¹ A ya bua padi O Diedo po yanga, ki mia mi yanduanma, a ba fidi ki gandi a yankulu nni naatonli bii naasali, li yanpadkaaga kan ya pia pɔdi. ² A ba cua yeni ki yanga li gbandieli bulñɔbu kani, ki maani a nuu ki yanga yuli po. O ba yuandi ki padi ga, ki ga mi sɔma tadga nni. Salga yidkaaba nni yendo ń ga mi sɔma, ki miimii li padbinbindli po kuli. ³ Li yanga salga baa tie padjuukaali i, salga yidkaa ń juu kan buodi li padbinbindli po. Wan ba juu ya nandi n ne: mi kpama yaama n ye tugu nni kuli, ⁴ Acayaabina yeni ya kpama n taabi a kuli, yeni ya kpama n ye li puali kani. ⁵ Lanwani ii, Haarɔn bijua, salga yidkaaba nni, yendo ba taani lanya nandi kuli, ki taani yeni wan ba jia ya nandi ki pugni, ki juu lan buodi cain, ki tua padjuukaali yaali n ba mangi O Diedo pali. ⁶ ŋan ba padi ya yanga, ki mia O Diedo mi yanduanma ya tie pia bii ŋuabo, o baa tie ya yanga n ki pia pɔdi. ⁷ Li ya tie pabiga, a ba ba cua yeni ga li gbandieli bulñɔbu kani, ki maani a nuu kipabiga yuli po, ki padi ga. A ba ga ki sɔma tadga nni. ⁸ Salga yidkaaba nni, yendo ń ga li sɔma ki miimii ki lindi li padbinbindlii. ⁹ Li paabu nni, i ba paadi ya nandi n dagdi yeni li padjuukaali : ki yanga kpama, li juoli yeni ki ciaga nni kpama, yeni tugu nni kpama kuli. ¹⁰ A cayaanbina kpama yeni li puali kani ya kpama. ¹¹ Salga yidkaaba nni, yendo ba juu lankuli li padbinbindli po, lan buodi ki tua ya padjuukaali n dagdi O Diedo po. ¹² A paabu ya tie ŋuabo, ke a bua puni O Diedo, a ba cua yeni o O Diedo kani. ¹³ A ba maani a nuu ki yanga yuli po. A ba yuandi ki padi o u kaangagdiŋamu kani. Salga yidkaaba yendo ba ga mi sɔma, ki miimii kilindi li padbinbindli. ¹⁴ Yin ba paadi yaali li padjuukaali po n ne: tugu nni kpama kuli. ¹⁵ ki ñani a cayaanbina yeni a kpama kuli, yeni li puali kpama. ¹⁶ Salga yidka ba juu lankuli lan buodi ki tua padjuukaali O Diedo po. Li nuulmanu ba mangi O Diedo po. ¹⁷ Ne tie ya maabilkaama ke i baa cɔlni, yinba yeni i puolŋuani hali yeni ya yogu kuli yeni yin ye naankani kuli. I kan ŋmani hali bada yanga kpama yeni ki sɔma."