¹ O Diedo den yedi Moyiisi, ² Ke wn yedi Israyeli yaaba ya maama ne, "Ya nili n tieni ti tuonbiadi, ke laa tie o yanbuama, li niima nni tie, ke yua n tieni bonli, ki miidi ti yikodi nɔmaama. ³ Li ya tie ke salga yidkaciamo n tudi, ki cedi ke bi niba kuli baa i tagli nni, li buali ke wan cua yeni O Diedo po ya naatonli n kipia pɔdi. li baa tie wan tieni ya tuonbiadi yeni ya padli i. ⁴ O ba cua yeni li naatonli li gbandieli bulñɔbu kani. O ba maani o nuu li naatonli yuli po. Ki ji yuandi ki kodi o, O Diedo nintuali, ki ga mi sɔma tadga nni. ⁵ Salga yidka ba kua yeni li sɔma li gbandieli nni. ⁶ O Salga yidkaciamo ba tuu yeni o nuubili mi sɔma nni, ki mii taalma lele O Diedo nintuali, bu kpaldɔginkaabu yaabu n ye u kaangagdiŋamu yeni u kaangagdiŋanmɔnu siiga nni yeni po. ⁷ O ba tieni mi sɔma ban juugi tulaali ya padbinbindli po yeni yina po, O Diedo nintuali. O ji ba wuli ya naasɔma n sieni a padjuukaana binbindli puoli po, li gbandieli bulñɔbu kani. ⁸ Bi ya padi ki gbeni, salga yidkaciamo ba ñani yaaali mi juuma po n ne: Tugu nni kpama kuli, yeni yaama n taabi ti nuadi po, ⁹ I cayaannuni yeni i kpama, a loga nni kpama, li puali yeni li kpama. ¹⁰ Salga yiskaciamo ba juu lankuli a padjuukaana binbindli po, lan buodi cain, lan tieni nani ban miadi O Diedo mi taanyenma padli, ki tie maama yeni. ¹¹ Yaali n sieni ki yanpadkaaga nn, ku gbangu, li yuli, a taabiana, tugu nni yaali yeni ti nuadi, ¹² o ba ñani li gbandieli niinpo, ki lu ban bobni naani ki wulgi ti baadi yeni mi fantama yeni, ki sia li fantantinli po, lan buodi cain. ¹³ Li ya tie ke Israyeli nitaanli kuli tieni tuonbiadi, ki miidi O Diedo ń bili ya kuali, ke laa tie bi yanbuama, kaa faama mɔko, bi baa i tagli nni n yeni, bá bi yaa bani ke bi tieni tuonbiadi. ¹⁴ Bi ya ti bandi ke bi tieni tuonbiadi, bi ba taani ki cua yeni naatonga ki padi ki mia sugli bi tuonbiadi po, li gbandieli bulñɔbu kani. ¹⁵ Bi yudanba ba maani bi nui ki naatonga yuli po, O Diedo nituali, ki kodi ga, ki ga mi sɔma tadga nni. ¹⁶ Salga yidkaciamo ba taa li sɔma waamu, ki kuani li gbandieli nni. ¹⁷ O ba tuu o nuubili mi sɔma nni, ki mii taalma lele O Diedi nintuali, bu kpaldɔginkaabu yaabu n paadi u kaangagdiŋamu yeni u kaangagdiŋanmɔnu yeni po. ¹⁸ O ba tieni mi sɔma ban juugi tulaali ya binbindli po, li gbandieli nni yeni, yina po, O Diedo nintuali, ya sɔma n sieni, o ba wuli a padjuukaana binbindli puol po i, li gbandieli bulñɔbu kani. ¹⁹ O ba ñani ki yanga kpama kuli ki juu man buodi a padjuukaana binbindli po. ²⁰ O ba tieni li naatonga nani ban tiendi maama niyendo tonbiadi sugli miabu salga yeni, ban baa O Diedo sugli bi tuonbiadi po. ²¹ Salga yidkaciamo ba yuandi ki ñani ya nandi n sieni ligbandieli niinpo, ki sia nani niyendo po tuonbiadi sugli miabu po yeni. Li ba tua li nitaanli kuli ya candandi sugli miabu i, bi ba baa sugli mɔko. ²² Li ya tie ke judaano n tieni tuonbiadi, kaa faami, ki miidi O Diedo ń bili ya kuali, o ba baa i tagli nni n n yeni. ²³ O ya ti bandi ke o ye i tagli nni, o ba cua yeni ya ŋuabuali n ki pia pɔdi, ti candandi po. ²⁴ O ba maani o nuu ki yanga yuli po, O Diedo nintuali, ki yuandi, ki kodi li ban padi a padjuukaana naankani yeni. Li ba tua padli o tuonbiadi sugli miabu po. ²⁵ Salga yidkaciamo ba ga ki yanga sɔma tadga nni, ki tuu o nuubili mi niinni, ki tieni li padbinbindli yina po, ki wuli ya sɔma n sieni a padjuukaana binbindli puoli po. ²⁶ O ba yuandi ki juu ki yanga kpama kuli, a padjuukaana binbindli po nani ban tiendi maama ki miadi mi yanduanma O Diedo kani maama yeni. Salga yidkaciamo ya tieni lan buali maama, o yudaano tuonbiadi ba piini, wan baa sugli. ²⁷ Israyeli nilo yua n ki tie salga yidka ya tieni tuonbiadi, kaa faami, ki miidi O Diedo o Tienu ń bili ya kuali, o ba baa i tagli. ²⁸ O ya ti bandi ke o ye i tagli nni, o ba cua yeni ya ŋuasali n ki pia pɔdi, ti candandi miabu po. ²⁹ O ba maani o nuu ki yanga yuli po, ki kodi ga ban kodi ban bua juu ya paabu a padjuukaana binbindli po yeni, ki ga mi sɔma tadga nni. ³⁰ Salga yidkaciamo ba ga mi sɔma, ki tuu o nuubili mi niinni, ki tieni li padbinbindli yina po, ki ji wuli ya sɔma n sieni li padbinbindli puoli po. ³¹ O ba yuandi ki ñani li ŋuasali yeni kpama kuli, ki juu a padjuukaana binbindli po man buodi cain, nani ban tiendi taanyenma padyanga maama ki miadi O Diedo yeni. U nuulmanu ba mangi O Diedo pali. Salga yidkaciamo ya tieni yeni, o ba piini li nilo tagli, wan baa sugli. ³² Li ya tie ke li nilo cua yeni pabiga i, li pabiga baa tie ya bonsiaga n ki pia pɔdi i. ³³ O ba maani o nuu ki yanbiga yuli po, ki kodi ga ban kodi naani a padjuukaana yandi, ki juugi li padbinbindli po yeni, ki ga ki sɔma tadga nni. ³⁴ Salga yidka ba yuandi ki tuu o nuubili mi sɔma nni, ki tieni li padbinbindli yina po, ki ji wuli ya sɔma n sieni li padbinbindli puoli po. ³⁵ O ba ñani ki yanga kpama kuli, ki juu li a padjuukaana padbinbindli po, nani ban tieni ban mia O Diedo mi yanduanma yeni ya yanga ya kpama yeni, ki taani yeni yaali n ba juu kuli, ki juu. Salga yidka ya tieni yeni, o ba mia U Tienu sugli o nilo yeni po, wan go baa sugli mo.