¹ Sinaayi juali po,O Diedo go den yedi Moyiisi ya maama ne, "Yin da tagi nannanli, ki da kpiedi tana ki ya pugi bulo, nani o tie i tienu yeni. Yin go da seni yin kpiedi ya butanli, ki ya gbaandi ki pugi li. I baa pugi Mini O Diedo, i Tienu baba i. ² Yin ya tiani ki cɔlni Saba, mi fuodma daali, ki ya fangi u kaangagdiŋamu, kelima Mini O Diedo ye lankani i. ³ I ya cɔlni n nɔmaama lan buali maama, ⁴ N ba cedi ki taaga ń ya nii lan buali maama, i kuani nni bonbulkaali baa tie bonŋanla, lan buali maama, i tiidi mo ń ya luoni bonŋanla, lan buali maama. ⁵ I baa kubi u jetaagu, ki pua ki lieni, hali ku daamɔngu tiidi luana ciema ń ban pundi, Yin ya cenli ku daamɔngu tiidi luana, ki ŋanbdi a, hali ya binli n ŋua kpañila bulbu yognu. I baa pia yin bua ya jiema kuli, ki go ya ye yeni mi yanduanma i diema nni. ⁶ I ya cɔlni N yikodi kuli, mi yanduanma baaye i diema nni, yin go ya pia mi gɔmanma. Bonliba kuli kan ya ye, ki ba jieni yi. N ba deli ki fagni ti fuayanbiardi kuli, i diema nni, tɔbu mo ji kan ya ye i diema nni. ⁷ I ba deli ki kpa i yibalinba yeni mu jugsiemu. ⁸ I siiga nni, niba mu ba deli ki yaani i yibalinba, niba kobga, niba kobga mo ń deli ki yaani niba tuda piiga (10.000), ki kpa ba. ⁹ I ya cɔlni N yikodi, N ba yadi mi yedŋanma ipo, ki puni yi ti madi, yin pɔli ki gbie. N ba tieni, min den niani yi yaali. ¹⁰ N ba cedi yin ñani li binkpeli kpaangu jiekpedi ki baa u kaanu ki bili li binli kpaangu jiepaandi. Lanwani ii, li buali ke yin puni, bii yin wuli ti jiekpedi i, ki fidi ki bili ti jiepaadi. ¹¹ N baa ye u kaangagdiŋamu, i siiga, N kan buli yi n nunga. ¹² N baa ye i siiga nni yognu kuli, ki ya tie i Tienu, yin ya tie N buolu. ¹³ Mini n tie O Diedo, i Tienu, yua n ñani yi ti yonbdi nni, Ejipti diema nni, ke yin ji da tie Ejipti yaaba yonbi. Yin den ye Ejipti diema nni, li den tie nani i tie ya naakpaakuola n dia u naadaapandu Ejipti yaaba po yeni, ama, N den pua ki jendi jendi ya naadaadi n den ye i tuli nni yeni; ki cedi ke i yaadi i yula, ki fii, ki cuoni. ¹⁴ Li ya tie ke i yie, kaa cengi O Diedo maama, i ya yie kaa tiendi min puogi yi ke yin ya tiendi yaali. ¹⁵ Li ya tie ke i luni n yikodi, kaa cɔlni n ñɔmaama, kaa cengi n maama mo, i ya yie kaa ŋua min bili yi ya ñɔbona, yeni mini yeni yinba ń loli ya ŋantaado. ¹⁶ Lanwani ii, n bani min ba tieni yi yaali. N ba ludi ki pua yi yeni mi biadma, man bolni yi. I yiabiadpuodkee yeni i juumi yugbaagu ba cuo yi, ki cedi yin juani, ki ya kpenli waamu waamu. I kpaabu tuona kan ya pia mayuli, kelima i yibalinba n ba je yin koni yaali. ¹⁷ N ba ñɔli ki ŋa yi, i yibalinba ń cua ki woli, ki diedi yi. Bi ba kubi yi yeni u paalu, ki waani yi fala, hali yin sani ke baa deli mɔno. ¹⁸ Ama, ya bona ne kuli ya tieni yi, ke i go yie ke i kan cɔlni O Diedo, n ba tuu i tuonbiadi pani hali taalma lele. ¹⁹ N ba tugni yi ya tagli ke i ba bili i tujuagma yeni i japaadi. N kan cedi taaga ń nii i diema nni. Ti talwadi baa tie ipo nani kudi yeni i, ke ki tinga mo wagi nani ti kumɔndi yeni. ²⁰ I baa tuuni i kuani nni fanma, kelima, bonpiabli kan pa tinwagli po, tiidi mo kan loni luana. ²¹ I ya yie kaa cengi n maama, kaa cɔlni nni mo, N go ba pua yi yeni mi biadma, yin pa i tuonbiadi pani taalma lele. ²² N ba cedi ti fuayanbiardi ń woli yi, ki ya co yinba yeni i bila yeni i yandi. Li ba sieni i siiga nni niba waamu baba i, yeni li miali. Bi go kan ya laadi sanpenda boncianla i diema sani nni. ²³ N ya tugni lanya tagli, ke i la fala, ki nan yie cengi n maama, i ya yie kaa ŋua mi bili yi ya ñɔmaama, ²⁴ Mini O Diedo n ji ba pua yi yeni mi biadma, yin pa i tuonbiadi pani taalma lele. ²⁵ N ba sɔni a