¹ O Diedo den yedi Haarɔn yeni Moyiisi, ² "Yedi li nitaanli, ke Min yedi ya maama n ne: 'Ya yandi n ye ki tinga nni ne kuli, yin ba fidi ki ŋmani ya yandi ya nandi n ne. ³ Ya yandi taawoga n pia mi taayagma, ke bi go wugdi, i ba fidi ki ŋmani lanya yandi nandi. ⁴ Ti yandi ye, ke bi taawoga pia mi taabadyaagma, ki nanki wugdi, ke yantiandi mo ye, ki wugdi, ki nan ki pia taabadyaagma. Li ki buali ke yin ŋmani lanya yandi nandi. lanwani ii, i kan ŋmani lanya yandi nandi. Maanannanli, ku yoyuogu wugdi, ki naa pia taabadyaagma, lanwani ii li ki buali ke yin ŋmani ku nandi. ⁵ li jaŋuabili wugdi, ki nanki pia taabadyaagma, lanwani ii, li ki buali ke yin ŋmani li nandi. ⁶ O wuomo wugdi, ki nanki pia taabadyaagma, lanwani ii, li ki buali ke yin ŋmani o nandi. ⁷ O duolo pia mi taabadyaagma, ama ki nanki wugdi, lanwani ii, li ki buali ke yin ŋmani o nandi. ⁸ Lan dugni ya yandi ne kuli tie jɔgindi i, ipo, lanwani ii, i kan ŋmani li yandi nandi, i go kaa sii li yankpiega mo. ⁹ Ya bonfuoda kuli n ye mi ñincianma nni, i kpeni yeni mi ñinbilkaama nni, i pia u sanu ke yin ŋmani ya bonfuoda n pia ti bondugtiadi yeni a pɔga. ¹⁰ Ama i kan ŋmani ya bonfuoda n ki pia bondugtiagu bii pɔga, li bongbenga yeni ti bonbalinbidi kuli. ¹¹ Yin ya singi li bonfuoda, Yin ya nua li bonfuoda ke a tie jɔgindi ipo, i kan ŋmani li nandi, i go kan sii li bonkpienli mo. ¹² Yin fangi i yula yeni ya bonfuoda n ye mi ñima nni, kaa pia bondugtiagu, bii pɔga. ¹³ A bonyugda mo ye, ke li buali ke yin ya singi a, ki da ŋmani a nandi. Li bonyugda tie, ku kaciigu, o yoblo, ¹⁴ O kaabo, li fenfenli, ¹⁵ A kankala buoli kuli, ¹⁶ ku tɔgtɔgnuangu, mi ñima nni kaabi yeni mi fenfena kuli. ¹⁷ ku fiingu, li ñinpɔnpɔli, bulgbadi, ¹⁸ li baayienli, kudjaluani, jeebugi, ¹⁹ goliya, kpenjanlondi, yeni li bonyugbuoli kuli yeni ku janjangu. ²⁰ Ya bonfuodbila n tie bonyugdimu, bii bonbalinkaana baa tie jɔgindi i, ipo. ²¹ Ama, i ba fidi ki ya ŋmani ya bonfuoda n pia i fiabi, ki cuoni taana na, ki pia taafagda lie, ki yugi ki tinga po, ²² Lanwani ii, i ba fidi ki ŋmani ti naasuudi, ti ñankpandi yeni ti baanbaandi yeni ti buoli kuli. ²³ Ama, yin ya singi, ki da ŋmani ya bonyugdimu n pia taana na ki nan yugi. ²⁴ A bonfuoda ye, ki ba fidi ki jɔgni yi, li ya tie ke i sii a bonkpiena. Ya nilo n sii li bonkpienli, o kan nagni ki sii nitiano hali yeni ku yenjuogu. ²⁵ Nilo ye tugi li bonkpienli, o ba ŋuudi o tiadi, ki ya ye ti jɔgindi nni, o kan sii nitiano, hali yeni ku yenjuogu. ²⁶ Ya yankpiena ke i kan sii tie ya yandi n ki pia taabadyaagma, bii yaadi n ki wugdi. Ya nilo n sii lanya yanbuolu jɔgni o yuli n yeni. ²⁷ Ya yandi n cuoni tinga po kuli, i kan sii ya yanga n cuoni ki taapangu po bonkpienli. Yua n sii lanya yanbuolu kuli baa ye yeni ti jɔgindi, ki kan sii nitiano hali yeni ku yenjuogu. ²⁸ Yua n tugi li yankpienga mo, li buali ke wan ŋuudi o tiadi, ki ya ye ti jɔgindi nni , ki kan sii nitiano hali yeni ku yenjuogu, Kelima yua n sii li yanbuolu bonkpienli kuli