¹ O Diedo den yedi Moyiisi, ² "Maadi yeni Israyeli yaaba yin ba bobni ya jaanma O Diedo po, li daali ya pundi, binli kuli, yin ba taani ya daali li taancianli, ki di mi jaanma, ki pugi Mini O Diedo. ³ Laadi nni kuli, i ba sɔni dana luoba, ama li daaleleli, i kan sɔni tuonliba kuli, i ba fuodi. Li tie daagagdikaali i, ke i ba taani li nitaanli kuli, ki pugi nni. Yin li kua naankani kuli, i ba kali ki fuodi li daali. ⁴ Mi jaanma buoli ye, ke O Diedo tuodi ki bili li mi dana. Li dana baa tie daagagdiŋana i, ke i ba yini ki taani bi niba kuli, ki pugi nni. ⁵ Cincinli jaanma tie mi pendima jaanma i. Li jaanma ba cili o cincinŋmaalo, o piiga n daanaali yenjuogu, ki tie mi pendima jaanma O Diedo po, li ya fiifaa man juodi. ⁶ Li ya fiifaa, ya kpanu n ki pia dabinli jaanma ba cili. Li jaanma baa kubi hali dana lele i. Lanya dana nni kuli, i baa ŋmani ya kpanu n ki pia dabinli. ⁷ Li jaanma dacincinli daali, li buali ke yuakuli ń ŋa o tuonli, ki gedi li taancianli, ki pugi Mini O Diedo. ⁸ Li daleleda kuli, i ba puni daali kuli ti yandi, ban waani li paabu O Diedo nintuali, ki padi a padjuukaana li padbinbindli po. Li daleleli daali, i go ba ŋa i tuona kuli, ki tieni li taancianli, ki pugi nni." ⁹ O Diedo go den yedi Moyiisi, ¹⁰ ke wan waani Israyeli nitaanli ya jaanma buoli n sieni. O den yedi, "I ya pundi min puni yi ya diema nni yeni, i ya koni, ki cili u jetaagu, yin ba cindi ki taa ya kpaangu li diema nni yeni, yin cua yeni yin cindi ki taa ya difiandi yeni ya dikala, ki teni salga yidkaciamo. ¹¹ Mi fuodma daali ya pendi ke li fandi, salga yidkaciamo ba nagni ki yugdi li paabu N nintuali, ke min tuo ki ga i paabu. ¹² Li daali mɔno liga, i ba padi Mini O Diedo po ya pabiga n pia binyenli, kaa pia pɔdiba kuli. I ba juu ga li padbinbindli po ¹³ I ba juu mi jiema padli mo. Li jiema baa tie, mi yonŋanma, cilo bona luoba, ke mi ŋmadi yeni mi kpama. Bi ya juu li paabu, u nuulmanu ba mangi O Diedo pali. I go ba pugni ku daamɔngu liirli yeni bɔgdima, li ñ̃incabli po. ¹⁴ I kan ŋmani kpanu bii ki leni jiepaandi, ki da ki cua ki puni Mini O Diedo, i Tienu, a bonkpiala paabu, ki bi yidi salga. Yinba yeni i puolŋuani kuli, yin kua naani kuli, yin cɔlni li ñɔmaama lan buali maama. ¹⁵ Ki cili salga yidkaciamo ń yidi a dikala yeni ti difiandi salga ya daali, yin cɔdi laadi alele yeni daayenli. ¹⁶ Lanwani ii, Saba lelelo fiifaama, diegu kuli ba cua yeni ku kpaangu bonkpiala ki puni O Diedo bu paabu. ¹⁷ I ba puli kpanu bonmuna lie, ki cua ki teni salga yidkaciamo. I ba taa mi yoma kilo bona taa, ki tieni yeni li dabinli. Salga yidkaciamo ba yugdi bu paabu ki duoni n nintuali, lan waani ke li paabu tie O Diedo yaabu i, ke bu tie ku kpaangu bonkpiala ya kpanu paabu i. ¹⁸ Ki pugni kpanu po, i go ba teni pabila lele, yaamu n pia binyenli yenli, kaa pia pɔdiba kuli,naatonyenga, yeni patona lie. Bi ba juu lanya padyandi kuli li padbinbindli po i. Li ba taani yeni kpanu, yeni ku daamɔngu, ki juu li padbinbindli po, likuli ya nuulmanu ń taani ki mangi O Diedo pali hali boncianla. ¹⁹ Lani ya pendi, i go ba padi ŋuabuali, ti tuonbiadi po, yeni patonbimu lie, ke mu pia binyenli yenili, mi taanyenma yeni O Diedo po. ²⁰ Salga yidkaciamo ba yugdi ki duoni li paabu O Diedo nintuali, lan waani ke bu tie O Diedo ya paabu i. O go ba pugni ku kpaangu bonkpiala ya kpanu. Li paabu jiema tie jiegagdiŋanma i; ki tie salga yidkaciamo ya biinu. ²¹ Li daali, i ba ŋa i tuona kuli, ki tieni li taancianli, ki pugi Mini O Diedo. Yinba yeni i puolŋuani, yin ye naankani kuli, yiń cɔlni li ñɔmaama lan buali maama. ²² I ya tie ku jetaagu, yin ŋa ki da yendi ya dikalan u kuanu kunga, yin go da gaani ya dikala n baali u diyendu yeni mi tugma yognu. Yin ŋa lanya dikala, a luoda yeni bi canba yaaba n