¹ O Diedo den yedi Moyiisi, Sinaayi juali po, ² "Maadi Israyeli yaaba, ke O Diedo bili bipo ya ñɔmaama ne: I ya kua min bua teni yi ya diema nni ne, bina lele kuli, yin kpiagi O Diedo yeli, ki da buli li kuanu, ki ŋa un fuodi. ³ Bina luoba kuli, i buli i kuanu nni, ki ŋanbi i daamɔngu tiidi, ki taa li kpaangukuli. ⁴ Ama, li binleleli, i ba ba kpiagi O Diedo yeli, ki cedi i kuanu ń fuodi. Yin da buli libakuli, ki go da gbadi i daamɔngu tiidi mo li binleleli nni. ⁵ Li binleleli, i kan ga tuonsɔnba, ban taa ya kpaangu n tieni i kuanu nni; i kan ga tuonsɔnba ban cie ku daamɔngu tiidi bonluana li kuanu nni, kelima i nan ki ŋanbili tiidi. I ba ŋa u kuanu, un fuodi li binli kuli. ⁶ Ama, i pia u sanu yeni yin taa ya tiidi n tieni ibá ya bonluana li binli nni, ki di. Yinba yeni yin ga ya tuonsɔnba, bi jaba yeni bi puoba kuli, i ba fidi ki di li kpaangu jiema. ⁷ I yandi yeni ti muayandi kuli mo ba fidi ki di li kuanu nni faadi yeni u bonluana. ⁸ Bina lele, taalma lele ya pendi, li taani piina n bina yian, i ba bobni bina piimu jaanma. ⁹ Ya binli n ŋua, o ŋmaalelelo ya danpiiga daali, yin piebi a naatuna u dogu nni, ki waani ti tuonbiadi sugli miabu po. ¹⁰ Yi gagdi lanya binli, ki kpiagi O Diedo yeli. I ba kpaandi i kaankuli, ki waani bi niba kuli, ke li binli tie ya yogu n pundi, ke lan guani ki teni ya diegu n den cindi ki ko li kuanu nni o, ke O Diedo fidi ki cua yeni yi li diema nni. Li binli nni i, ke li buali ke lan daa ki faabi O Diedo buolu niba yaaba n tie yonbi. ¹¹ Li binpiimuuda jaanma binli, ke i ba mangi i pala, ki go cɔlni O Diedo ñɔmaama. Li binli nni, i kan buli liba kuli, i kan taa kpaanguba kuli, i kan tabdi yin ki gbadi ki ŋanbi ya daamɔngu tiidi bonluana. ¹² Li baa tie ipo mi faabma binli i, bingagdiŋanli, i baa di ya tiliala n pudi i kuani nni jiedi i. ¹³ Li jaanma binli, mi faabma binli, yuakuli ba guani wan den ko ya tinga nni i, ki diedi. ¹⁴ A ya kuadi a lielo Israyeli yua tinga, bii, a ya daa tinga nilo kani, i ba kuani i ŋantaadi yeni dunmanga i, ke janbi ki ye. ¹⁵ A ya daa tinga, ŋan ba pa ya dunga ba cɔlni hali mi faabma binli yaali n pendi, wan den koni ki taa ya bina, omo ń cɔdi ŋan ba ko ki yendi ya bina yin diidi ya bina n ba sieni, yuakuli ń guani ki diedi o tinga ya faabma binli yaali n ŋua. ¹⁶ Li ya tie ke ya bina n sieni yeni ya faabma binli n ŋua ya yabi, ki dunga mo baa yabi; a bina ya waa, ki dunga mo baa waa. Ti ba fidi ki yedi ke mi kuadma tie ŋan ba ko ki pedi ya bina, ki sua ke ya faabma binli yaali ŋua i pundi i. ¹⁷ Obakuli ń da janbi o lielo, ama, yin kpiagi O Diedo yeli. O Diedo, tinba Israyeli yaaba ń pugi yua n bili li ñɔmaama, ke tin cɔlni. ¹⁸ Cɔlni mani O