¹ K yennu yetin a, ² Nisaalik, ŋmantil a nunm selusalem po, pakin biil sianinba kul k b jiantil ! patin biil Islael duo ! ³ A saa yet Islael tieb a, yennu kagbennu yaa u wutuol duo a paaka, n saa nyinn n juk banjiak nae, k kuaani k kpi niŋanm nan ni tont kul. ⁴ K maan n luon man kpi ni ŋanmua, nan ni biuk, n saa wuut n banjiak na k kpi suakul. ⁵ K nilua kul sa bann nan min kagbennu wuut n banjiak, k kanjiinua. ⁶ Nisaalik, ii kulii k lii tie nan a yan put nan pabiile a ii kulii nan panŋ, sianinba k sua kul saa laa. ⁷ K bii boiya, k a kulii ? Fin jinib nan: K maan laba biuk be... pal kul si be mɔnŋ, k nii kuln banŋ, k sei kul n gbalik, k dunaa kul n bunn nyun. Li baat, li be ! kagbennu yenu e pak. ⁸ K yennu bia yetin a, ⁹ Nisaalik, sɔkint niib na linba k min yennu piak: ŋ jukbanjiak ŋata k sɔɔl kpan. ¹⁰ L tien sil nan lin kpi, k nyilii nan sanyiktintii na. K kpinkpanmuk ji sii kaa, k maan kpamii nan tubdatu nba k n tul n niib na, ŋaan bi yet bin lebta. ¹¹ Jukbanjiak na ŋata k tien siil nan lin tuntuonn. L ŋat k suol kpan, a lin kubin nikpiilɔ nuu ni. ¹² Nisaalik, ii kulii nan ninbaatil, jukbanjiak na tie n niib yale, nan Islael saakab kul yal, B saa kpibe k kpab nan n nilieb na kul. ¹³ N bikii n niibe, lii tie k b yet lebitu, bonbiil nba na kul saa baaliba. ¹⁴ Nisaalik, a yakii nan n niib na, kii poi niipuook kimaan banjiak na sii cuane yuo nan yuo. N banjiak nba dina sii ŋmae yuo kul, k kpi n niib cuanu kul ni. ¹⁵ Li tie k n niib yan put, k b gbiantil. N jient b duo na nan banjiak nba tekin, k kakii nan sayikintii na, k tien siil nan lin kpi. ¹⁶ Fin banjiak nba ŋat na, a cua niidiitu po nan niigaŋ po, kii cuan sianinba kul k a ŋmant. ¹⁷ K n saa poi niipuook nan nyannu, k n wutuol saa maak. Min yennu e pak na. ¹⁸ K yennu pak nannin k yet a, ¹⁹ Nisaalik, buant sɔnii ŋanle nba k babilɔnn kpanbal na sa tɔkin nan u jukbanjiak. Sɔnii na kul saa piin digban yennkua nie. Caant dɔk daaut sɔnpaata na ni, k lin wann sɔnii na nba saa sian. ²⁰ A saa buan sɔnnu k juk n tan kua Rabat, Ammon waat duo ni, k liet n kua suda, selusalem din gbann nba pal na ni. ²¹ K maan babilɔnn kpanbal sie sɔntaana ni, k jami waa saa yet kpann bianŋ nba k ŋakin kpann manŋ k jient bonn kul nba be. ²² K selusalem dɔk be niidiitu po kpann na pak k l wantɔ nan wun saan maa binbita ki denn doo na juonn, ŋaan tant tɔb tintantii, k jii dagbenŋa, k yiel lijuona nan l kut gana, k gbiil buotii. ²³ Selusalem tieb kan tien linbana yaada, kimaan mɔlol nba k b lol nan Babilɔnn tieb na pak, ŋaan masɔkinkal na yaa lin dialib b yanbɔnn poe, k bia kpaanib nan bi tan saa soolib k yaat nanm. ²⁴ L paake yonmdaanua kagbennu yet a, k maan ii tiatil ii tuon bit po, k mɔk li malin ii tuona ninŋ kul, k tian li po, b saa suolii na nusɔkil. ²⁵ Fin tuonbiit daanɔ nba tie Islael tieb dialɔɔ na, daal nba tie a tubidatu daal na baate. ²⁶ Min yabint yennu e pak na. Yitil a naan fokilik nan yufintu na. Sial ki be k ji sii tun tie li bannu. Fiint nan danm na k tulib panŋ, k sikin binba dia duona. ²⁷ Biilu be, biilu be. Balmɔni, n saa te biilu n baal duo na paak, ŋaan linba na kan tien, n sie daanɔ nba k n gannɔ maa wuu biil duo na tan baal. L yuo k n saa jii duo na k tulɔ. ²⁸ Yennu ŋanm yet a, Nisaalik, Ammonn tieb na sukii Islael tieb e. L paak, a pak biilib, k yetib nan mine yen a: N jukbanjiak nuata k tien siil nan lin kɔt. Li ŋat k tien siil nan lin kpi yian nan lsanyitintii na. ²⁹ Yinm Amonn tieb nba tie tondanm na, ii lat fauk dɔktae, k bia tie dindanm fauk masɔkinna ninŋ ŋaan li tubidatu daal baate yian, k u jukbanjiak na saa kɔti. ³⁰ N jiin n jukbanjiak li taouk ni, ŋaan daa k dat i tubaa? Aaii. N saa dat i tuba, tinŋ nba k b mali na nie. ³¹ N wutociɔnŋ na saa doi paak, k dii nan muu nba tuu di na, k n sa jii i kubin nikpiila nuu ni, k b tie binba mi nikpinu fanu. ³² K ii tiɔnŋ tinŋ ni, k b saa jooi nmuu, k yinkpo. K ii ji saa bial k dua tinŋ ni, k b saa tanmi po, k saa tuu yuo nba kaa paak. Min yennu e pak na.