¹ Li nitaanli tudma guaŋanbima salga, ban kua i tagli nni, ki bi ba teni O Diedo ya paabu, i pani po, kaa teni ñɔmaama n ne: Li salga tie ya padli n gagdi ki ŋani U Tienu po. ² Salga yidkaciamo ba kodi bi niba ń cua yeni ya yandi li padli po, ban yi kodi a padjuukaana naankani i. Salga yidkaciamo ba miimii mi sɔma li padbinbindli kuli po. ³ Li yandi kpama kuli, li juoli kpama, i kali kani kpama, tugu nni yeni ti nuadi kpama, bi ba juu lankuli li padbinbindli po i. ⁴ I cayaannuni yeni i kpama yeni li puayagli. Salga yidkaciamo ba ñani lanya nankpanba kuli. ⁵ Salga yidkaciamo ba juu lankuli li padbinbindli po mini O Diedo po. Li tie li nitaanli ń puni O Diedo ya paabu, ki bua mia sugli yeni ban ki tiadi ki pani min buali ba ke ban sɔni ya tuonli i. ⁶ Salga yidkaciamo diegu nni bonjala pia u sanu ban ŋmani li padnandi, kelima li ya padli n gagdi ki ŋani cain. ⁷ Mi tudma guaŋanbima, ban ki teni nni min buali ba yaali ya padli, yeni ti candandi ya padli taa ñɔmaama i. Li padnandi tie salga yidkaciamo yua n padi ya biinu i. ⁸ Salga yidkaciamo ya kodi yanga ke li buali padbinbindli po padjuukaali i, wani n die ki padyanga gbangu. ⁹ Li ya tie jiema ya padli, lan puli yo oo, lan ŋaani yo oo, bii lan sɔgi yo oo, li jiema tie salga yidkaciamo yua n padi o nilo yeni po ya jiema i. ¹⁰ Ya padjiema n sieni ki tie jiekaadi, bii ki ŋmadi yeni mi kpama mo tie Haarɔn puolŋuani yaama i. ¹¹ Bi niba n tieni ya paabu ki miadi O Diedo taanyenma padli mo ya ñɔmaama n ne, ¹² A ya cua yeni paabu ki bua tieni O Diedo balga, li ya ñani ŋan cua yeni ya padyanga, a ba pugni ya kpanu n ki pia dabinli, yeni ya yoma ke bi tieni mi kpama, ki nugi kaa tieni dabinli, yeni ban pua ya lalaadi yeni mi yonŋanma kaa tieni dabinli. ¹³ Lanya paabu kuli tie ke lan tieni O Diedo balga i, Ya kpanu n tieni li dabinli mo baa ye. ¹⁴ A ba cua yeni lanya jiebuolu kuli, ki tieni O Diedo balga, ama, likuli tie salga yidkaciamo yua miimii mi padsɔma li padbinbindli po, ki bua mia mi taanyenma O Diedo kani yeni ya jiema i. ¹⁵ Li buali ke ban ŋmani li padnandi ban padi ya daali i. Nangu kan sieni ki fandi ki ŋmani. ¹⁶ Ama, nilo ya puni taanyenma paabu, ke bu tie ke o bi niani, bii li tie o yanbuama po i, i ba fidi ki ŋmani li padnandi lan padi ya daali, ki fandi ki ŋmani ya nandi n sieni. ¹⁷ Ama li padnandi ya sieni li daataali daali, li ji ki buali ke lan ŋmani, li buali ke lin juu ti i. ¹⁸ Nilo ya ŋmani taanyenma padnandi li daataali daali, O Diedo kan tuo li padli yeni. Li ba fanbi li padli, kelima li padli ji ki pia mayuli. Yua n ŋmani li nandi yeni kua i tagli nni n yeni, o ba pa O Diedo i pani. ¹⁹ Li nandi ya sii ya binli n tie jɔgindi O Diedo po, li ki buali ke ban ŋmani li nandi, li buali ke lan sia ti i. Ama ya nilo n ŋanbi o