Diedo yikodi lan buali maama, lani n tie yin kali i diama nni yeni mi yanduanma. ¹⁹ I kuani nni tiidi ba loni bonŋanla, yin di ki guo. ²⁰ Ama, i ba buali, "Ti ya ki koni ti kuani nni li binleleli, ti ji ba di be i?" ²¹ O diedo yedi ke o ba yadi ipo mi yedŋanma li binluobli, yin ba taa ya kpaangu li binli, li ba pundi yin di hali bina taa. ²² Lanwani ii, i ya koni li binniinli, ki guu ku kpaangu, i baa li di li binluobli ya jiedi i. I baa li di li binluobli ya jiedi i, ki ban tuoni li binyiali ya kpaangu. ²³ A kan fidi ki kuadi nilo po tinga, wan ji diedi ga hali ya yognu kuli, kelima ki tinga ki tie a yaaga ka. Ki tie O Diedo ya tinga i, ke a kaa kipo, ki ko ga Mini yapo. ²⁴ Yin ye ya diema nni ne, yin ya tiani ke nilo ya kuadi ŋa o tinga, o pia yiko ke wan guani ki daa, ki diedi o tinga bá ya yugo kuli. ²⁵ Lanwani ii, mi luoma ya kua a lielo Israyeli yua, ke o kuadi o tinga, ki bua ligi, o kpiilo ba fidi ki guani ki daa a kani, li tinga opo. ²⁶ Ama, o ya ki pia yua n ba fidi ki guani ki daa o tinga ki ŋmiani o, li ya tie ke o ba fidi ki begni o ligi ki guani ki daa o tinga, ²⁷ O ba cɔdi ki diidi ya bina n sieni yeni ya faabma binli yaali n ŋua i, ki pa o wan bi ba ko, ki pedi ya bina. ²⁸ Ama o luodo ya ki pia ya ligi, ke o ba guani ki daa o tinga, yua n daa ki tinga n baa die, ki sua ke ya faabma binli yali n ŋua pundi. Li binli ke o ba guani ki diedi o tinga, ki ko kipo. ²⁹ Nilo ya kuadi diegu ya dociamu, ke bi maa bilinguonli ki lindi nni, ya binli n ŋua, o ba fidi ki guani ki daa, ki diedi o diegu. ³⁰ Binli ya pendi ke o ki fidi ki guani ki daa li diegu, li gbeni opo, li diegu ji baa tie yua n daa ya diecegu i, wani yeni o puolŋuani. Bá mi faabma binli ya pundi, li ki tie taladi wan ŋmiani li diegu. ³¹ Ama, ya diena n ye ya dogi n ki pia bilinguonli nni mo tie nani ya diena n ye i kuani nni yeni. Lanwani ii, nilo ya kuadi li diegu, wan bua ya yognu, o ba fidi ki guani ki daa o diegu, ki diedi, mi faabma binli. ³² Lefi buolu yaaba yeni bi puolŋuani ya yema pia mi paadma. Bani ya kuadi bi diegu dociamu nni, nilo po, bi pia yiko yeni ban guani ki daa, ki diedi bi diegu ban bua ya yogu kuli. ³³ Li ya tie ke bi ki fidi ki guani ki daa bi diegu, bi ba fidi ki guani ki diedi bi diegu mi faabma binli nni, kelima, li diedi ye bi diema nni i, Israyeli yaaba ń puni ba ya tinmu. ³⁴ Ama bi kan fidi ki kuadi bi dogi nni yankpaakaani. Lanya tinmu tie bi tindanba yaamu i ya yognu ń tuu ya yognu kuli. ³⁵ I lielo Israyeli yua ya tie luodo, ki kan fidi ki daa wan bua yaali, i siiga nni, i ba fidi ki todi o, nani yin todi ya canba n ye i siiga nni maama yeni. ³⁶ I ya ledi ligi, yin da pugni maadi li panli po. Ama, yin