¹ Dana niin ń pendi, Moyiisi den yini ki taani Israyeli buoli yudanba, ² O den yedi Haarɔn, "Baa naatonbiga ki padi ki mia sugli a tuonbiadi po, ki baa patonli, ki padi, ki juu li bonmunli, li padbinbindli po, tini yandi lie kuli, kibá ń da pia pɔdi, O Diedo paabu po. ³ ŋan yedi Israyeli nitaanli, 'Baa mani ŋuabuali ki padi, ki mia mani sugli i tuonbiadi po. Yin go baa pabiga yeni ŋuabiga yaamu n ki pia pɔdi, ki padi mu, ki juu mu bonmuna li padbinbindli po. ⁴ Yin go baa naatonli, yeni patonli, ki padi, ki mia O Diedo Taanyenma yeni o, yin taani yeni mi jiema padli, ya yoma n ŋmadi yeni mi kpama. Yin tieni yeni, kelima dinne, O Diedo ba dɔgdi o yuli, ipo.'" ⁵ Moyiisi ń yedi Israyeli yaaba lanya maama, nitianba den baa li bona, ki cua li gbandieli luolu nni. Li nitaanli den cua, ki nagni, ki sedi O Diedo nintuali. ⁶ Moyiisi den yedi, "O Diedo ǹ puogi yi ke yin tieni yaali, ki fidi ki la o kpiagdi ń dɔgdi i nunbu nni n yeni." ⁷ Moyiisi den yedi Haarɔn, "Nagni li padbinbindli kani, ki padi ki yanga,ŋan tieni ya tuonbiadi sugli miabu po. ŋan go cua yeni ŋan bua padi ya yanga, ki juu ga bonmunli li padbinbindli po. ŋan bua puni O Diedo ya paabu ne, U Tienu ba di sugli fini yeni li nitaanli tuonbiadi kuli po. ŋan tienu O Diedo ń waani a ke ŋan tieni yaali." ⁸ Lanwani ii, Haarɔn den nagni ki padi ki ŋuabiga, ki bua mia sugli o tuonbiadi po. ⁹ O bijaba den ga mi sɔma tadga nni, ki teni o. O den tuuni o nuubili mi niinni, ki faani li padbinbindli kuni po. O den wuli ya sɔma n sieni li padbinbindli tiipo. ¹⁰ O den juu mi kpama, ki taani ya kpama n ye a cayaanbina yeni li puali kuli, nani O Diedo ń den bili li ñɔbonli maama yeni. ¹¹ Haarɔn den yuandi ki ñani ku jongu niinpo, ki ban sia ya nandi n sieni yeni ku gbangu. ¹² Haarɔn den yuandi ki kodi wan bua juu ya yanga bonmunli li padbinbindli po. O bijaba den ga mi padsɔma tadga nni, ki tandi ki ten o, ke o miimii li binbindli po kuli. ¹³ Ke bi tandi ki teni o ki padyanga yuli yeni ki nandi, ke o ga ki juu li padbinbindli po. ¹⁴ O den ŋuudi ki yanga nuadi yeni ki taabiana, ki juu lankuli li padbinbindli po, ki naa wan bi kpia ki juu ya yanga kpama yeni. ¹⁵ Haarɔn den cedi ke bi cua yeni ya yandi ke o bua padi Israyeli nitaanli po. O den taa o ŋuabo, ki kodi, li nitaanli tuonbiidi po, nani wan bi padi o yuli po padli ŋuabo maama yeni. ¹⁶ O den cedi ke bi cua yeni wan bua padi ya yanga, ki juu bonmunli yeni. O den kodi ga, ki tieni nani O Diedo ń den bili li ñɔbonli ke wan tieni maama yeni. ¹⁷ O den cedi ke bi cua yeni mi jiema padli po mi yoma. O den yidi nuukuli, ki juu li padbinbindli po, nani wan bi cili ki kodi ya padyanga ku siŋaapanpangu nni yeni. ¹⁸ O den yuandi ki kodi li naatonli yeni li patonli, ki mia O Diedo, Israyeli nitaanli po mi taanyenma yeni o. O bijaba den tandi ki teni o ki tadga yeni mi sɔma, ke o miimii li padbinbindli kuli po. ¹⁹ Ama, o den ñani li naatonli yeni li patonli kpama, li juoli kani kpama, ki taani yeni ya kpama n ye a cayaabina kani yeni li puali. ²⁰ O den maani li nandi wan den kpia ki padi ya yandi yeni benguna po, ki taa lankuli ki nagni li padbinbindl kani, ki ba juu. ²¹ O den tieni nani Moyiisi ń den waani o maama yeni, o den yugdi yanga kuli bengunli yeni li jientaali, ki duoni O Diedo nintuali, ki waani ke li padyanlieda kuli tie O Diedo paabu i. ²² Lanwani ii, Haarɔn den duoni o nugi ki teli Israyeli nitaanli po, ki mia O Diedo ke wan yadi bi po mi yedŋanma. Wan yidi li salga kuli ki gbeni, ke o ñani li padbinbindli kani ki jiidi. ²³ Haarɔn yeni Moyiisi den yegi ki kua li gbandieli nni. Lan pugni waamu, ke bi ñani, bi den mia O Diedo ke wan yadi mi yedŋanma li nitaanli po. Lanyognu mɔno, ke O Diedo kpiagdi dɔgdi li nitaanli kuli po. ²⁴ U mu den ñani O Diedo kani ki jiidi ki juu ti padyandi nandi yeni ya kpama n bi ye li padbinbindli po kuli. Li nitaanli ń la yaali n tieni, ke bi yigni yeni li pamanli, ki gbaani ki pugi O Diedo.