraham nan Isaak yennu? N saa jii tinŋ nba k a dua l paak na k tul fin nan a yaabuona. ¹⁴ A yaabuona tan sii yab k tie nan tanbiinii nae. B tan saa pɔt k kal lokil kul po, k fin nan a yaabuona paak n saa tien piisn nibuolu kul paak. ¹⁵ I m nan n sii be nana faa saa saan sianba kul k saa nyinna bonbiil ni k tan tunn jen nana nna. N kan nyikaani sie k n tan tun l'nba kul k n senn mɔsonn nan n saa tun na. ¹⁶ Jakob nba fiil guan ni yuo nba, k u yet a yennu be nna. U be sianba na ŋaan k n k mi. ¹⁷ Jaŋmaani din suolɔ bonciann, k u yet a nna tie yanputuk buole. L tie yennu ŋaak e, yendɔunŋ tammɔbe na. ¹⁸ Laa yent, k Jakob fiil sanyiɔk ni, k jii tann nba k u yul won kpaak na k caan k l tie tiln. K jii kpan k muan l yul paak. ¹⁹ ŋaan pul lenŋ Betel. Duo manŋ saan din tuu tie Luse. ²⁰ K Jakob pol senn mɔsonn k yet a yennu a lii tie k a sii be nanin k nyinin bonbiil ni sɔnu nba k n somm na ni, k bia tuln bondikal nan bonlialkal. ²¹ K n tan ŋmat jen n baa tinŋ na ni ni nan laafia, fin kuukɔae sii tie n yennu. ²² Tann nba k n caan k l tie tialu na sii tie a jiantu buol k l' nba kul ka tuln n tuu saa nyinn l bɔktu piik ninŋ yenn k tula.