¹ O Diedo go den yedi Moyiisi, ² "A ya biidi a lielo pali, ki kua mi tudma nni, a ya yie, kaa jiini a lielo ń den piani a yaali, bii, a ya suni a lielo bonli, ³ lanyaaka, a ya piidi bonli, ki poli ki nia ke ŋaa la, ki go ki kubi li bonli, a tieni ti tuonbiadi, ki kua i tagli nni n yeni. ⁴ A ba jiini o bondaano, ŋan suni yaali, bii ban piani a yaali, ke ŋaa bua ke a ŋmiani, lanyaaka ŋan la nilo ń biani yaali, ke a piidi, bii ŋan poli ki pua mi tofaama yaali ya po. ⁵ Li ki buali ke ŋan ŋmiani li bonli baba ka, ama, a ba pa ki maani li bonli yeni dunga dibala mu kuli po, ŋan maani dibali. ⁶ A go ba cua yeni ya patonli, ki teni salga yidkaciamo, wan padi O Diedo po, lan piini a tuonbiadi. Li patonli kan ya pia pɔdi, ke li dunga dagdi yeni ban bili ya pani. ⁷ Salga yidkaciamo ba padi li patonli, lan todi a, ŋan da kpeli ki tieni lanya tuonbiadi, ki kua i tagli nni, yeni, N ba di sugli ŋan tieni ya tuonbiadi kuli po." O Diedo go den yedi Moyiisi, "Maadi Haarɔn yeni o bijaba: A padjuukaana ń ba ŋɔdi ya sanbila ki juu ki buodi li padbinbingli po cain n ne: Li padjuukaali baa maa li padbinbindli po, ki co i, hali lan ban fandi, u mu baa li co i, u kan gbindi. ¹⁰ Li ya fandi, salga yidkaciamo ba la o leni gaali liadfagdili, leni gaali bandli. O ba taani ki wodi li padjuukaali fantama, ki balni li padbinbindli, ki bili ki kuli li. ¹¹ Li ya gbeni, wanlandi lanya tiadi, ki la tiatiandi, ki faa mi fantama ki ñani ku jongu niinpo, ki ban wuli ban bobni naana ke li dagdi O Diedo po. ¹² Li padbinbindli po mu baa tundi ki co yognu kuli i, u kan gbindi hali bada. Siŋaagu kuli, salga yidkaciamo ba pugni ti daadi, ki fiini u mu. Ki yuandi ki maani mi taanyenma padli li po, ki juu. ¹³ Li padbinbindli po mu baa li co i, salga yidkaciamo kan ŋa un gbindi hali bada. ¹⁴ Mi jiema padli mo ya sanbila n ne. Haarɔn bijaba n ba cua yeni mi yoma li padbinbindli kani, O Diedo nintuali. ¹⁵ Salga yidkaciamo ba yidi li yoma ke mi ŋmadi yeni mi kpama yeni li ŋubli, nuukuli, ki juu li padbinbindli po. Wan yidi ya nuukuli yeni waani ke mi yoma kuli tie O Diedo yaama i. Bi ya yidi salga, ki juu ma, mi nuulmanu ba mangi O Diedo pali. ¹⁶ Haarɔn yeni o bijaba ba fidi ki di li padli jiema yaama n sieni. Ama bi ba di ma ya kaanu n gagdi ki dagdi U Tienu po i, li gbandieli luolu nni. ¹⁷ Li jiema kan ya pia dabinli. Nani ti tuonbiadi candandi padli yeni mi tudma guaŋanbima padli gagdi ki ŋani mini yapo i. ¹⁸ Haarɔn puolŋuani yaaba n tie bonjala pia u sanu ban je li jiema, kelima, mi tie min cabi ba ya biinu, li padbinbindli po padjuukaana nni n yeni. Nitiano ya sii lanya jiema, o ba fiini O Diedo pabienli, yaali bia ń do o yuli po. ¹⁹ O Diedo go den yedi Moyiisi, ²⁰ "Yedi Haarɔn yeni o bijaba ke bi ya bogdi ba ki ŋanbi ba ke bi ba cili salga yidma tuonli, bi ba cua yeni ya paabu n tie mi yonŋanma cilo a na, O Diedo po. Daali kuli, bi ba taa bɔgdima, ki juu ku siŋaagu, ki ti juu bɔgdima mo ku yenjuogu. ²¹ O ba sagi ki ŋmadi yeni mi kpama, ki nugi, ki pua lalaagu. ki yuandi ki cabdi cabdi li lalaagu, ki juu li lalaacaba li padbinbindli po. O ya juugi a ya yognu, u nuulmanu ba mangi O Diedo pali. ²² N bili li ñɔbonli, ke ban ba gandi Haarɔn puolŋuanu yua, wan tua salgayidkaciamo Haarɔn kuuma puoli po baa puuni O Diedo lanya paabu. Li buali ke lan juu ki buodi cain i, ki tua salga O Diedo po. ²³ Salga yidkaciamo ń padi ya padjuukaali kuli, ke li tie jiema, ba juu ki buodi cain. Nilobakuli kan di lanya jiema" ²⁴ O Diedo go den yedi Moyiisi, ²⁵ "Maadi Haarɔn yeni o bijaba, 'Li nitaanli candandi miabu, bi tuonbiadi po paabu ñɔmaama n ne. Salga yidkaciamo ba kodi ki padyanga ban kodi a padjuukaana naankani yeni, bi ba kodi ga O Diedo nintuali, ke li salga gagdi ki ŋani cain, O Diedo po. ²⁶ Salga yidkaciamo yua n padi candandi padli ba di ban padi O Diedo po ya padjiema. Li buali ke li salga yidka ń di li padjiema li gbandieli luolu nni, naani n gagdi ki dagdi yeni mi padjiema dikaanu i. ²⁷ Nitiano ya sii li padjiema, bii li nangu, o ba fiini O Diedo pabienli, mi biadma ń do o yuli po. ²⁸ Bi ya ŋaani li padnandi ya bobli nni, li buali ke bi ya ŋmani ki gbeni ban mudi li bobli i. Ama bi ya ŋaani kudbobli nni, li buali ke lan candi li kudbobli, ki saadi yeni mi ñinŋanma. ²⁹ Salga yidkaciamo diegu nni, a bojala baba n ba fidi ki ŋmani li padnandi. Kelima li padnandi gagdi ki ŋani cain. ³⁰ Ama ban kuani li nitaanli candandi miabu padsɔma li gbandieli nni, ki bua mia sugli bi tuonbiadi po yeni, nilobakuli kan ŋmani lanya padnandi. Salga yidkaciamo ba juu li nandi tin buodi cain i."