ye i siiga nni yeni, ban liegi. Yin da sundi ke Mini O Diedo, i Tienu n bili yi lanya ñɔbona. ²³ O Diedo go den maadi yeni Moyiisi, ²⁴ ke wan waani Israyeli nitaanli ya maama ne: Binli kuli, o maalelelo daacincinli baa tie ipo jaanma i, li baa tie fuoma daali i. Salga yidkaaba ya piebi a naatuna ki duoni, ikuli ń tieni taancianli ki pugi O Diedo. ²⁵ Niloba kuli kan sɔni o tuonli li daali. Ama, i ba cua yeni bu paabu, O Diedo po, ban juu li padbinbindli po." ²⁶ O Diedo go den yedi Moyiisi, ²⁷ "Li daali ye, ki baa tie jaanma, yin tieni ya tuonbiadi sugli miabu po. Salga yiekaaba ya piebi a naatuna jaanma daali, ke dana yian pendi, danpiiga daali, i ba loli bu ñɔbu, ki biidi i pala, ki tieni li taanciali, ki pugi nni, ki puni nni ya paabu, ke bi ba juu li padbinbindli po. ²⁸ I kan sɔni tuonliba kuli li daali, kelima li daali ba tieni kasiedi ke salga yidkaaba ba yidi salga, ki mia sugli i tuonbiadi po. ²⁹ Yua n ki loli ñɔbu, ki biidi o pali li daali, li buali ke ban paadi ki ñani o li nitaanli siiga. ³⁰ N ba buli n nunga yua n sɔni tuonliba kuli li daali. ³¹ I kan sɔni tuonli ba kuli li daali! Yinba yeni i puolŋuani, yin ye naakani kuli, li buali ke yin cɔlni lanya ñɔmaama i. ³² Li daali baa tie fuodma daali i, ikuli po, li daali, li buali ke yin loli bu ñɔbu, ki biidi i pala, yeni yin tieni ya tuonbiadi. Li fuodma yeni bu ñɔlolbu jaanma ba cindi li daayiali yenjuogu i, ke i baa miadi ke Min di i tuonbiadi po sugli, ki ban juodi danpiiga daali, ku yenjuogu." ³³ O Diedo go den yedi Moyiisi, ³⁴ Yedi Israyeli nitaanli ke binli kuli, bi ba jaani a kuajona jaanma, ki kpiagi O Diedo. Li jaanma ba cili ti tuonbiadi po sugli jaanma ya pendi, dana mu, ki tieni dana lele. ³⁵ Li jaanma dacincinli daali, li nitaanli kan sɔni tuonliba kuli, bi ba tieni taancianli, ki pugi Mini O Diedo. ³⁶ Li daaleleda siiga, daali kuli, bi ba teni bu paabu, ban yidi salga, ki juu li padbinbindli po. Li daaniili daali, bi go ba taani ki pugi O Diedo, ki teni yantianga, ban padi, Mini O Diedo po, ki juu lipadbinbindli po. Li daali mo baa tie taancianli daali i, bi kan sɔni tuonliba kuli li daali mo. ³⁷ O Diedo ń bili ya jaanma kuli ya taani, li baa tie mine i, yin ba tieni taancianli ki puni yin bobni ya paabu, ke bi ba padi, ki juu li padbinbindli po; yan yandi ke bi ba juu bonmuna li padbinbindli po, mi jiema paabu, yeni ku daamɔngu, li ñincabli po. Bi ba cua yeni paabu kuli O Diedo ń bili ya daali i. ³⁸ I ba jaani lanya jaanma kuli, ki pugni mi fuodma dana kuli, yin baa taagi ki pugi Mini O Diedo. I ba puni nni li paabu kuli, ki pugni bi niba ń niani ya ñɔniani ya paabu, yeni ban puuni ya paabu bi yanbuama po. ³⁹ Ti ya ba guani ki tiadi a kuajona jaanma po, i ba taani ku kpaangu ki gbeni yo, ki fidi ki jaani li jaanma. Li jaanma dacincinli daali yeni mi dajuodidaali kuli, baa tie fuodma daali i. ⁴⁰ Ama li dacincinl daali, i ba fidi ki gedi ki cie ya bonluana n gagdi ki ŋani. I go ba fidi ki padi ti biadi yeni tiitɔdi ya faadi yeni i kpentiidi bena, ki pua a kuanjona, ki ye ye a niinni hali danleleda, ki ya mangdi i pala yeni Min ye yeni yi li danleleda kuli. ⁴¹ Binli kuli, li buali ke yin jaani li jaanma dana lele i. Yinba yeni i puolŋuani, yin ye naakani kuli, li buali ke yin tiadi ki cɔlni li ñɔmaama i. Li buali ke jaani li jaanma i o ŋmaalelelo nni i. ⁴² Li jaanma danleleda dana nni kuli, Yaaba n tie Israyeli yaaba kuli, bi ba gediki kua a kuanjona nni. ⁴³ Li jaanma ba tiadi ba yognu kuli, ke O Diedo ń den faabi bi yaajanba ya yogu Ejipti diema nni, bi den dua a kuanjona nni i. Yin da sundi, ke Mini O Diedo, i Tienu n bili yi ke yi cɔlni ya ñɔmaama ne." ⁴⁴ Lanwani ii, Moyiisi den waani Israyeli nitaanli, O Diedo ń bili ba ke ba ya jaani binli kuli, ya jaanma buoli kuli.