¹ O Diedo go den yedi Moyiisi, ² Yini Haarɔn yeni o bijaba, ban cua na, ban cua yeni bi tialakaadi, yeni ban ba sɔgi ba ya kpaŋanma yeni ban ba padi ya naatonli, lan gagdi ki ŋanbi ba O Diedo nintuali, yeni ban ba padi ya patonlieda, yeni ya kpanu n ki tieni dabinli, cancaaga nni. ³ Yin yini li nitaanli, ban taani li gbandieli bulñɔbu kani. ⁴ Moyiisi den cedi ke bi niba taani likani, ke o waani ba O Diedo ń yedi ke wan tieni yaali. ⁵ Moyiisi den yedi li nitaanli, "O Diedo ń bili o ñɔmaama ke tin tieni yaali n ne." ⁶ O den cedi ke Haarɔn yeni o bijaba nagni ki sedi bi liiga, ke o wuli ki ŋanbi ba. ⁷ O den lani Haarɔn ki liadtedga, ki loli o u cabñagdu, ki lani o li lidfagdili, ki maani u benŋuunu, ki cebni, ki ji ñagni o ku gbanñagdugu. ⁸ O den maani o benli po li benliadli, ki ŋuuni li niinni U Tienu ń den waani o ke wan ŋuuni ya tanlieda buolu, Ulima yeni Tumima. ⁹ O den fini Haarɔn yuli li finfinjuali, ki kpaa lipo wula, lan waani ke o gagdi ki dagdi U Tienu po, nani O Diedo ń den waani Moyiisi o ñɔbonli nni maama yeni. ¹⁰ Moyiisi den taa mi kpaŋanma, ki sɔgi li gbandieli nni yeni li tuonsɔntiadi kuli, ki ŋanbi ti , ke ti dagdi yeni O Diedo tiadi. ¹¹ O den miimii mi kpaŋanma li padbinbindli po, taalma lele, o den sɔgi ki ŋanbi li padbinbindli yeni li tuonsɔntiadi kuli, yeni ku tadgu, yeni ku tuankaanu, ke li tiadi kuli ŋanbi cain, ki dagdi O Diedo po. ¹² O den wuli mi kpaŋanma Haarɔn yuli po, ki gagdi ki ŋanbi o, ke o dagdi yeni O Diedo buama. ¹³ O den yuandi ki cedi ke Haarɔn bijaba nagni. O den lani ba mu liadtedmu, ki loli ba i cabñagdi, ki fini bi yula a finfinjuana, nani O Diedo ń den waani Moyiisi maama o ñɔmaama nni yeni. ¹⁴ O den cedi ke bi cua yeni li naatonli, ke li tie ya paabu n ba gagdi ki ŋanbi li nitaanli U Tienu po. Haarɔn yeni o bijaba den maani bi nui li naatonli yuli po. ¹⁵ Moyiisi den kodi li naatonli, ki ga mi sɔma ki tadga nni, ki tuuni o nuubili li sɔma nni, ki tieni li padbinbindli kuni po, ki gagdi ki ŋanbi li padbinbindli. O den wuli ya sɔma n sieni li padbinbindli tiipo. O den tieni yeni, o den gagdi ki ŋanbi li kaanu ke u dagdi yeni a padjuukaana n yeni. ¹⁶ Moyiisi den ñani tugu nni kpama yaama n maa ti nuadi po, ki taani yeni li puali yeni a cayaanbina, ki juu likuli, li padbinbindli po. ¹⁷ O den cedi ke bi taa li patonli nandi yaadi n sieni, ku gbangu, li yuli, tugu nni yaali yeni ya nandi n sieni kuli, ki ñani ku jongu niinpo, ki ban sia ke ti buodi cain, nani wan den tuodi ki waani Moyiisi maama, o ñɔmaama nni yeni. ¹⁸ O den yuandi ki cua yeni ya patonli n tie padjuukaali paabu, ki ba juu, ki buodi li padbinbindli po, ke Haarɔn yeni o bijaba maani bi nui li yuli po. ¹⁹ Moyiisi den kodi li patonli, ki miimii li sɔma li padbinbindli po kuli. ²⁰ O paadpaadi li patonli nandi, ki taani yeni li yuli, yeni a taabiana, ki juu li padbinbindli po. ²¹ Ama