¹ O Diedo go den yedi Moyiisi, ² Waani Haarɔn yeni o bijaba ya yogu ke bi kan sii bii ki di li nitaanli ń puni ya paabu ke bi yidi salga ya jiegagdiŋanma, Mini ya po. Ban da fali nni, ki biidi n yeli. Mini n tie O Diedo. ³ Yedi ba ke bani, bii bi puolŋuani siiga, yua n jɔgni o yuli, kaa dagdi yeni wan sɔni salga yidkaaba tuonli, li ki buali ke wan nagni Israyeli yaaba ń puni nni ya paabu, ke bi yidi salga ya padjiema kani. Yua n miidi lanya kuali, o ji ki dagdi yeni wan ya ye n buolu yaaba siiga. Mini n tie O Diedo. ⁴ Haarɔn puolŋuani siiga, ya ja n pia mi gbaadma, bii fada, lanyaaka gbanu po yianu bá, bii koncanfadingu, waa dagdi yeni wan di padjiema yaama n gagdi ki ŋani; kase o yianu yeni ya gbeni opo cain, bii o ya see yua n jɔgni o yuli, ki sii kuuma, bii yua n jɔgni o bandli yeni o punñima, ⁵ O ya sii bonfuodli yaali n jɔgni, bii ya nilo n jɔgni o yuli, ki cedi ke o ji kan fidi ki sɔni salga yidma tuonli. ⁶ Salga yidkaciamo yua sii yaali n jɔgni, o baa ye ti jɔgindi nni hali yeni ku yenjuogu. O kan di jegagdiŋanma, kase ke o wuli ki ŋanbi o yuli. ⁷ U yienu ya kua, o ba fidi ki di mi padjiema, kelima mi ji tie ya jiema ke o pia u sanu yeni wan di. ⁸ Ama o kan ŋmani yankpienga nandi, lanyaaka fuayanga ń cuo ya yanga, kelima o ya ŋmani lanya nandi, o ba jɔgni obá, ki gbali n tuonli. Mini O Diedo n bili ke yin cɔlni li ñɔbona kuli. ⁹ Salga yidkaaba baa cɔlni n ñɔmaama kuli, bi kan jɔgni bi yula mi jiema po, ki tugi i tagli, ki kpe. Mini n tie O Diedo, Mini n gagdi ki ŋanbi ba n ya kpiagdi po. ¹⁰ Yua n ki tie salga yidka diegu nni yua, o kan fidi ki di ya padjiema n gagdi ki ŋani. Caano, lanyaaka ban ga ya tuonsɔnlo ki pia sanu yeni wan di li padjiema. ¹¹ Ama, salga yidkaciamo ya daa yonbo yeni o ligi, lanyaaka ban mali ya biga u diegu nni, ban wani ba fidi ki di li padjiema. ¹² Salga yidkaciamo bisalo ya kuni ja, ke waa tie salga yidka, o kan fidi ki di ban yidi salga O Diedo po padjiema. ¹³ Ama, salga yidka bisalo ya kuni ja, kaa mali biga, ki guani ki kaa o baadiegu, nani poñaka bii pakuali, ki baa ye nani wan den tie jifaano yeni, lanwani ii, o ba fidi ki di o báa ń di ya padjiema n gagdi ki ŋani. Ama, nitiano ki pia sanu yeni wan di li jiema. ¹⁴ Yua n ki dagdi ke wan di jiegagdiŋanma ya dini ma, kaa bani, li buali ke wan pa salga yidkaciamo li jiema dunga, ki go maani dibala mu po kuli dibayenli. ¹⁵ Israyeli yaaba ya teni paabu, ke salga yidkaaba cua ki yidi salga, ban fangi bi yula ki da jɔgni ya jiema n tie jiegagdiŋanma; ¹⁶ Li nitaanli ń da tuo yua n ki tie salga yidka, wan di salga yidma jiegagdiŋanma. Bi ya tieni yeni, bi ba tugi i tagli. Mini n tie O Diedo, mini n gagdi ki lugdi ba i nibuoli kuli siiga, ki gagdi ki ŋanbi ba n ya kpiagdi po. ¹⁷ O Diedo go den yedi Moyiisi, ¹⁸ "Maadi yeni Haarɔn yeni o bijaba yeni Israyeli nitaanli kuli, ki yedi ba, ke n bili ba ya ñɔbonli ne, 'Israyeli yua ya cua yeni paabu, ke bu tie ñɔnianu, bii ki tie o yanbuama po i, ki tie padjuukaali, ¹⁹ Li buali ke yin cuo i yankulu nni ya pia, ya ŋuabo, bii ya yanga n ki pia pɔdi, Lani n tie mi tuo ki ga i paabu. ²⁰ Yia da cua yeni ya yanga n pia pɔdi, kelima n kan tuo ki ga lanya paabu. ²¹ Li go tie yenma i, nani nilo ya cua yeni paabu, ñɔnianli po, bii o yanbuama po, ki bua mi taanyenma yeni O Diedo, li buali ke li yanga, wan tie yanbiga aa, yancianga aa, kan da pia pɔdi bá waamu, lani n tie min ga li paabu. ²² Yin da cua yeni yanjuanga, bii taakuanga, bii ban duoli ya yanga, bii fuayanga ń bibi ya yanga, ke o ŋmadi ki ciadi, bii yaaga ya gbanu po pia nala. ²³ I ya puni nni nua bii pia, ke taayenli fagi bii ki kɔbi, bii ban duoli yaaga, li ya tie yanbuama po; ama, li ya tie yin niani nni ya yanga i, o ya pia pɔdi, n kan ga li paabu. ²⁴ I kan cua yeni ban fadi ya yanga ki puni nni paabu. Yin da padi lanya yanbuolu O Diedo po i diema nni kuli. ²⁵ Yin go da daa caano kani yanga ki puni nni paabu. I kan fidi ki puni nni lanya yanbuolu, Mini ya jiema po. I kan cua yeni ya yanga ke bi biidi, bii yaaga n pia pɔdi, min ga li paabu. ²⁶ O Diedo go den yedi Moyiisi, ²⁷ "Bi ya mali naabiga, pabiga bii ŋuabiga, ki ba ye yeni ki naa, hali dana lele i. Lani ya pendi, bi ba fidi ki cua yeni ga padjuukaali paabu po. ²⁸ Li ki buali ke lan kodi naamado bii pamado yeni o biga daayenli. ²⁹ A ya pia yanga ki bua puni nni paabu, ki tieni nni balga yeni min ŋanbi apo maama, ŋan bobni maama ke n ba tuo ki ga a paabu. ³⁰ Li buali ke lan ŋmani li padnandi li padli daali mɔno i. Yin da ŋa li padnandi ń fandi, ki ye. Mini O Diedo n waani yi ke yin cɔlni ya ñɔbona ne kuli. ³¹ Cɔlni mani n ñɔmaama kuli, Mini O Diedo n bili li ñɔmaama. ³² Yin da fali nni, ki tudi li ñɔbona. Yinba, Israyeli nitaanli, yin ya bani bonŋanla, ke Mini O Diedo, n gagdi ki ŋanbi yi, ke i tua nigagdiŋanba. ³³ Mini n ñani yi Ejipti diema nni, ke Mini O Diedo ń ya tie i Tienu."