yuli, kaa ye yeni jɔgindi ba fidi ki ŋmani taanyenma padnandi. ²⁰ Yua n ki ŋanbi o yuli, ki ye yeni ti jɔgindi ya ŋmani taanyenma padnandi, yaadi n gagdi ki dagdi O Diedo po, li buali ke ban paadi ki ñani o U Tienu buolu nitaanli nni. ²¹ Nilo ya sii yaali n jɔgni U Tienu po, nilo ya jɔgindi yo oo, yanga ya jɔgindi yo oo, bii lan tie ya jɔginbuolu kuli, ki ŋmani ban puni O Diedo ya taanyenma padnandi, ya nandi n gagdi ki dagdi O Diedo po, o jiki dagdi ke wan ya ye U Tienu buolu yaaba siiga." ²² O Diedo go den yedi Moyiisi, ²³ "Yedi Israyeli nitaanli ya maama ne, 'Da ŋmani mani yanga kpama, nua yo oo, pia yo oo, ŋuabo yo oo. ²⁴ Yankpienli bii fuayanga n cuo ya yanga kpama ki buali ke ban ŋmani ma, amm, i ba fidi ki tieni bontɔli yeni li kpama. ²⁵ Niloba kuli ya ŋmani ban padi ya yanga O Diedo po ya kpama, o ji ki dagdi yeni wan ya ye U Tienu buolu nitaanli siiga nni. ²⁶ Yin li kua naani kuli, i kan ŋmani bonyugdili bii yanga bakuli sɔma. ²⁷ Yua n ŋmani sɔma kuli, o ji ki dagdi yeni wan ya ye U Tienu buolu nitaanli siiga." ²⁸ O Diedo go den yedi Moyiisi, ²⁹ "Yedi Israyeli nitaanli mine: 'Ya nilo n cua yeni paabu, ki bua mia O Diedo mi taanyenma, o ba cua yeni yaali n ba padi O Diedo po. ³⁰ Wani oba n ba cua yeni ya paabu n ba juu ki buodi li padbinbindli po. O ba cua yeni ki padyanga kpama yeni li bengunli, ki yugdi O Diedo nintuali, ki waani ke li tie O Diedo paabu i. ³¹ Salga yidkaciamo ba juu mi kpama li padbinbindli po, ama, li bengunli tie Haarɔn yeni opuolŋuani yaali i. ³² A ba teni salga yidkaciamo yua n padi, ki mia O Diedo mi taanyenma yeni, ki padyanga, jientaali. ³³ Haarɔn bijua yua n kua yeni mi padsɔma, ki juu mi kpama yeni, wani n ba ga ki padyanga jientaali, lan tua o biinu. ³⁴ Israyeli yaaba ń cua yeni ya paabu, ki bua mia O Diedo mi taanyenma kuli, O Diedo cabi u sanu ke Haarɔn yeni o puolŋuani n die ban yugdi ki waani ya padyanga bengunli, yeni ki jientaali kuli. Israyeli yaaba ya padi ya padli kuli, bani n die lanya nandi, bi biinu n yeni. ³⁵ Ki cili fini Moyiisi ń ba wuli ki ŋanbi Haarɔn yeni o puolŋuani, ban cili salga yidkaaba tuonli, Israyeli yaaba ya padi ya padli kuli, ki juu li padbinbindli po, lanya nandi tie bani ya biinu i. ³⁶ O Diedo bili li ñɔbonli, ke hali ban kaani ba salga yidkaaba tuonli nni ya daali, Israyeli yaaba baa tiani ki teni salga yidkaaba lanya biinu i.'" ³⁷ Ya paabu n dagdi yeni li padbinbindli po padjuukaali ya ñɔmaama n ne, mi jiema padli, ti candandi padli, mi tudma guaŋanbima padli, mi taanyenma miabu O Diedo po padli yeni salga yidkaaba kaanma padli. ³⁸ O Diedo den bili Moyiisi lanya pada kuli ñɔmaama, mi fanpienma nni, Sinayi juali po, wan den waani Israyeli yaaba ke ban cili ki ya kpendi yeni ban pia ya paabu, wani O Diedo po ya daali i.