waani i tuada nni, ke i kpiagdi O Diedo, i Tienu yeli. I ba fidi ki todi li nilo wan ya ye i siiga. ³⁷ I ya ledi o ligi, yin da pugni maadi li panli po; i ya kuadi o jiedi mo, yin buali o li dunga ń dɔa maama, yin da lingi ke yin di jodi li panli po. ³⁸ Yin da sundi ke O Diedo, i Tienu n bili yi li ñɔmaama, ke yin cɔlni lan buali maama. Lan baa maama kuli ii, O Diedo n ñani yi Ejipti diema nni, ki puni yi Kanana diema, ke wan ya tie i Tienu. ³⁹ I lielo Israyeli yua ya tie luodo, ki kuadi o yuli, ke i daa o, yin da mabni o wan ya tuuni nani yonbo yeni. ⁴⁰ Yin ya nua o nani yin nua yin ga ya tuonsɔnba maama yeni, bii nani o caano yua n kaa a tinga po yeni. O baa tuuni apo hali yeni mi faabma binli. ⁴¹ Li binli, a ba cabi o mi fuoma, wan guani ki kuni o denpo, o yaajanba tinga nni. ⁴² Li tie nani tinba Israyeli yaaba tie O Diedo yonbi i, wan den faabi ti Ejipti diema nni maama yeni. Lanwani ii, ti siiga nni, nilo kan fidi ki daa o lielo, wan tua o yonbo. ⁴³ Yin da kubi yin daa yaaba ke bi tie Israyeli yaaba yeni mi biadma. Ama, yin kpiagi O Diedo, ti Tienu yeli. ⁴⁴ I ya bua yonbi, i ba fidi ki daa ba ya nibuoli n kua ki kuu yi ya niba. ⁴⁵ I go ba fidi ki daa ya canba n ye i siiga, ki tie ya nibuoli n mali i siiga nni yeni. I ba fidi ki diedi bani wani. ⁴⁶ Bi ba fidi ki tua i yonbi hali yeni i miali bianu. I ya kpe, i puolŋuani ba fidi ki diedi ba. Ama, yin da tuadi i lielo Israyeli yua yeni biadma. ⁴⁷ Li ya tie ke ya caano n kaa i siiga tua piado, ke i lielo Israyeli yua mo tua luodo, ki kuadi o yuli o caano yeni po, bii o buolu nni yua po, ⁴⁸ I pia ya paalu n ba daa ki faabi o. O kpiilo ba fidi ki daa ki faabi o. ⁴⁹ O bawaali, o baakpeli, o ninjua, bii o kpiilo kuli ba fidi ki daa ki faabi o. Lanyaaka, o ya tieni ania, ki baa ligi, o ba fidi ki daa ki faabi o yuli. ⁵⁰ Yua n bua wan daa ki faabi obá, li buali ke wan cɔdi ya bina n sieni yeni ya faabma binli yaali n ŋua i. Wan ba pa ya ligi yua n daa o po, ba ŋɔdi ban bi ba pa tuonsɔnpaalo ya pani, ya bina n sieni yeni i. ⁵¹ Abina ya sieni, ki yabi yeni mi faabma binli, li buali ke o ba pa ya ligi n yabi i, ki daa, ki faabi o yuli. 2 Li ya sieni a bina waamu yeni mi faabma binli, o ba pa i ligi waamu i, o daafaabma po. ⁵³ Wan tuuni ya bina yua daa o po yeni, o daano baa kubi o nani tuosɔnpaalo yeni i. Ama ikuli ń ya nua, wan da kubi o yeni biadma. ⁵⁴ Li ya tie Israyeli yua kuadi o yuli, o piado po, ki nan ki pia ligi, ki ba daa ki faabi o yuli, wani yeni o bila ba baa mi faabima ya faabma binli yaali n ŋua, ⁵⁵ Kelima, li tie nani yinba Israyeli yaaba tie O Diedo i Tienu yonbi, wan den daa ki faabi yaaba yeni ti yonbdi nni Ejipti diema nni yeni.'"