¹ Malakaba banlie na nba baal Sodom yuo nba, k sɔa lot kal duo manŋ tamɔb ni. Waa lab na k u fiil citib sɔnu paak. U din baa fabin tinŋ nie. ² ŋaan yet a: n yomdam n balmie kuan i tuontunɔ ŋaak ni, k wuul i taa, k dual l'n yent a k yin fiil, k tuk'n ii sɔnu. K b jiin a, Aai, t saa dual nanyel poe sɔnu ni. ³ ŋaan k lot balm bonciann a k b tan baal kua ŋaak ni. U din pak u ŋaatuontunna k b tien paanu nba k datinŋ kaa lenŋ, k tien jaam k tulib. K saam manŋ ni jiet na. ⁴ Saamm na nba luon bin dual yuo nba, k Sodom duo manŋ ni jab tikil k tan luon ŋaak na. Duo na ni jab kulewa din tikl, jakpela nan naasimm kul. ⁵ Jab na din yiin lolt, k boiɔ a saamm nba baal a ŋaak nna a bin dual na be lia? Nyin namm k tin mun bann nib. ⁶ K lot nyi ŋaan luon ŋann saamm na paak. ⁷ K yet duo manŋ ni jab na a: N yɔatnba n balmie daa tuu mɔontant na buolu. ⁸ Gotilii, n mɔk sapaanmua banlie, b daa k mi dual nan jua kaawa. ŋaant man nyinib tuli k yin tumm yaa luon bianŋ'nba. ŋaan i daa tie jab na siali. B tie n ŋaasaamme, k l kpaa talas man nyinib biak ni. ⁹ K Jab na yeta; Nyint a mɔnŋ lenŋ, tie digbangann nilɔ. A mun tie ŋmee k sii wantit taa sii tuun bianŋ'nba? Botil nna na; nnai kaa, t saa tuma bonbiil nba gal taa bo saa tun saamm na l'nba. L yuo na k b tul lot k bakinɔ, ŋaan ji yaa bin biil gann na. ¹⁰ K saamm na din donn, k dat lot muu, k kɔanɔ ŋaak na ni, ŋaan kpal gann. ¹¹ L yuo na k b ta k b'nba be tammɔb buol na kul jɔɔn, l waat nan saakab kul, k ji k laat tammɔb nba be sianba. ¹² Jab banlie na din pak lot a lii tie k a mɔk diamm, kuo a ŋaajab, kuo a bonpoi, kuo a niipiin fan te bin nyi duo na ni. ¹³ K maan b yaa bin biil duo manŋe, a yennu gbat duo na biit nba jan bianŋ'nba waa, k tunm bin baal biil duo manŋ. ¹⁴ K lot nyii k saan k wann u diamm'nba nba kuan u bonpoi na, a tient yian k nyi duo na ni, k maan yennu yaa wun biil duo manŋe, ŋann b din dukii nan lot kpanne. ¹⁵ K laa tan yentil na, malaka nba na din luon bin somm Lot k wun nyi duo na ni yian. B din yetɔ a: Kakitil jiin a ŋaapuo nan a bonpoi banlie na k cial. Ciat man, k duo na biilu tan saa mann kpabi k yin kpo. ¹⁶ K b taantl k malaka nba na suol Lot nan u ŋaapuo, nan u bonpoi banlie na nii, k dat nyinnib duo na ni. ¹⁷ Baa nyinnib k gbenn, k malaka yenɔ betib a, ti tiin man k fat i manfuol. I daa jiantil i bia daa sie sɔnjok ni. Ciat saan kunkona na buol man k la manfuol. ¹⁸ K Lot jiin a: Aai canbaa, daa to k t tuun n na. ¹⁹ A sommin bonciann k nyinin kuun ni wa. ŋaan kunkona na fɔkita. Ninmɔnn na saa baalit k t daa k baal kunkonn manŋ buoli. ²⁰ A la digbanbik nba na waa? ŋanne kpiat. ŋaant man saan lenŋ. A la nan l tie digbanmintik nnae. N saa saan lenŋ k fat n manfuol. ²¹ K malaka na jiin a; n tuo wa n kan biil digbanbik manŋi. ²² Kaktil saan lenŋ, k maan n kan tien sial sie k a saa baal digbanbik manŋ ni wa. Lot nba yiin duo manŋ digbanbik na paak; k b ji yil Tsoal. ²³ Yennu din saa do na k Lot baal Tsoal. ²⁴ L yuo na k yennu te k salwuuta nan muu sik baa Sodom nan Gomol paak. ²⁵ K doii na kul dii muu; Niib nan l'nba be doii manŋ ni kul; nan l'nba pia kul din dii muue. ²⁶ K Lot ŋaapo ŋalin jiant k got duo na, k kpant yaatan k sie. ²⁷ Laa yent sanyiɔk, k Abraham fiil k saan sianba k ŋɔa nan yennu daan sie na. ²⁸ Waa got Sodom nan Gomol nan baauk na kul, k u la k munyuuk do jukjuk, k naan nan baa tuu joo namual k l di bianŋ'nba na. ²⁹ Yennu nba din biil Sodom nan Gomol ŋaan din tian, Abraham po, k nyinn Lot. ³⁰ Lot din tiin jaŋmaani nan Tsoal bennue, l paak k ŋɔa nan u bonpoi banlie na yaat doo kunkonn paak k saa kɔa wontu ni. ³¹ Dasial k bonposaakak na tan yet u waalɔ na a: T baa kpet gbenna t mun bia kan la jab nba saa kɔonti. ³² L paak ŋaant tin tul t baa daan wun nyu yib k tin dua nanɔ, k mal waat. ³³ L daal nyiɔk k b yibinɔ daan, k bonposaakak na dua nanɔ. Waa yib k saa gal na; u din k banni. ³⁴ Laa yent sanyiɔk; k saakɔa na yet u waalɔ na a, N won duɔ wa, ŋaant k t yaan yibinɔ k fan mun dua nanɔ, k t kula n mal t baa waat. ³⁵ L daal nyiɔk k b ŋamm yibin b baa daan, k bonbik po na mun dua nanɔ. Waa bia mantik yib na u yaan din k banni. ³⁶ L din tien nnae k Lot waat na kul suol poa. ³⁷ Bonposaakak na din mal bonjak k pul u sann Moab. ŋɔae din tie buolu nba k b yi Moab na yieja. ³⁸ Bonbik po namun mal bonjak k pul u sann Benami. ŋɔae mun din tie buolu nba k b yi Amonn na yieja.