¹ K kaagbennu pak k yetin a: ² Fin nisaalik bija, pakin yubonn maan k tul duo nba k b yi Tiil ne. ³ Pakin Tiil duo nba kuok mɔkgbenŋl k bia kpentil b kpinkonŋ nan min kaagbennu e pak. Tiil tieb i mantik dont i monŋ i fant paak. ⁴ A yent kpia mɔkgbenŋle k b ŋanma fanu k a mantik fan. ⁵ Binba kpaa ne jii Seniil naajiae k tien taabi, k bia jii liban kpekii k tien jaantalk, ⁶ B nyii nan tikpela Basan duo ni k ŋanm ŋalunŋ daat k nyii nan lagbenŋ daad siipl duo ni k kpaatinŋ po k l fan nan luobnyana ne. ⁷ binba ŋanma ne jii caŋann Isipt duo ni k tien jinjɔnŋ a fan fit kii som nyun paak k sɔa kul n fit kii laat. K jɔn cab wu wul a lii tie maatu. ⁸ K Sidon nan Alfad niib kan l ŋatunŋ k fin tiil tuontunna tieb saakab. ⁹ Gebal saakab nan u tuontunna nba mi tuonn ne kul lin be a duo nie. K ŋalint nan b kanna baat a buol k kpentil kpinkponŋ k tuun a tuona ŋalint sinset buol. ¹⁰ K binba nyii Pelis, nan lud, nan put tieb a kunkonkonna, b tu dia naagbankonŋa, k yil kut fokili k gua, k te k a sann duo. ¹¹ K Afad niib nan a kunkonkonna guu a duo juona, k jab nba paal guu a ŋafuok, k jonn b naagbankonŋ a juona paak ŋanme tie jab nba te k a mantik fan. ¹² A din kpentil a kpinkponŋ nan duo nba k b yi Talsis ne, a daak l di fanu k maan a lin mɔk bona bonciann, salinpiena, kut, nan walba nba. ¹³ A saa doi nba k b yi Jafan, nan Tubal, nan Meschec k dia a tiat k kpentil daaba nan bona nba tie kut mont. ¹⁴ K a kuat a tiat k tien nba togalma ne k gaan taami nba tuun tuona, nan kunkɔntaami nan bontaamii b buol. ¹⁵ K Dafan tieb kpentil kpinkponŋ nana, k mɔk kpinii digbana bonciann niib dia b salima k tiena ŋaan gaan tiat. ¹⁶ K Siili tie daa a tiat nan linba kul k a maan. B tien tanbiinyinyila nba dauk paal, nan cab buolu-buolu kul, nan tan nyinyila nba dauk paak k b yi yenn-nba kolal nan labi ne ŋaan gaan tiat. ¹⁷ K Suda nan Islael tieb dia b dii, nan siat, nan Olif tiiniikpan nan bonnunubit k tiena ŋaan gaan a tiat. ¹⁸ Damas tieb daa a bona nba k a naan k pa tilɔana daan nba nyii Helbon. ¹⁹ Vedan nan javan bo dia kutmont nan bonnunubit k kpentil nana. ²⁰ K Dedan dia tankobit gunta k tiena ŋaan gaan a tiat. ²¹ K Alabi tieb nan kedal tinŋ dia tieb pa bebis, nan pei, nan buuni k tiena ŋaan gaan a tiat. ²² K sieba nan lama tieb pa tan nyinyila nba dauk paal, nan salima, nan bonnunubit nba ŋan k tiena ŋaan gaan a tiat. ²³ Haram nan kanne nan Eden, nan Sieba nan Kilmad doi kul kpentil kpinkponŋ nana. ²⁴ B kɔia cincen buolu-buolu kul nan cincena nba mɔk bɔnninant, nan gunta nba ŋan nan ŋmipiana nba ŋan nan liata. ²⁵ K b jii a tiat nba k a naan ne, k tien ŋalint nba yab ni, k siet nan k a j tie nan ŋalunŋ nba be mɔkgbenŋil paak, k b pak jika nba kpai u ni ne. ²⁶ Yuo nba k ŋalint kantieb jia k koa nana mɔkl ni ne. K yendopo wɔŋ pebila k a kɔnn. ²⁷ A mokint nba kul be ŋantunŋ ni nan kantieb ne, nan binba ŋamii ne, nan kpinkpenta nan kukɔnna kul dii nyum. ²⁸ Yuonba k ŋatunŋ kpii ne k kantieb nba be ŋatunŋ manŋ ni ji yikin, k nyum nba kpia l ŋatunŋ jekil. ²⁹ K kantieb nan sunsomtieb nan l saakab kul ji sie mɔk gnenyil ne kunkonn paak. ³⁰ K b kul ji mɔ k fabin a paak k pukin tanbiinii b yula paak k dua k bilin tanpent ni. ³¹ A paake k b kuol k pit b yula, k lia bɔtuot k mɔ mɔnii nan palbiil. ³² A paake k b piak bonbil k tiena: ŋme k dua mɔkgbenŋil nie. Digbana nba bo laat a tiat yuonba, l bo tie pamann ne . ³³ K kpanbal nba kul be lokil kul po tie mɔkita, nan a tiat nba dauk paal ne. ³⁴ Mɔtane a ji kpakin mɔkgbenŋil ni, k a tiat nan niib nba kul tuun a buol ne kul kpakin nana mɔkgbenŋil ni. ³⁵ Niib nba kul kua k kuok mɔkgbenŋil ne nba gbat a biilu ne po yuo nba k jaŋmaamii suolib, k b kpanbala gbaa k jekil k ji goli jaŋmaan ningolisin. ³⁶ K kpinkpeta nba kul be dulnya ne ni nba la linba tuun ne k b yan put, k a kuun ne mɔk jaŋmaami k a sann ji kan ban k jen.