o den ŋuudi ti nuadi yeni a taabiana, ki bili li yuli, mi kpama yeni ya nandi n sieni kuli, li padbinbindli po. Li padjuukaali nuulmanu den mangi O Diedo pali, nani wan den waani Moyiisi maama o ñɔmaama nni yeni. ²² O den cedi ke bi cua yeni li patonlieli, wan ba padi yaali ki kaani salga yidkaaba bi tuonli nni. Haarɔn yeni o bijaba den maani bi nui ki padyanga po. ²³ Moyiisi den kodi li patonli, ki ga mi sɔma, ki tadga nni, ki tuu o nuubili mi niinni, ki tieni Haarɔn tubjienu po, o jienu nuubijali po, yeni o jienu taabijali po. ²⁴ O den cedi ke Haarɔn bijaba mo nagni, ke o tieni yuakuli tubjienu po, o jienu nuubijali po yeni o jienu taabijali po, ki ji wuli ya sɔma n sieni li padbinbindli tiipo. ²⁵ O den ñani li patonli kpama kuli, li juoli kpama, tugu nni nuadi ya kpama, yeni li puali yeni i cayaannuni ya kpama, yeni li patonli jientaali. ²⁶ O den taa ya baabuogu n see O Diedo nintuali nni, ya kpanu n ki tieni dabinli, ki gagdi ki ŋanbi O Diedo po. O go den taa maasa yenli, yeni lalaayengu yeni yonkonyenli. ²⁷ O den maani lankuli mi yankpama yeni li jientaali po, ki taa lankuli ki mubni Haarɔn yeni o bijaba nui nni. Bi den yugdi likuli O Diedo nintuali, ki waani ke li tie o ya paabu i. ²⁸ Lanwani ii, Moyiisi den ga li paabu kuli bi nui nni, ki maani li padbinbindli po, ki juu. Lani n den tie ban den tieni ya paadjuukaali, ki kaani Haarɔn yeni o bijaba bi salga yidkaaba tuonli nni. Li padjuukaali nuulmanu den mangi O Diedo pali. ²⁹ Moyiisi go den taa li patonlieli bengunli, ki yugdi O Diedo nintuali, ki waani ke li tie o ya paabu i, nani wani O Diedo ń den waani maama o ñɔmaama nni yeni. Ban den padi ya patonli, ki kaani salga yidkaaba bi tuonli nni yeni ya bengunli tie Haarɔn ya biinu i. ³⁰ Moyiisi den taa mi kpaŋanma, ki sɔgi Haarɔn yeni o bijaba, ki go taa li padbinbindli po sɔma, ki miimii Haarɔn yeni o bijaba po yeni bi tialakaadi po. O den tieni yeni, ki gagdi ki ŋanbi Haarɔn yeni o bijaba yeni bi tialakaadi, ke bi tua salga yidkaaba O Diedo po i. ³¹ Moyiisi den yedi Haarɔn yeni o bijaba, "Yin ŋaani li patonlieli nandi li gbandieli bulñɔbu kani, ki ŋmani mani yeni ya kpanu n ye ku baabuogu nni yeni lankani, nani O Diedo ǹ den waani maama yeni. ³² I ya ŋmani ki sieni ya nandi yeni ya kpanu, yin sia. ³³ I ba tieni dana lele i, li gbandieli bulñɔbu kani, ki kali i salga yidkaaba tuonli nni. Lanwani ii, i fuadi li gbandieli bulñɔbu kani, ki ña hali dana lele. ³⁴ Tin tieni ya padli dinne tie ke O Diedo ń di sugli i tuonbiadi po i. ³⁵ I baa ye li gbandieli bulñɔbu kani hali yensiidi lele yeni ñiadi lele, ki tieni O Diedo ń puogi yi ke yin tieni yaali, lani n tie yin da kpe, kelima i ki cɔlni O Diedo ñɔmaama. N waani yi, kelima, O Diedo ń bili ya ñɔbonli ke min waani yi n yeni." ³⁶ Lanwani ii, Haarɔn yeni o bijaba den tieni O Diedo ń den yedi Moyiisi ke wan waani ba yaali kuli.