¹ O Diedo go den yedi Moyiisi, ² Buali Israyeli nitaanli, ban yi ŋɔli Olifi kpama yaama n ŋani, ki cua yeni ma mu fidsanmu cuonma po, kelima mu fidsanmu baa co yognu kuli i, kaa pia gbindma. ³ Mu fidsanmu yaamu n ye bu kpaldɔginkaabu puoli po, u kaangagdiŋamɔnu kani yeni ń ya co yognu kuli, ku ñiagu, Li buali ke lan cɔlni lanya ñɔbonli hali ya yognu kuli. ⁴ Haarɔn ba tuani mu fidsanmu wula fidsantuankaanu po, mun ya co yognu kuli Mini O Diedo nintuali. ⁵ Yin go baa ya yoma n ŋani, ki yi pua kpanu gbenga piiga n bona lie, kpanu kuli ba ga yoma kilo bona luoba. ⁶ Yin sagni kpanu yeni juudi lie, juudu kuli kpanu aluoba, ban duadi wula ya taabli po, ke li see O Diedo nintuali yeni. ⁷ Yin baa li ŋubli, ki seni kpanu juudu kuli kani, wula taabli po, ban yi juu li paabu O Diedo po, ki ŋa kpanu. ⁸ Saba daali kuli, li buali ke salga yidkaciamo ń baa kpanu bonpaana i, ki bili wula taabli po, lan waani ke O Diedo ń bili Israyeli yaaba ya bogdili yeni ki pia gbenma. ⁹ Bi ya maadi kpanu yeni wula taabli po, Haarɔn yeni o bijaba n die li kpanu. Bi ba ŋmani li kpanu ya kaanu n gagdi ki ŋani kani, kelima ban juu ya paabu O Diedo po yeni, tie jegagdiŋanma i. ¹⁰ Ja den ye ti jondi nni, ke o naá yii Celomiti. Li pua den tie Israyeli yua i, ke o báa tie Dibiri, Dani buolu yua. O bijua báa den tie Ejipti yua i. Dayenli, li nilo yeni Israyeli yua den kɔni, ti jondi nni. ¹¹ Bi kɔnli nni, li nilo den soli, ki sugi O Diedo, U Tienu yeli. ¹² Israyeli yaaba den cuo o, ki luoni o li kpaadidieli nni, ki ba guudi O Diedo ń ba waani Moyiisi ban ba tieni li nilo maama. ¹³ Lanwani ii, O Diedo den yedi Moyiisi, ¹⁴ Loli mani ya nilo n soli, ki sugi n yeli yeni, ki ñani mani o ti jondi nni. I ya ñani, yaaba n gbadi wan maadi yaali kuli ba maani bi nui o yuli po, lan waani ke o tugi i tagli. ki ji yuandi ki lugdi o a tana ki kpa o. ¹⁵ Yedi Israyeli yaaba kuli, 'Ya nilo n soli, ki sugi O Diedo kuli, o ba tugi o tuonbiadi tagli. ¹⁶ Lanwani ii, yua n sugi O Diedo yeli, yin kpa o. Li buali ke li nitaanli kuli ń lugdi o a tana, wan kpe. Ya nilo n soli O Diedo yeli, wan tie caano yo oo, wan tie dogu nni maabiga yo oo, ban kpa o. ¹⁷ Nilo go ya kpa o lielo mo,li nitaanli ń kpa o. ¹⁸ Nilo ya kpa o nitiano yanga, o ba pa yanfuodga i kan lebdi wan kpa yaaga. ¹⁹ Nilo ya duoli o lielo kaanuba, wan duoli yua yeni mo ba tuu li panli, ki duoli o li kaanu liga, nani wan duoli o maama yeni. ²⁰ Nilo ya jendi o lielo kpabli, Ban duoli yua mo ba tuu li panli ki jendi omo ya kpabli. Nilo ya pudi o lielo nunbu, omo ń pudi o ya nunbu. Nilo ya fendi o liolo ñinli, omo ń fendi o ya ñinli. Wan duoli o lielo maama yeni, bi ba duoli omo yeni i. ²¹ Yua n pua ki kpa o lielo yanga, o ba pa yanfuodga i, kan lebdi wan kpa yaaga, ama, yua n kpa nilo, ban kpa omo. ²² Yinba Israyeli yaaba yeni bi canba yaaba n taani ki ye ne, ikuli pia yiko yenli i, Mini O Diedo n bili yi lanya yiko. ²³ Lanwani ii, Moyiisi den maadi Israyeli yaaba ban ba tieni o ja yua n soli, ki sugi O Diedo yeni maama. Bi den loli li nilo, ki ñani o ti jondi cancanli, ki lugdi o a tana, ki kpa o. Bi den tieni O Diedo ń den waani Moyiisi ke ban tieni li nilo maama n yeni.