tɔgola ban cua ki bolni yi, kelima yii cɔlni n ñɔmaama, i go ki ŋua tin den loli ya ŋantaado, ke li buali ke yin tieni yaali, I ya bigni ke yin tɔgni a bilinguona, ki yugi ki ña, ki wuoni, i diema yibalinba po, N ba sɔni u yianbiadpuodkou i siiga, ki go taa yi ki tieni i yibalinba nui nni. ²⁶ N ya biidi yin pia ya jiedi, yoma jikan ya yabi mi diema nni, puoba piiga ba taani ki pua kpanu, ki puli kpanu fanyendu nni. Bi ya puli kpanu ki gbeni, bi ba cabdi cabdi waamu waamu i, maama ke li kan dagdi dieyengu yaaba mɔno. Mi koma ba baa ti diedi nni. ²⁷ Ne kuli ya tieni yi, ke i go ki bua yin cɔlni O Diedo, I ya yie o maama, ²⁸ O pali ba be boncianla ipo, wan pua yi yeni mi biadma, O ba cedi yin pa i tuonbiadi pani taalma lele. ²⁹ Mi koma ba gbadi yi, hali yin kpa i bijaba yeni i bisiaba, ki ŋmani bi nandi. ³⁰ N ba cedi i yibalinba ń pua ki mudi yin padi i buli ya juana nni yeni. N ba pua ki mudi yin padi i buli, ki juugi ya padbinbinda po yeni, ki cedi i buli tinkpiba ń taani yeni i bucaba ki dogni ki tini. N ba nandi yi hali boncianla. ³¹ N ba cedi i dociami ń tua diegbenmudma, ki pua ki mumudi i budiena. N pali ji kan ya mani i padbinbinda po padjuukaana nuulmanu po. ³² N ba bolini i diama cain, hali i yibalinba yaaba n ba cua ki baa yi, ki yaalidga ba cuo ba yeni yaali n tieni ya diama nni ne. ³³ N ba paagi i yibalinba pala, ban kpa yi yeni bi jugsiemu, ki cedi ban deli ki yaani yi, yin sani ki kua nibuoltoe nni. N ba kuani li pabɔnli i diema nni, ki bolini i dociami cain. ³⁴ Li ya tieni yeni, ke i sani ki gedi i yibalinba dogi nni, N ba cedi i diema ń baa mi fuodma, nani yin den baa tie maama bina lele kuli yeni. ³⁵ Lan ba tieni ya bina ke nilo kan ya ye i diema nni yeni, mi diema ba fuodi. Li kan ya tie i yanbuama ka, yinba yaaba n den ki bua ke li diema fuodi, yin den kaa mi niinni ya yogu yeni. ³⁶ Yinba yaaba n sieni, ki sani ku wuoni i yibalinba dogi nni yeni, N ba cedi ti jawaanciandi ń kua yi boncianla, i ya gbadi ki faagu fuugu, ku tiigu nni, yin jie ki sani. ³⁷ I ba sani ki ya bani ke nilo n kubi jugsiega ki deli yi, i ba tuudi ki baa, bá ke nilo ki deli yi mɔno. I baa tiini ki jalgi i lieba. I kan fidi ki sedi i yibalinba nintuali. ³⁸ I siiga nni, boncianli ba kpe i yibalinba dogi nni i. ³⁹ Yaaba n ba sieni mo, bi jigi ba cie, ban dondi ki ya kpenli waamu waamu, kelima bi tuonbiadi tagli po, yeni bi yaajanba tuonbiadi tagli po. ⁴⁰ Ama i puolŋuani ba biidi bi pala, ki dɔgdi ki waani bi tagli yeni bi yaajanba tagli, bi yaajanba den ki ŋɔdi O Diedo ñɔmaama lan buali maama, ki fiini mi yenyiema. ⁴¹ Lanwani ii, n den deli ki yaani ba ke bi sani ki gedi bi yibalinba diema nni. Ama i puolŋuani ń tuo ki miini bi yula, ki bili bi tujuagma, ki tuo ki pani bi tuonbiadi pani, ⁴² N ba tiadi min den loli ya ŋantaado yeni i yaajanba, Abrahama, Isaka yeni Jakɔbo, ki tiadi min de niani ba ya ñɔnianu, Kanana diema po. ⁴³ Ama ki fidi ne kuli ń tieni ki tii, N ba mabni n buolu yaaba, ban ña bi diema nni, ki cedi mi diema ń fuodi, ya yogu ke nilo ki ye mi niinni, li yogu ke N tugni ba bi tagli ban miidi n ñɔmaama, ki yie kaa cɔlni n yikodi yeni n ñɔbona. ⁴⁴ Ama, N kan buli ba n nunga, bii ki bolni bikuli. N kan miidi min den loli ya ŋantaado yeni ba. Yognu kuli, n baa li tie O Diedo i, ban baa pugi ya Tienu. ⁴⁵ N baa tiani min den loli ya ŋantaado yeni i̇ yaajanba, min den ñani ba Ejipti diama nni, ki cua yeni ba, i nibuoli kuli ń gbadi ya maama. N tieni yeni, ke Mini O Diedo, min ya tie i Tienu i." ⁴⁶ O Diedo ń den bili ya ñɔmaama, ya yikodi yeni ya ñɔbona, Israyeli yaaba po, Sinaayi juali po, ki waani Moyiisi ke wan maadi ba n yeni.