jɔgni o yuli n yeni. ²⁹ Ya bonfuoda n tie bonbalinkaana kuli siiga, ya bonfuoda n jɔgni n ne, li siyobli, li tanbanli (dapoli), li dabunli yeni li bonbalinkabuoli kuli, ki taani yeni o wulo. ³⁰ ki cibadga, li sadmadli, li kunkuli, o yua, yeni ku naatoglugu (o kankanmantuolo). ³¹ Ya bonbalinkaana n ye ki tinga nni ba fidi ki jɔgni yi. Yua n sii bonbalinkaali bonkpienli kuli jɔgni o yuli, ki kan sii nitiano hali yeni ku yenjuogu. ³² Li bonfuodbuolu bonkpienli ya baa bonli po, lan baa ya bonli po yeni jɔgni n yeni. Lan ba taa li bonli ki tieni yaali kuli mo tua jɔgindi n yeni, bi ya tieni li bonli yeni daagu yo oo, gaali yo oo, gbangu yo oo, kpalpiagu yo oo, li buali ke lan ŋuudi li bonli, ki da taa li ki sɔni bii ki tieni bonli, hali yeni ku yenjuogu. ³³ Li jɔgindi ya baa tandi tiamaakaagu nni, li tiagu jɔgni n yeni, li buali ke lan mudi li tiamaakaagu i. ³⁴ Bi ya kuodi li tiagu nni ñima, ki tieni jiema, li ki buali ke lan di lanya jiema. Li go ki buali ke lan ñu li tiagu nni ñima mo. ³⁵ Li bonfuodli bonkpienli ya baa ya bonli po kuli ji tie jɔgindi i, li ya tie fanu yo oo, jietientiagu uu. Lan li baa yaali ya po kuli, li buali ke lan mudi li i, kelima li bonli jɔgni, ki kan fidi ki todi tuonli bakuli mini O Diedo po. ³⁶ Li bonfuodbuolu bonkpienli ya baa caali nni, kpenu nni, bii n̄ingangaagu nni, li ñima baa bii ki tie ñinŋanma i, ama yua n cuo li bonli, ki bondi li mi ñima nni yeni baa ye ti jɔgindi nni, ki kan sii nitiano hali yeni ku yenjuogu. ³⁷ Li bonkpienli ya baa bonbuola po, li bonbuola ki biidi yeni bulma. ³⁸ Ama, bi ya wogni li bonbima jiema po i, ki li bonkpienli baa lieni nni, li buali ke lan wuli li bonbima i, kelima mi jɔgni n yeni. ³⁹ Yin ŋmani ya yandi siiga nni, yenga ya kpe, yua n sii li yankpienga kuli, jɔgni o yuli, ki kan sii nitiano hali yeni ku yenjuogu. ⁴⁰ Yua n ŋmani yankpiennandi, li buali ke wan ŋuudi o tiadi, ki ya ye yeni ti jɔgindi , ki kan sii nitiano hali yeni ku yenjuogu. ⁴¹ Ya bonfuoda n tie bonbalinkaana, ki fili bi tugdi po kuli tie jɔgindi i. ⁴² I kan ŋmani ya bonfuoda nfilni tinga nni, yeni yaaba balni, yeni yaaba n cuoni ki pia taana na bii yaaba n cie taana na kuli. Lanya bonfouda kuli ti jɔgindi i. ⁴³ Yin fangi i yula ki da ŋmani lanya bonfuoda buolu, ki jɔgni i yula. ⁴⁴ Mini n tie O Diedo, i Tienu, N gagdi ki ŋani cain, lanwani ii, imo ba gagdi ki ŋanbi i yula ki ya kpiagdi nni, li buali ke yinba mo ń gagdi ki ya ŋani i. Yin fangi i yula, ki da ŋmani ya bona n ba jɔgni yi. Da ŋmani mani ya bonfuoda n balni, ki filni tinga nni, ki jɔgni i yula. ⁴⁵ Mini n tie O Diedo, yua n ñani yi ti yonbdi nni Ejipti diema nni, ke yin ya pugi nni. Lanyapo, min gagdi ki ŋani cain yeni, li buali ke yimo ń gagdi ki ya ŋani i. ⁴⁶ Min bila ya ñɔmaama ya yadi, ya bonyugda, yeni ya bonbalinkaana n ye ki tinga po ne n yeni. ⁴⁷ Li buali ke yin ya bani ya bonli n ŋani yeni ya bonli n jɔgni, ki go bandi yiko ń cabi ke yin ŋmani ya nandi yeni yiko ń ki cabi ke yin ŋmani ya nandi.'"