¹ Haarɔn bijaba, Nadabi yeni Abihu den padi a mukuana ti mupadtiadi nni, ki kuani li gbandieli nni, ki tieni tulaali yeni li ŋubli, ki juu O Diedo nintuali. Ban den kuani ya mu yeni den tie mulamu i, O Diedo ń den kuani ba ya tuada, kelima waa den waani ba o ñɔmaama nni ke ban ya tuuni yeni ka. ² Lanyognu mɔno, u mu den ñani O Diedo kani, ki jiidi ki sia ki dini ba, ke bi kpe O Diedo nintuali. ³ Lanwani ii, Moyiisi den yedi Haarɔn, "O Diedo den maadi lanya maama i, ki tua, ' N tuodi ki kadi ki waani ke ya salga yidkaaba n ba nagni n nintuali, li buali ke ban cɔlni nni, ki ya kpiagdi nni li nitaanli kuli nintuali. Li buali ke ban ya kpiagdi Mini baba i.'" Haarɔn den ŋmini kaa maadi libakuli. ⁴ Moyiisi den puogi Haarɔn baawaali, Usiyeli bijaba, Mikayeli yeni Elisafan, ki yedi ba, "Kua ki ñani mani i kpiiba kuuma li gbandieli nni, ki fagdi yeni ba u kaangagdiŋamu, ki bili ba ku jongu niinpo." ⁵ Bi den kua ki taa bi nandi yeni bi tialakaadi, ki ñani ki fagdi yeni ku jongu, ki ban pii ba niinpo. ⁶ Moyiisi den yedi Haarɔn yeni o bijaliedba, Eleyasari yeni Itamari, " I pala biidi kelima Nadabi yeni Abihu kuuma po, ama, yin da lebdi i tuada, yin ya tie nani yin den li tie maama yeni. Yin da kuo kuyudi, ki da padi i tiadi, ki kua mi kuuma yubɔnli nni. I ya tieni yeni, i ba kpe i, i go ba fiini O Diedo pabienli li nitaanli kuli po i. Yin cedi i kpiiba yeni Israyeli yaaba n mɔa O Diedo ń cedi ke u mu bolini yaaba yeni, kuumoe, ⁷ Ama, yin da siedi li gbandieli bulñɔbu kani, ki gedi ki taani yaaba n mɔa i kuumoe, kelima i ya tieni yeni, i mo ba kpe i. Yin da sundi ke O Diedo gagdi ki ŋanbi yi, ke yin ya tuuni o tuona li gbandieli nni ne i. O ki bua ke i sii yaali n jɔgni nani mi kuuma ne yeni, ki da ti jɔgni i yula." Lanwani ii, bi den cɔlni Moyiisi ń yedi ba yaali, bi den ki gedi ki taani ya niba n gbaa yeni bi kpiiba kumoe. ⁸ O Diedo den yedi Haarɔn, ⁹ "Fini yeni a bijaliedba yaaba n sieni yeni, yin da ñu daabienma, bii ya daama n tieni dabinli, ki fidi ki kua li gbandieli nni, i ya tieni yeni, i moko ba kpe i. Li tie ya ñɔmaama ke yinba yeni i puolŋuani kuli baa kubi, ki cɔlni hali yeni ya yognu kuli i. ¹⁰ I baa tiendi yeni i, ki fidi ki bandi yaali n gagdi ki ŋani yeni yaali n ki gagdi ki ŋani; i go ba bandi yaali n ŋani yeni yaali n jɔgni N nintuali. ¹¹ A go ba waani Israyeli nitaanli, Min bili ya yikodi bipo, ki waani Moyiisi." ¹² Moyiisi den yedi Haarɔn yeni o bijaliedba, Eleyasari yeni Itamari, "Yin taa ban bobni O Diedo po ya padjuukaana, ki sieni ya jiema yeni, ki di li padbinbinli kani. Li ku buali ke lanya jiema ń kaantianu, ki kandi li padbinbindli kani, kelima mi tie ya jiema n gagdi ki ŋani cain i. ¹³ Yin di li jiema u kaangagdiŋamu nni. Yin bobni ya padjuukaana ki sieni ya jiema tie fini yeni a bijaba ya biinu i. O Diedo den bili li ñɔbonli lipo ke min waani yi. ¹⁴ Ama fini yeni a bijaba yeni a bisiaba pia ya sanu ke i ba ŋmani ban yugdi ki waani ya bengunli yeni ya jientaali O Diedo nintuali. Yin ŋmani lanya nandi ya kaanu n gagdi ki ŋani. Bi den tuodi ki kadi ki waani ke Israyeli yaaba ya padi yanga, ki mia O Diedo taanyenma yeni o, ke lanya nandi tie fini yeni a bijaba biinu i. ¹⁵ Ban yugdi ki duoni ya padyanga jientaali yeni ki bengunli O Diedo nintuali, ba taani yeni ki kpama, ki juu lipadbinbindli po, O Diedo nintuali i. Lanya nandi n tie fini yeni a puolŋuani biinu, nani O Diedo ń bili o ñɔmaama maama yeni." ¹⁶ Moyiisi den lingi ban padi ya ŋuabuali, ki mia O Diedo ti candandi li nitaanli po yeni ki sua ke salga yidkaaba juu li nandi kuli o. Lanwani ii, o pali den biidi Eleyasari yeni Itamari po, ke o buali ba, ¹⁷ Li tieni ledi i, ke i ki ŋmani ban mia ti candandi yeni ya yanga nandi u kaangagdiŋamu nni? Li tie Ya jiema n gagdi ki ŋani O Diedo po i, O puni yi li biinu, ke wan fidi ki mia li nitaanli tuonbiadi po sugli i. ¹⁸ Nani ki yanga sɔma ń kua u kaangagdiŋamu nni yeni, i bi ba fidi ki ŋmani li ŋuabuali nandi li gbandieli luolu nni, nani O Diedo ń bili o ñɔmaama maama yeni." ¹⁹ Haarɔn den jiini Moyiisi, "Dinne li nitaanli cua ki padi ki mia O Diedo ti candandi, bi tuonbiadi po, ti go padi yanga, ki juu ga bonmunli, ki ba mangi O Diedo pali, Ama a ya tiadi n bijaliedba yubɔnli yaali n baa npo dinne ne. N ya bi ŋmani li nitaanli candandi yanga nandi dinne, O Diedo pali bi ba mangi npo oo? ²⁰ Moyiisi ń gbadi lanya maama, o den diidi ki sua ke o pia i mɔni, o ji den ki pugni maama bakuli.